Одӥг семья – кык йӧскалык

Мила — удмурт нылаш, вордӥськиз но будӥз эшлыко удмурт семьяын, вашкала сям-йылолъёсты утьыса улӥсь Пор-Кутеш гуртын. Самат — бускельын, Тюнтер гуртын быдэ вуэм егит воргорон. 

Семья — со шуныт но лушкем дунне, кытын ваньмыз яратонэн, гажанэн но ог-огдэ валанэн тырмемын.

Нуналысь нуналэ адямиос тыршо семья пушказы каньыл улон кылдытыны. Ведь семья — со улонысь самой бадӟым но дуно кузьым, кудзэ будэтоно но тӥяськись арбериез кадь туж сак утёно. Азьло тон будӥськод но дышетскиськод тонэ вордэм но будэтэм семьядэ гажаны, собере кылдытӥськод аслэсьтыдзэ, кудаз сётӥськод аслэсьтыд вань шуныттэ но вань сюлмысь яратондэ. 

Семья сярысь вераськон потыку, соку ик син азе пальпотӥсь ымныръёс, кужмо пиосмурт, пӧраськись кышномурт, газет лыдӟись песянай-песятай но выж вылын шудонъёсын шудӥсь пиналъёс пуксё. Та суред адямилэн йырсазяз котьку лемлет малпанъёсын герӟаськемын. Улонлэн пӧртэм палъёсыз луо, но кужым адями басьтэ семьяысьтыз, самой шуныт интыысь.
Нош пӧртэм йӧскалыкысь кузпалъёсты басьтоно ке, татын эшшо но тунсыко югдур кылдэ: кык пӧртэм лулчеберетъёс, кылъёс герӟаськыса, эшшо но чебер дунне кылдыто, кытын трос шумпотонъёс, праздникъёс, эктонъёс, кырӟанъёс... Со ик вань мерлыклэн азьпал сюресэз. Статьямылэн кизилиосыз но сыӵе малпанъёсын уло.

Вафинъёслэн семьязы улэ Балтась каргуртын, соин улонзы но ӝог, вошъяськись дуннеын берга. Семьялэн арезлы сӥзьыса, соослэсь пичияк дуннезэс паськытатыны тыршоме, веранъёссэс но малпанъёссэс лыдэ басьтыса, асьмелы но трос визь-кенеш басьтоме.
Егит кузпалъёс вералозы но валэктозы, кызьы улон соосты герӟаз, кыӵе шуг-секытъёсын соос пумиськизы но пумисько, кызьы соосты ортчыны быгато. Озьы ик соос люкиськозы азьпал малпанъёсынызы, валэктозы, кыӵе луо йӧскалыккуспо семьялэн азьбуръёсыз но кызьы соос воштӥськизы. 

— Мила, кемалась малпасько ни вал тонэныд бадӟым вераськон ортчытыны. Туж шумпотӥсько дырмы тупаз шуыса. Тодматскон историдэс вера вал... Кузпалэд но, ачид но одӥг ёросын вордӥськыса будэмын бере, малпасько, историды но туж тунсыко.

— Зэмзэ вераса, тодматскон историмес Саматлэсь кылзӥськыны туж яратӥсько. Со сое котьку ӝутскем мылкыдын вера. Ми ӵемысь со нуналэ берытскиськом. Со вал 2013 ар... Гужем, егит дыр, эшъёсын пумиськонъёс, эктонъёс... Клубысь эктонъёс бере юлтошъёсын люкиськем чик уг поты ук, урамъёсмы но пӧртэмесь. Гуртмы туж пичи, мерлыко юртъёс, интыос, паркъёс ӧвӧлэн, гуртысь остановкаын пукыны малпамы, куазь но туж шуныт, поръямон кадь гинэ вал. Кыӵе ке машина лыктӥз, отысь кык егит пиос потӥзы но милемын гань-гань вераськыны кутскизы. Шӧдыса ик ӧм вуттэ, кыкетӥ машина но лыктыса вуиз. Нырысетӥ машинаен лыктэм пиос кыкетӥосызлы жингыртӥллям но, татын бускель гуртысь нылъёс остановкаын пуко, лыктэ, шуиллям, вылэм. Ой, соку сомында калык люкаськиз... Соос пӧлын Самат но луэм ини. Бератаз валамон луиз, со монэ соку ик тодмам, ВК-ысен (мерлыко бам — ред.) чакласа улэм монэ, сообщениос но гожъям, нош мон сое воксё уг тодӥськы ини. Тюнтер гурт кыдёкын ӧвӧл ке но, ми соосты со дыре ум тодӥське вал. Самат соку аслаз ӟеч сямъёсыныз, оптимизменыз, серемес шӧдонэныз висъяськиз, сюлэмез басьтӥз. Со дыре ик юн сылӥсь, кылкутӥсь адями вылэм. Со дырысен одӥг нуналэз но ог-огмытэк улыны ум быгатӥське ни. Котьку ваньмон дырмес огазе ортчытӥськом.

— Кыӵе веранъёссы вал матысьёстылэн быръемды сярысь?

— Ӵыжы-выжыос паласен кыӵе ке урод веранъёс ӧй вал ноку но. Тодэ вайыны но уг быгатӥськы али, зэмзэ ке верано. Агае гинэ куке вераз вал: «Бигеръёсын эн герӟаськы, соос туж кужмо йӧскалык, нош удмуртъёс зӥбемын, семьяын но озьы ик луоз». Но таӵе веран котькуд калыклэн йыраз улэ, дыр. Бигеръёс асьсэлэсь нацизэс утьыны туж кужмо тыршо, оломар но малпало. Саматэн тодматскемзы бере солэн ӟеч сямо но порядочной луэмезлы ваньзы оскизы, яратӥзы шуысал. Йӧскалыко луон бадӟым роль уг шуды семьяын, валтӥсез — адямилыко луон. 

Огъя басьтӥм ке, нырысь ик кышкатскем, валантэм, осконтэм мылкыдъёс вал ни. Чылкак критикатэк но нокызьы уг луы. Семья матысез сярысь сюлмаське ук! Соку ми азьын мукет ужпум сылӥз — йӧслык шоры учкытэк, ми одно ик шудо семья кылдытом! Озьыен, туннэ нуналэ ми шудбуро йӧскалыккуспо семья. Ми ӵошен дышетскиськом чиданы, адямиос шоры шонер учкыны, толерантностьлы, кылъёсты но лулчеберетэз гажаны. 

— Лулчеберет пумысен верано ке, тон — удмурт, Самат — бигер. Финн-угор но тюрк калыкъёслэн лулчеберетсы, улон радлыксы пӧртэм амалъёсын возьматӥське. Пумиськыны кылдӥз-а сыӵе пӧртэмлыкъёсын но кызьы сыӵе дыръёсты ортчылӥды? 

— Кылдэм юанъёсты, ужпумъёсты соку ик керетонъёстэк, конфликтъёстэк быдтыны тыршиськом. Ваньзэ кылын радъяны луэ, ваньмыз пумысен вераськыны быгатӥськом. Мынам малпамея, ми бадӟым проблема ум лэсьтӥське, ми котьку ог-огмылы тупась но кельшымон огкылэ вуиськом. Ми котькуд нунал, ог-огмылэсь лулчеберетмес гажаны дышетскиськом, тунсыкъяськиськом. 11 ар ӵошен ни, ог-огмес кылзыны, кылыны но валаны дышетским ни.
Зэмзэ ик, 11 ар валче улӥсь кузпалъёс нуналысь нуналэ асьсэлэсь улонзэс эшшо но яркыт буёло, шулдыр карыны тыршо. Соин но, дыр, соослэн нылпиоссы но шудо пинал дырзэс ортчыто.

— Нылпиосты сярысь но вералэ вал. Вань-а йӧскалыккуспо семьяын нылпи визьноданъя аспӧртэмлыкъёс?

— Инмар милемлы кык муспотон нылъёсты кузьмаз: Асель — 3,6 арес но Алина — 8 толэзь. Нылпиосты визьнодан но дышетон туж кулэ луись но кылкутӥсь уж, куддыръя со туж секыт, но ӵемысь — со самой синмаськымон вакыт. Пичи дырзы ортчоз — тодэ ваёнъёс уйвӧт кадь кылёзы. Котькуд анай-атайлэн кадь ик, милям но трос дилеммаосмы, вераськонъёсмы луо та пумысен. Ми — егит анай-атай, соин шонерзэ, троссэ асьмеос но ум тодӥське на, таӵе дыре сюлмын, мылкыдъёсын лэсьтыны тыршиськом. Оглом вераса, ми сӥбурлыко, шудо но гармоничной адямиосты будэтыны тыршиськом.

Уг тодӥськы, кызьы мукетъёс, но самой нырысетӥ нуналъёсысен ик ми соослы удмурт, бигер но ӟуч нуны веттан гуръёсты лэзиськом. Асель кӧня ке удмурт но бигер кырӟанъёсты тодэ.
Ми сое кужмысь дышетыны ум куриське, солэн ас мылкыдэзъя, пушкысеныз ик кык кыллы яратонэз шӧдӥське ни. Сюлмысь, мыло-кыдо кык кылын но кылбуръёсты лыдӟе. Со туж яратэ удмурт дӥськутэз, камалиен, калык чеберманъёсын тунсыкъяське, вордскем кылъёслэн нуналаз нылпи садын камалиен герӟаськем проект но утиз. Милям визьнодасьёсмы но сое туж данъяло, соослэн тыршеменызы удмурт лулчеберетлэн «Мудорвай» вожвылъяськоназ но пыриськиз. Жаляса верано, призо инты ӧз басьты, но со самой пичиез пыриськись вал. «Народы разные — Республика одна» элькун конкурсын нырысетӥ инты басьтӥз. Ми туж данъяськиськом солэн мыло-кыдо сямо луэмезлы но котькуд вожвылъяськонэ кышкатэк пыриськемезлы. Ӵужанаеныз «Марлы тӥяй» удмурт кырӟанэз но сцена вылын быдэстӥзы ини. Быдэс Россиысь видеоконкурсын удмурт дӥськутэн перепечъёсты пыжыса вормисе потӥзы. Пичи ке но, аслэсьтыз сюрессэ али ик каллен-каллен лёге ини. 

Бигер кыл но палэнэ уг кыльы. Машинаен кытчы ке мынӥськом ке, со одно ик пичиослы сӥзем бигер кырӟанъёсты пуктыны косэ. Габдулла Тукайлэсь кык книгаоссэ но куриз. Мультфильмъёсты но кык кылын лэзиськом. 

Ми кузпалэным, кызьы ӟучъёс верало «на берегу», ярдурын ик вераським вал, ог-огмылэсь нацимес ум ултӥялэ шуыса. Азьланяз но ог-огмылэн лулчеберетэнымы, сям-йылолъёсынымы тунсыкъяськомы, соос сярысь нылпиосмылы вераломы, ваньзэ сое ас пример вылын возьматомы. Йӧскалыккуспо семьяын туж толерантной, веранъёсын сак луыны кулэ, малы ке шуоно малпамтэ шорысь йӧскалык ӟечлыкез ултӥяны но быгатӥськом ук. Но одӥгез милемыз сюлмаськытэ — азьланяз нылпиослы шуг сётӥськоз йӧскалык идентификация. Соослы секыт луоз анай-атайзылэсь лулчеберет дуннезэс огкадь быдӟалаен басьтыны, кудӥз ке валтӥсь луыны кулэ. Одӥг кылэз, осконэз, лулчеберетэз бырйизы ке, ми понна со ӝожтӥськон яке куректон уз луы. Валтӥсез — ми азьын возьыт медаз луы, ас сюлэмзыя мед быръёзы.

— Кызьы вормиськоды кыл могӟетъёсты? Кыӵе кылын вазиськиськоды нылъёстылы?

— Милемлы Саматэн кылъёс туж секытэн сётӥсько. Удмурт кылэз со ӧз дышеты, тодэ, мар ке вала, но туж ӧжыт. Нош мон бигер кылын вань адямиосты уг валаськы, куддыр шонертэм валаны но быгатӥсько. Но улон сыӵе: студент дыръя но, уждурын но бигер калык пӧлын вал. Каллен дышисько, троссэ валаны кутскисько, но практика ӧвӧлэн нош ик ваньмыз вуныны кутске. Мон бигер кылэз туж яратӥсько, но соин вераськыны кепырасько. Куке удмурт адями вӧл-вӧл бигер кылын вераське, соку туж вожъяськисько, мыным туж кельше, калык понна данъяськон но будэ.

Мон картэным бигер кылын вераськыны малпасько вал, но со сыӵе «эк-бэк» пӧрмиз но, Самат кыкнамылы ик тупамон ӟуч кылэ выжиз. Соин семьяямы ми ӟуч кылын вераськиськом. Анай-атайёс доры бертӥськом ке, соку ини куд-огзэ берыктоно луиськом.

Нош нылпиосын, котькудмы асьме кылын вераськыны быгатӥськом. Мон соослы удмурт кылын вазиськисько «нылы», «пичи шундые» , «ческыт макее» . Самат соослы мусояса «кызым» («нылы»), «матурым» («чебере мынам»), «кечкенем» («пичик мынам») шуэ. Ми туж шумпотысалмы, нылъёсмы пӧртэм кылъёсты тодысалзы ке, соин куддыр куд-ог веранъёсты асьме кылын но вераськом. 

Асель бигер кылэз вала, малы ке шуоно бигер нылпи садэ ветлэ. Куддыр садикысь бертэ но бигер кылын вераськыны кутске. Со туууж мусо кылӥське, ми укыр шумпотӥськом солы. Но со дыре ик солэн вань валанэз: анаез бигер ӧвӧл, кылэз пумозяз уг тоды, соин куддыр веранъёссэ мыным берыктыны но кутске.

— Кызьы ортчо семьяяды йӧскалык праздникъёс?

— Вань праздникъёсты пусйыны тыршиськом, гуртэ бертӥськом, анай-атайёсты ӟечкыласьком. Акашкае но Семыке одно ик гуртэ бертӥськом. Праздникез радъяны, ӝӧк дасяны юрттыны тыршиськом. Асель Акашкае курегпуз люканы но потылэ. Ми туж яратӥськом та югыт праздникез, сюлмысь возьмаськом сое. 

Бигер праздникъёсты но палэнэ ум кельтӥське, возьмаськом, вашкала сямъёсъя пусйыны тыршиськом. Аселез дышетӥськом: Сабантуй — со батутъёс, ӟечыранъёс но ческыт вата гинэ ӧвӧл, со вашкала шудонъёс, ӵошатсконъёс, кырӟанъёс но эктонъёс. Соин азьло ик ӵошатсконъёсы пыриськиськом, собере гинэ — шулдыръяськонъёсы.

Вань семья йылолъёсты мусульман сямъёсын ортчытӥськом: ним сётон, корка пыронлы Коран лыдӟон, нылпи понна курбон сётон. Курбан-Байрам дыръя табанянь пыжиськом, куддыръя бальыш но пӧраськом. Самат визь кутэ, соин вань йылолъёсты чакласа возьыны тыршиськом. Милям семьяямы кык поллы тросгес праздникъёс, соин шумпотонъёслы мугъёс но тросгес. Та туж умой йылол.

— Йӧскалыккуспо кузпалъяськон кызьы юрттэ огъя мерлыкысь кусыпъёсты умоятыны?

— Туала поколениысь егитъёс вашкалаос сярысь йӧскалыккуспо кузпалъяськонлы небытгес учко кадь ини. Виръёсты сураны уг яра шуэм вужмем догмаос ас кужымзэс каллен ыштыны кутско. Суро кузпалъяськонъёс мерлыкын мыло-кыдо азьланьтӥсько, арысь аре сыӵе паръёс йыло гинэ. Та возьматэ: нациосты пачкатон ӧжытгес луэ. Туннэ нуналэ билингвизм туж асдыръем луэ, трос кылъёсты тодон но данъяське. Соин, ми оскиськом, татын минусъёслэсь тросгес плюсъёсыз.

— Кыӵе сӥзёнъёс, кенешъёс сётыны быгатӥськоды егит семьяослы? 

— Котьку сямен ик, яратон, зэмос яратон. Быръем адямидэ вань тырмымтэосыныз яратоно. Огазе азьпал улон радъяно, огазе льӧль малпанъёсты улонэ пыӵатоно. Зэмзэ вераса, сӥзёнъёс туж трос, но та юанын чурыт но вакчи луоно. Огшоры ӧз гожты ук А.П. Чехов «Краткость — сестра таланта». Ваньзы шудо мед луозы. Пӧртэм сямен, асьсэ сямен, но одно ик шудбуро мед луозы!

— Тау бадӟым, Мила, вераськемед понна. Азьланяз но семьяяды валан, гажан но яратон мед улозы! Оскиськом, кусыпъёсты нуналысь нуналэ юнмалозы, кужмоялозы гинэ шуыса.

Асьмелэн шаермы ӵыдонтэм инкуазен но паймымон интыосын тырмемын. Солэн котькуд люкетаз пӧртэм адямиос уло, асьсэлэн дунлыкъёсынызы, малпанъёсынызы, быронтэм кужым интыосынызы. Со дыре ик улон асьмелы туж бадӟым кузьым сётэ — матысь, оскымон адямиосты. Та ваньмыз кылдытэ нимысьтыз дунне — СЕМЬЯ. Та лушкем дуннеез возьман, утён понна трос гинэ кужым кулэ, но котькуд адями ог-огезлы каньыл мылкыдэн вазиськиз ке, семья но нуналысь нуналэ юнмалоз гинэ! Котькуд семьяын шумпотон понна югдуръёс трос мед луозы!