«Нырысь ужаны секыт вал, но ваньмызлы дышиськод»

Марина Евгеньевна Ижевскысь медициная колледжлэсь сестринской отделенизэ йылпумъям. Ужаны нырысь интыяськем Казаньысь железнодорожной больницае (со луэм 1998-тӥ ар). Казаньын кема ужаны уг тупа Маринапайлы — со аре ик картлы кошкем бере, 2001-тӥ арын, Ципьяысь больницаын ужаны кутске. «Казаньын аслам ӧнерея ужай, реанимацияя но анестезиологияя отделын. Кык ар ӵоже гинэ ужай ке но, трос практика басьтӥ», — шуэ Маринапай. Туннэ нуналозь но Марина Евгеньевна Ципьяын ужа. Аслаз верамезъя, со ини ваньзэ ужаса вуттэм та аръёс ӵоже — процедурной кабинетысь медсестра но, палатной медсестра но луэм. 2015-тӥ арысен кутскыса со педиатрической кабинетын медсестра луыса ужа ни. «Нырысь бадӟымъёсын гинэ ужам бере, дышыны секытгес вал, — шуэ Маринапай, педиатрлэн кабинетаз ужаны кутскем дыръёссэ тодаз вайыса, — татын ведь нылпиосын ужано луиз. Но ваньмызлы дышиськод ук. Туннэ нуналэ тани прививкаос но карисько, йӧл продукция понна кыл кутӥсько, пӧртэм документациез нуисько». Но маиз тунсыко, нырысь Маринапай педучилищеез йылпумъям вылэм. Нылпи больницае визьнодась луыса интыяськем бераз гинэ улонзэ медицинаен герӟаны малпам со. «Нылпи больницаын ужа вал одӥг мӧйы кышномурт, Тамара Михайловна, соин уж дорын тодматски. Со мыным вераз, ужаны интыяськоно сыӵе интые, кудӥз тыныд пайда вае но умой практика сётыны быгатэ шуыса. Шедьтоно, шуиз, сыӵе уж, кудаз тонэ ваньмызлы ужаны дышето. Солэн верам кылъёсыз улонын мыным туж кулэ луизы но юрттӥзы шуыса вераме луэ. Мӧйыос тодыса верало ук, — шуиз Маринапай.

Тӥни ӵапак со дырысен Марина Евгеньевна малпам аслэсьтыз улонзэ медицинаен герӟаны — нуназезэ ужам, ӝытсэ дышетскем. Секыт вал ке но, егит ныл тыршем ваньзэ вутскыны. Вутскем но — кык образованиез вань солэн, педагогической но, медицинской но.

— Пичи дыръям ачим туж уколъёслэсь кышкасько вал. Али кадь тодӥсько, кызьы ми кышкамы Надяпайлэсь (Надежда Данилова, Киськемысь Сырьяын кема аръёс ӵоже ужам фельдшер — Н. Ж.). Табере тани ачим но сыӵе интыын ужасько, кытын аслэсьтым нылпиос кышкало (серекъя). Казаньын педучилищеез ӵош йылпумъям эшъёсынымы люкаськыку но ваньзы веразы, кыӵе нылпиос соосты ярато. Нош мон шуи, «монэ уг ярато, мынэсьтым ваньзы кышкало» шуыса. Ваньзы паймыса учкизы мон шоры. «Медсестра луыса ужасько, нылпиослы укол пуктӥсько» шуэмысь ваньзы серекъязы ни собере, — серекъя ачиз но Маринапай.

Но нылпиос кышкало ке но, Маринапайлэсь, ӵемысь соослэсь бӧрдэмзэс кылоно ке но луэ, нылкышно туж яратэ аслэсьтыз ужзэ но огпол но жалямтэ, дышетон-визьнодан ӧнере кыльымтэезлы. Туннэ нуналэ со аслаз гуртоосызлы, сырья калыклы, кулэ луыкуз юрттэ — кинлы укол пуктэ, кинлы кенеш сётэ. Котькинлы юрттыны дась луись, гуртооссэ аслаз семьяысьтыз адямиосты кадь матын карись адямиос трос ӧвӧл, дыр. Маринапай — соослэн одӥгез.