Ӝоген 2021-тӥ ар вуоз

Каникулъёсы бертыло ӵыжы-выжыос, ӵукнаысен ӝытозь телевизорын возьмато выль ар фильмъёсты, ӝӧк сьӧрын луо пӧртэм ческыт сиён-юонъёс — зэмос праздник котькин понна но. Чебер традицилы пӧрмиз ини праздникъёс вуон азьын лыдӟисьёсмылэсь юалляськон ортчытыны. Туэ но та сяммылэсь ӧм куштӥське. Юанъёсмы таӵеесь вал: кыӵегес соослэн туэ арзы ортчиз, кызьы соос малпало туэзэ арез пумитаны но Ымусьтон праздникез Выль арез кадь ик соос витё-а. Ӵектӥськом тӥледлы лыдӟисьёсмылэсь ответъёссэс.

Михаил Папаев, Ӟаны гурт:

— Зэмзэ верано ке, арес мынэмъя нокыӵе праздник но сокем кулэ ӧвӧл вылэм ини — Выль ар но, Ымусьтон но. Бен, арлы быдэ праздникъёслы семьяе юн дасяське, трос сиёнъёсты дася. Мон но, валамон, ваньзэсын валче ӝӧк сьӧрын пукисько. Но мыным азьло праздникъёс шулдыргес ортчо вал кадь потэ. Уксё луымтэ ке но, ӝӧкмы узыр луымтэ ке но, тыршиськеммы праздникез шулдыр ортчытыны. Пинал дыръя вань гуртысь егитъёсын ӵошен-ӵошен люкаськыса, клубе потӥськомы вал, коркаысен корка шулдыръяськыса но ветлӥськомы вал. Али дырез верано ке, бал-маскарадэ но уг потӥськы ни. Егитъёс азьло сямен ик шулдыръясько, дыр, но мынам но мынам огъёзоосылэн сыӵе шулдыръяськонзы али ӧвӧл, дыр, ини. Ар мон понна капчи ӧз луы, висьыса но улӥ, нош та ар бордын гинэ но ӧвӧл, дыр, тазалык бордын, дыр.

Александра Раимова, Тагашур:

— Выль арез пумитаны мон берто дорам. Пумитало семьяеным ӵош Выль арез но, Ымусьтонэз но. Учко дорам азьло уськытэм фильмъёсты, кудъёссэ возьматозы выль ар шутэтсконъёсы. Дасяломы кенакен ӵош ӝӧк, отын одно ик луыны кулэ «Оливье» салат. Пичи дыръям выль арлэн шӧмыз шӧдӥське вал мукет сямен. Мӧзмисько со дыръёслэсь, куке мон вурытӥсько вал мамаме выль арлы костюм, куке классэным ӵош лэсьтӥськомы вал пӧртэм лымы мунёосты, кабинетмес чеберъяськомы вал, нош собере дэрем бырйыса но причёска лэсьтыса мынӥсько вал Ципья школае Выль ар праздикез ортчытыны, дискотекаын эктыны. Со дыръёс сярысь малпаса, сюлэмам шуныт кылдэ.

Та арын мон кутски улон шоры мукет сямен учкыны, кужмогес луи. Кутски улонэз дунъяны. Туж секыт вал та улонысь келяны ӵыжы-выжыосты. Соин ик выль ар мед ваёз ваньзылы тазалык но шуд. Синкылиос выль арын мед луозы шумпотонлэсь гинэ. Нош мон мед быгатом аслэсьтым малпанъёсме но планъёсме зэматыны.

Зоя Кумаева, Ципья:

— Адями кыӵе гинэ даурын ӧз улы ке но, котьку луэ, дыр, умойгес ортчись аръёс но, уродгес ортчись аръёс но. Бен, туэез ар асьме понна капчи ӧз ортчы шуыны кулэ. Но ӝожтӥськыны муге ӧвӧл, малы ке шуоно, Инмарлы тау, ваньзы матысьёсы, ӵыжы-выжыосы сӧл-таза, та мон понна самой валтӥсез. Соин туэез ар мон понна туж урод вал шуэме уг луы. Вуоно арын асьмеды каньыл но таза улон вите шуыса оскеме потэ. Ӝоген Выль ар но вуоз. Но зэмзэ верано ке, та мон понна туж ик бадӟым праздник ӧвӧл. Ми сое арлы быдэ семьяенымы пусйиськомы ке но, мыным Ымусьтон праздник матынгес потэ. Азьло, егит дыръя, Выль арез туж шулдыр пусйиськомы вал, олокӧня нунал ӵоже праздник ужрадъёс ортчылӥзы, котькудаз пыриськыны тыршимы. Табере нош сыӵе праздникъёслэсь ас поннам кулэлыксэ уг адӟиськы, лэся, ни. Но со шоры учкытэк, вань кадь «Азьлане» газетэз лыдӟисьёсты матынъяськись Выль ар праздникен но Ымусьтонэн ӟечкыламе потэ. Кайгу-куректонъёс юрттэс палэнтӥ мед ортчозы, таза но шудо луэ!

Пётр но Мария Черновъёс, Ципья:

— Туэез ар туж урод ортчиз шуэммы уг луы. Ваньмыз каньыл вал кадь. Ми, Инмарлы тау, сӧл-таза, ужаса ум ветлӥське ини ке но, каллен-каллен юртын со но та ужъёсты быдэсъяськом, магазинэ потаськомы. Нылпиосмы доры кальёссэс тодыса ветлӥськомы, соос но ми доры вуыло. Тужгес шумпотымон, внукъёсмы но вуыло шуыса. Мазэ ватонэз, коронавирус милемыз гинэ ӧвӧл, котькинэ кышкатӥз, дыр. Врачъёслэсь, кивалтэтлэсь косэм утиськонъя куронъёссэс быдэстӥмы: маскаосты нуллӥмы, ураме трос ӧм поталэ, ӵыжы-выжыосын но тодмоосын телефонтӥ гинэ кусып возимы. «Возьмаськемез Инмар уте» шуо ук. Инмарлы тау, секыт висёнъёс ми доры ӧз вуылэ, палэнтӥ ортчизы. Азьпалан но озьы мед луоз. Ми кыкнамы но ужысь ветеранъёс, милемлы мар кулэ на? Улонын но семьяын каньыллык, нылпиосмы но внукъёсмы медаз висе, матысьёсмы, ӵыжы-выжыосмы сӧл-таза луизы ке, кусып возьыны быгатӥмы ке, асьмеды шудо адямиос шуэммы луэ. Выль ар праздникез ми арлы быдэ пумитаськомы, тросаз учыре семьяен люкаськыса, дорамы. Азьло выль ар азьын клубын ортчись шулдыръяськон ужрадъёсы но мыло-кыдо пыриськиськомы вал, туэ потыны уз луы ни. Ваньдэсты матынъяськись праздникен ӟечкыласькомы!

Лариса Михайлова,

Покчи Лӧзя:

— Ваньмы сӧл-таза, Инмарлы тау, соин та арез урод шуыса вераны сьӧлык луоз. Пӧртэм кылдэм шуг-секытъёс шоры, висёнъёс шоры учкытэк, улонамы ваньмыз умой. Туэ арын вань кадь малпанъёсы ӧз быдэсме ке но, оскисько, вуоно арын быдэсмозы шуыса. Выль ар мон понна — со семья праздник. Арлы быдэ шуымон та праздникез ми семьяен пусйиськомы. Ымусьтон праздникез но пусйытэк ум кельтӥське, но ӵемысь сое черкын ортчытӥськомы.

Галина Евдокимова,

Пор-Кутеш:

— Зэмзэ верано ке, таиз ар, мукет аръёсын ӵошатыса, секытгес луиз. Кышкытгес но вал со. Семьяын ваньмыз умой, кык песяйёсмы вань, нылпиос, кузпалы, ваньмы туннэ нуналэ сӧл-таза. Нош тани уж ласянь верано ке, шуг-секытъёсты адӟыны тупаз. Мон дышетӥсь луыса ужасько бере, нылпиосты (нялтас вераса, кылем дышетскон арын соос нырысетӥ классын вал) кусып возьыса, дистанционно дышетоно луиз. Соин капчи ӧз луы шуэме потэ. Но та арын умой моментъёс но вал. Бадӟымез пие Виталий ёросын ортчись олимпиадаосын кӧня ке предметъёсъя нырысетӥ луыса, республикаын ортчоно олимпиадаосы дасяське. Покчиез пие Филипп ГТО значокъёсты вае. Анай-атай понна нылпиослэн вормонъёссы туж бадӟым шумпотон ук. Соин умоез но, умойтэмез но вал шуыны кулэ. Котькуд арын но озьы луэ, дыр, со. Выль арез семьяен пусйиськомы. Нош семьямы милям бадӟым. Куддыръя мынам апайёсы куное вуо, куддыръя кузпаллэн агаез. Озьы ик Ымусьтонэз но пусйытэк ум кельтӥське, малы ке шуоно со но туж бадӟым праздник. Пыжиськиськомы, ӝӧк дасяськомы. 

Людмила Тихонова,

Сала Кушкет:

— Выль ар мон понна — со бадӟым семейной праздник. Выль ар — улонэз выль бамысен кутскон, вань кадь малпанъёслэн быдэсмоно дырзы, выль ӟеч иворъёслэн вуоно дырзы луоз шуыса оскисько. Вуоно арлы пӧртэм планъёсы, малпанъёсы вань, соос но каллен улонэ пыӵалозы шуыса оскеме потэ. Туэез ар мон понна шоретӥ луиз, малы ке шуоно ӧсам йыгаськизы ӟеч иворъёс но, кайгу-куректонъёс но луизы. Шаерамы тужгес кышкыт югдур кылдӥз коронавирусэн сэрен. Со висён асьмеды палэнтӥ мед ортчоз. Со сярысь малпаськытэк, туэзэ Выль ар праздникез ӟечен пумитаны мед кылдоз. Ымусьтон но мон понна туж бадӟым, паймымон чебер праздник, со Бадӟым Инмарлэн вордскем нуналэз ук. Со праздникез но пусйытэк кельтэммы ӧвӧл. Арлы быдэ шуымон пыжиськыса, тыр ӝӧкъёс дасяса сое пумитаськомы. Ваньдэсты вуоно Выль арен но Ымусьтон праздникен ӟечкыласько.  Ваньзэ-ваньзэ умойзэ тӥледлы!

Фото: https://pixabay.com