Ӵошен шулдыръяськон

Таяз арын но улонды шумпотонъёсын узыр мед луоз, оскымон, кельышлы адямиос гинэ котырады мед луозы, мултэс, кулэтэм сюлмаськонъёс палэнэ мед кылёзы. Шудбур, тазалык но яратон тӥледын котьку артэ мед вамышъялозы.

Вылӥын верам праздникъёсты берло аръёсы котькуд гуртын туж шулдыр но тунсыко карыса ортчытыны кутскизы. 18-ысен 19 толшоре выжон уйе тросэз калык черке ветлэ, вуын пылаське. Милям Турья гуртамы но тросэз калык уйин 12 часэ ошмес дуре люкаське. Кудӥз кезьыт вуэн пылаське, кудӥз ымнырзэ гинэ миське, кизэ-пыдзэ. Ваньзы доразы ошмес ву нуыса берто, сое ар ӵоже возё. Нуназе котькуд коркан табанянь, кутэмнянь, перепеч пыжо, бускель гуртъёсы, Малмыже пыласькыны мыно. 18-тӥ числое Вукогуртын улӥсь апае жингыртӥз. Милям гуртамы ӵуказе гурезьысен нискыланы, пе, лыктэ. Ӝук но, чай но луоз, шуиз. Ми туэ номыр но но ум кариське, лэся, вераськись ӧвӧл, гурезь но ӧм лэсьтэ, шуисько. Мыном шуыса обещать кари. (Азьло аръёсы гурт шорамы гурезь но лэсьтӥськом вал, люкаськыса нискыласьком, шулдыръяськиськом вал). Ӝытазе час ньыль бере ивор вӧлмиз, выллапалъёс нискыланы гурезь лэсьтӥллям, отчы тубоме. Вукогуртэ мынон вунӥз, асьме гуртын ик нискылаломы шуыса, семейной кенеш кутӥм. Час куать котырын гурт кутсконын муш палэпын кадь гуж каре вал ини: самовар гужла, буржуйка гур вылын плов пӧзе, мангалын табань пыже... Ваньзэ тае малпаллям бускель егит семьяос: Никифоровъёс но Максимовъёс сӥль, Филипповъёс кеньыр поттӥллям, Коняевъёс табанянь дасяллям. Пловез туж ческыт карыса Никифоров Сергей пӧзьтӥз, узбекъёслэн сярысь ческытгес вал, табанянен но ческыт турыно чаен куноязы Коняева Елена но Корнилова Люся. Озьы тани малпамтэ, витьымтэ шорысь выллапалъёс быдэс гуртлы сюрприз каризы, «чипыен-куреген» шулдыръяськонэ люказы. Гуртоос но сьӧразы ваньзы саламен лыктӥзы. Бер ӝытозь шулдыръяськиз Турья калык: дышетскись пиналъёс футболэн но шудӥзы. Гурезьын но нискыламы, мызганэн но юмшамы, гурезьбам шудонъёсты но тодэ вайимы, пӧртмаськыны но вуизы. Праздникез организовать карисьёслы вань гурт калыклэн нимыныз туж бадӟым тау карисько. Вуоно аре эстафетаез улӥегес выжтомы, та йылолэз ум быдтэ, шуимы.

Рима Исьмекова.

Фото: автор