Ожгар данъетъёсты юнме уг сёто (фото)

Атаймузъемез утисен лыдъяны луэ ваньзэсты, кин яратоно гуртсэ, вордскем музъемзэ ултӥяны уз сёты, кинлэн улонэз но ужез герӟаськемын шаермылэн шудо-буро но тынӥсь улонэз сярысь сюлмаськонэн. Но котьма ке но, нырысь ик со ожгарчиослэн, арми но «пӧсь» интыос пыр потэм адямиослэн нуналзы.
Кемалась ӧвӧл шумпотон ивор тодмо луиз: аспалмы Сидоров Артём Юрьевич «За отвагу» медален пусйиськем но соин сое огдырлы гуртаз но лэзиллям. Зэмзэ но, 17-тӥ тулыспалэ со вордскем палъёсаз бертӥз но мыным соин пумиськыса вераськыны учыр кемдӥз.
Артём Юрьевич вордске Бадӟым Лӧзя гуртлэн 1-тӥ люкетаз 16-тӥ тулыспалэ 1989-тӥ арын Светлана но Юрий Сидоровъёслэн семьяязы. Артём нырысетӥ нылпи луэ.  Тодон-валан басьтэ Покчи Лӧзя шоръёзо школаын. Быдэ вуыса, Россиысь армилэн радъёсаз басьтӥське, службаез солэн Краснодарской шаерысь Крымск городын ВВС-лэн охраная ротаяз ортче.
«Мобилизовать каризы монэ 27-тӥ куартолэзе ёросысь военкоматысен. Нырысь Казаньын одӥг толэзь ӵоже дышетсконъёсты ортчимы, собере СВО ортчон интыосы келязы», — тодаз вае мобилизацие шедемез сярысь рядовой Артём Сидоров. Артёмен ӵош одӥг интыын Сосна но Нурма гуртъёсысь аспалъёсмы но вань вылэм.
Медален пусйиськемез сярысь юаку, воргорон вакчияк гинэ валэктӥз: «За отвагу» медаль тушмонлэсь квадрокоптерзэ ыбыса уськытэм понна сётӥзы».
Гуманитарной юрттэт сярысь но юатэк кельтыны ӧй быгаты.
«Ми дорозь вуэ. Сиён-юон ласянь но ваньмыз умой. Тужгес кулэ арбериос отын туннэ — квадрокоптеръёс но уйин адӟон приборъёс», — шуэ Артём.
Воргорон трос ӧз вераськы. Ма, валамон но: кинлэн потоз та шугадӟон сярысь верамез. Собере мултэс вераськон сямыз но ӧвӧл, удмуртъёслы тупась возьдаськон сямыз но, оло, ассэ шӧдытэ, дыр. Эшшо та нуналэ аслаз дышетскем школаяз — Покчи Лӧзя шоръёзо школаын — ортчытэм пумиськонэ но пыриськиз.
Зэм, ожгар данъетъёсты юнме уг сёто. Артём но аслаз дӥсьтӥсь но кышкыт югдурын шаплы луэменыз кӧня муртлэсь улонзэ утьыны быгатӥз. Та ачиз — сӥ но дан! Тау тыныд, ожгарчи!