Нылкышноосты гажаса но яратыса (фоторепортаж)

(Ма, клубзы луэм котькуд гуртын со озьы вал, дыр).

Пичигес дыръямы покчиёзо школаысь дышетӥсьёсынымы дасяськылӥмы, нош бадӟымгес будэм бере, завклуб Тасяпаймылэсь, «ойдолэ, нылъёс, концерт дасяломы» шуыса, ӧтемзэ чидатэк витимы ини. Тӥни со концертлы дасяськон гинэ но ма сылэ вал. Ачиз одӥг история. Мылысь-кыдысь, вань сюлэммес сётыса, кырӟанъёсты но эктонъёсты, кылбуръёсты но пичи сценкаосты дышетӥськомы вал… Кырӟан кылъёсты яке эктон выросъёсты вунэто шуыса, сцена сьӧрын сюлмаськыса сылэм дыръёс, бурдъяськем мылкыд... ваньмыз толон гинэ вал кадь… Таӵе шуныт тодэ ваёнъёсам выйи вордскем гуртам Нылкышноослэн калыккуспо нуналзылы сӥзем ӝытын. Зэмзэ но, кемалась ортчем дыръёсы берытски кадь потӥз. 

Ас мылкыды вылэ пыкиськыса дунъет сётэм кадь медаз луы, но Сизнер гуртамы азьло но концертъёс кулэезъя но радызъя, лад-лад ортчо вал, али но со озьы вылэм. Таяз радэ но гуртоосы туж быгатыса но пыр-поч дасяськиллям праздник ужрадлы. Артистъёсмы учкисьёсты аспӧртэм «солянкаен» куноязы — ӝытэз чебертӥзы гуртысь пиналъёслэн анайёссэс но песянайёссэс, Атаймузъемез утисьёсты но каньыл улонэз данъясь кылбуръёссы но кырӟанъёссы. Чик сураськытэк, кылъёсты вунэтытэк, куаразэс бадӟым поттыса кырӟазы но кылбур лыдӟизы пиналъёс. Нош соос ведь ваньзы шуымон покчи аресъем нылпиос. Ӟечокъёс!

Пиналъёслэн выступлениоссы бере учкисьёслы ӵектӥзы ёросамы нимысьтыз ялэм конкурслы дасям спектакль. Со Мария Ивановалэн «Тӥледыз гажаса но яратыса» нимо театральной представлениезъя нылкышноослэн праздниксылы дасям постановка вал. Крезьгуро спектакль шуи ке но, уг янгыша, дыр, малы ке шуоно со ас пӧлаз эктонъёсты но, кырӟанъёсты но басьтэм. Туж усто, быгатыса шудӥзы гуртоосы. Спектаклез учкем бере, шуныт сӥзёнъёсты кылэм бере, капчи праздник мылкыд кылдӥз. Малпасько, конкурсэз дунъясь адямиос но сизнеръёслэн тыршемзылы кулэ дунъет сётозы шуыса. Азинсконъёс но вормонъёс соослы!

Лулчеберет сярысь гожтӥсько бере, нимысьтыз пусъеме потэ эшшо кӧня ке гуртоосме. Веранэ ёросысь ветеранъёс пӧлын ортчытӥськись «Балкыш» фестивале пыриськись апайёсмы сярысь. Котькуд аре соос мыло-кыдо та вожвылъяськонэ пырисько. Туэ фестивальлэн гала-концертаз ӧз ортче ке но, кырӟаны яратӥсь апайёсмы — Антонида Васильева, Надежда Антонова но Мария Иванова — куашкам мылкыдлы уг сётско, кырӟанэн валче улон кузя вамышто!