«Нюлэсэз но адӟи, бусыез но»

11-тӥ шуркынмонэ 90 арес тырмиз Вуж Кушкет гуртын улӥсь Ильмурзина Мария Димитриевналы. Юбилярез вордскем нуналэныз ӟечкыланы вуизы солэн матысь ӵыжы-выжыосыз, ёросысь но интыысь кивалтэт. Куноос песянайлы юн тазалык, кузь гумыр но каньыл пересьмон нуналъёс сӥзизы. Озьы ик кузьмазы РФ-лэн Президентэзлэсь ӟечкылан открытказэ, ёрос главалэсь Таукарон гожтэтсэ, сяська керттэт но мукет кузьымъёс. Мария Димитриевна ӟечкыланы лыктэмъёсты тау карыса пумитаз, мӧйы муртэ уг вунэто шуыса сюлмысен шумпотӥз.

— Туж шумпотӥсько, туннэ татчы люкаськиды шуыса. Мӧйы адямиосты таӵе бадӟым карыса ӟечкыласькоды бере, со ми понна туж шумпотымон. Пересьмон дауре милемлы трос но кулэ ӧвӧл ини — юртэд ке шуныт, матысьёсыд ке вӧзад, ваньмыз умой. Тау бадӟым, — бугырскем мылкыдъёссэ ватытэк вераз юбиляр.  

Та кышномуртлы 90 арес тырмиз ни шуыса оскыны но уг луы. Со егит нылъёс кадь чебер, визьмо вераськись, ужась. Ачиз но юбиляр 90 арес тырмемезлы уг оскы кадь…

— Пичи дырысен секыт улон пыр потэм бере, Инмар мыным но шудо нуналъёсты адӟыса улыны мед кылдоз шуэм, дыр. Соин тани али но улӥсько.., — валэктэ Мария Димитриевна. — Вордски мон 1931-тӥ арын Бадӟым Лӧзя 2-тӥ люкет гуртын. Мыным дас арес дыръя, атай жугиськонэ кошкиз. 10 аресэн мон жугиськонлэсь но мазэ валасько вал ини, соин атайлэсь кошкемзэ но умой тодӥсько. Секыт мылкыдэн, вӧсь луонэн герӟаськемын со люкиськон… Берпуметӥзэ атайме адӟисько шуыса, соку мон ӧй тоды на: ожысь со ӧз берытскы ни. Кулэмез сярысь иворез но ми доры берлогес вуиз… Соин кыӵе арын вал со, вераны уг тодӥськы ни. Гуртысь туж трос воргоронъёс оже кошкизы. Уноез ӧз берты, озьыен, тросэз семьяос кузётэк, атайтэк кылизы… Атайлэн выныз но жугиськонэ кулӥз. Малпаны но кышкыт со дыръёс сярысь.  Озьы тӥни ми семьяямы юрттӥсьтэк кылимы — песяй-бабай, анай но ми, вить нылпиос. Бадӟым апаелы 12 арес вал, мыным — дас, кылемъёсыз сузэр-вынъёсмы воксё пичиесь вал на.

Атайзы ожын бырем бере, куанер улӥсь семьялы эшшо но секытгес луэ. Мария апайлэн со аръёссэ синкылитэк тодаз ваемез уг луы. Сютэм луэмысьтыз куар сиемез, картофка но нянь сиыны ёрмемез, нуллыны дӥськутсы луымтэ сярысь солэн вунэтэмез уг луы.

Пичи Маня 10 аресысен пӧртэм секыт ужъёсты аслэсьтыз вить чиньыоссэ кадь тодэ вал ини: аран, валэн гырон, валэн кизён, бусыын ошен ужан — одӥг ужлэсь но со уг кыльы. Синкылиоссэс ватыса, пиньзэс куртчыса, нылпи луэмзы сярысь вунэтыса, ваньзы пиналъёс нуналлы быдэ вань кужымзэс сётыса тыршиллям. 

Школаын Маня ньыль класс гинэ йылпумъяны быгатэ, соизлы но туж шумпотэ. Пичи нылаш, ньылетӥ классэ йылпумъяменыз валче гуртысьтызы колхозын ужаны кутске. Тани кызьы тодаз вае Мария Димитриевна со аръёсыз сярысь:

— Милемлы, 10-12 аресъем пичиослы, колхозын капчигес ужъёсты сётыны тыршизы. Бадӟымъёс мар косо вал, сое быдэсъямы. Ужаммы понна ӧжыт гинэ му сёто вал, одӥг шорем нянь… Солы кыӵе шумпотӥськомы вал ми, ӧжыт ке но кӧтмы тыроз шуыса.

1956-тӥ арозь, картлы кошкытозяз, Мария Димитриевна та ужын тырше. Атаез паласен Вуж Кушкет гуртын ӵыжы-выжыоссы вань вал бере, Мария та гуртэ куддыръя куное ветлылэ. Озьы ик тодматске вуоно кузпалэныз — Николай Ильмурзинэн. Семья кылдыто со дырысь тросэз паръёс кадь ик: ог-огзэс адӟо, синмасько, Николай Марияез лушкаса дораз вае. Воргорон гумыраз колхозын ужам, муш утись но луэм, кочегар но, почтаын но тыршем (жаляса вераны кулэ, Николай агай 2010-тӥ арын кулэм ини). Куспазы соос тупаса улӥллям.

Ачиз Мария Димитриевна гумырзэ колхозын ужаса ортчытэм. Картлы кошкыса Кушкет гуртэ улыны лыктэмез бере но, со гуртысь фермаын ужаны кутскем. Кема аръёс ӵоже кышномурт кужымзэ сётэм гуртысь фермалы. Пенсие потытозяз но, 1986-тӥ арозь, со парсь фермаын тыршем.

— Туала дыре пиналъёс секыт улонлэсь мазэ уг тодо, медаз но тодэ вал. Сомында тэльмырыса, сютэм улыса, гумырам ужаса, али но улӥсько. Нюлэсэз но адӟи, бусыез но. Пӧртэмзэ адӟи, ӧй ӝожтӥськы. Милемлы, мӧйыослы, улон сыӵе секыт эскеронъёс дасям бере, ми со эскеронъёсты кулэезъя ортчыны кулэ. Пенсие потэм бере но тэк ӧй улы, азьло трос баранги пукто вал колхозын. Ноябрь толэзьысен кутскыса толбыт но, май толэзёзь баранги вандылыны ветлӥськомы вал. 55 аресэн пенсие потӥ ке но, 70 аресозь ужай али мон колхозын. Гумырам ужай… Али пудо но вордӥмы, пенсие потэммы бере но. Озьы тӥни. Адямилы чиданы быгатымтэ адӟонъёс уг сётӥсько, соин ваньзэ чиданы кулэ, ужлэсь но кышкано ӧвӧл.

Чидан сярысь Мария Димитриевна туж умой тодэ, 37 аресэн солэн Александр пиез висьыса кулэ.

— Ньыль нылпиосмы вордскизы. Кык нылъёсмы асьсэ семьяосынызы уло (Таня Сарапулын, кыкетӥез, Зина, Лельвижын, солэн тямыс нылпиез вань, кыкез соос пӧлысь кулэмын ини). Анайлы со самой секытэз — аслэсьтыд нылпидэ ыштон, — шуэ нылыз сярысь сюлмаськыса Мария апай. — Мынам аслам пие но кулӥз ведь одӥгез. Кыӵе со секыт ыштон, анай мурт гинэ валаны быгатэ. Нылпи вордӥд ке, пӧртэмзэ адӟыны тупа, но анай луонлэсь шудзэ номаин воштыны уз луы. Василий пие туннэ нуналэ монэным ӵош улэ, кыкнамы ми тупаса улӥськомы. Со амбарын охранник луыса ужа, тулыс кизёнэ ветлэ. Висьыса кулэм покчи пие, Александр, тракторист вал.

Мария Димитриевна туж шумпотэ, солэн вордскем нуналаз со вӧзын самой матысь адямиосыз люкаськизы шуыса. Юбилеяз кык нылъёсыз но бертӥллям вал. Анайзэс бадӟым карыса, соос но таукарон кылъёссэс веразы.

— 90 аресэн монэ ӟечкыланы бертӥзы, — шумпотӥз юбиляр. — Монэ уг вунэто, бадӟым каро, утё. Пересьмон даурын мукет номыр но кулэ ӧвӧл ини. Нылпиосмылы, внукъёсмылы каньыл но шудо улонын улыны мед кылдысал, нокыӵе курадӟонъёс соос медаз адӟысалзы ини. Туала дыре кыӵе ракат улӥськомы ведь, шумпотыса улыны кулэ. Тани мон туннэ нуналлы сыӵе узыр адями, мынам дас кык внуке но кызь правнуке вань. Малпаса утьы ай. Ваньзы таза мед луозы, — мылкыдъёссэ вера Мария Димитриевна.

Та кылъёсыныз соглаш луиз Александра Филиппова но. Со одӥгез куноос пӧлысь песянай вал. Соос юбилярен эшъёс но, ӵыжы-выжыос но вылэм (юбиляр Александра апайлэн ӵужапаез луэ). Улон-вылон сярысь малпанъёссылы сётскыса, соос ӧжытак ӝож малпанъёссылы сётскизы но берлогес кыкназы удмурт кырӟанъёсты быдэсъяны кутскизы.

— Тазьы ик улӥськомы, — шуо песянайёс. — Кырӟан сюлэмез буйгатэ, мылкыдэз ӝутэ. Пересьмимы шуыса пукыны уг луы, туннэ нуналлы шумпотыса улыны быгатыны кулэ.

Туж паймыса кошкизы юбиляр дорысь ёросысь вуэм куноос. Бен, Мария Димитриевна кадь чырткем, сэзь, задор мылкыдо, егит сюлэмо мӧйыос туж ӵем уг пумисько… Син медаз усьы!