Одӥг сцена вылын — пӧртэм калыкъёс

18-тӥ оштолэзе Казаньысь лулчеберетъя кун институтлэн концерт залаз традиционной культурая но калык творчествоя калыккуспо «Этномириада» конкурс-фестивальлэн гала-концертэз но вормисьёсты сӥё-дано пусъён ужрад ортчиз. Туэ со дас тямысэтӥзэ радъяськиз, сӥземын вал Россиысь калыкъёслэн огъя луэмзылэн арезлы. 

Балтась ёросысь творческой коллективъёс арлы быдэ та конкурсэ пырисько но вормонъёс басьто. Туэ но фестивальын вормисьёс пӧлын балтасьёс луизы. 

Та фестивальын бадӟым вормонэ вутскизы Ӟаны лулчеберетъя юртысь творческой коллективъёс: «Шулдыр ӝыт» фольклоръя калык ансамбль нырысетӥ инты басьтӥз, озьы ик жюрилэн нимысьтыз призэныз пусйиськиз, нош ветеранъёслэн «Лулгур» удмурт вокальной ансамбльзы кыкетӥ интыен пусйиськиз.

Озьы ик «Этномириада» конкурс Ципья лулчеберетъя юртысь «Азвесь гырлы» но Покчи Лӧзя лулчеберетъя юртысь «Тыпыртон» эктонъя коллективъёслы шумпотон вайиз: кыкез ик та коллективъёс фестивальлэн 2-тӥ степенё лауреатъёсыз луизы. 

Со сяна асьме ёросысь вормисьёс пӧлы шедиз Пукшинер гуртысь Ислам Асхадуллин, со нырысетӥ инты басьтӥз. Чапшар гуртысь усто кырӟась Марс Хазиев, Шишинер лулчеберетъя юртысь Аяз Асхадуллин но Ильмир Игнатьев 1-тӥ степенё лауреатъёслэн дипломъёсынызы пусъемын вал, нош Рамзиль Садриев — 3-тӥ степенё лауреатлэн дипломеныз. 

Вожвылъяськон радъяськиз вить ӧръёсъя: фольклор ансамбль, йӧскалык вокал, йӧскалык инструментъёсын шудон, этнической модая театр но калык эктон. Вожвылъяськонлэн ужпумез — Россиын улӥсь калыкъёслэсь этнокультурной йылолъёссэс утён, улӟытон но азинтон.

Туспуктэмъёс: Покчи Лӧзя, Ӟаны но Ципья лулчеберетъя юртъёслэн архивъёссы