Ожысь пиослы юрттон – пайдаё уж

Концертэ Шишинер, Бурнак, Янгул гурт поселениос пыриськизы. Кызьы со ортчиз но кинъёс татчы лыктӥзы?

Концертэз радъяны кичӧлтон сётӥзы Бурнак гурт поселенилэн главаез Шамиль Хабибуллин, Шишинер гурт поселенилэн главаез Рафиль Салихзянов но Янгул гурт поселенилэн главаез Рамиль Гильфанов. Соослы юрттэт сётӥзы Ура, Карек-Серма, Вуж Турья, Бурнак, Янгул но Вуж Кушкет гуртъёсысь лулчеберет удысысь ужасьёс. Огъя кужымен соос концерт гинэ ӧз радъялэ, матысь дыре гуманитар юрттэт нуисьёслы (со шуркынмон толэзьлэн шораз витиське — Ю.Щ.) эшшо но бадӟым юрттэт каризы. Табере вылӥын пусъем поселениосысь ожгарчиослы кулэ луись эмъюм, шуныт дӥськут басьтозы но адресъя вуттозы.

Нимысьтыз ожгар операци туннэ нуналэ туж валтӥсь но кылкутымон тема. Куазь кезьыт луэмен, секыт условиосы вуэм ожгарчиосмылы эшшо но тросгес гуманитар юрттэт люкано луэ. Та ужъёс ёросамы туж чырмыт мыно, выльысь но выльысь юрттон пунктъёс кылдо, гуртъёсын но калык мыло-кыдо люкаське, мерлыко сетьёсын пӧртэм группаос кылдытэмын — со ваньмыз пиосмылы юрттон, Вормонэз матэктон понна.

Макем бервыло луоз юрттон уж, сокем ӝоггес пиосмы берытскозы вордскем палъёсамы, йылпумъяськозы келяськон митингъёс, уз кисьтӥське ни курыт синкылиос.

Ӟечлэсьтонлы сӥзем ужъёс — адямилыкез но лякыт сямез возьматӥсь ужрадъёс. Соос огазеяло, умойгес каро но вуоноезлы оскон кылдыто. Бурнак гуртысь лулчеберетъя юртын ортчем концерт сярысь ке верано... Нырысь ик пырем бере, лулчеберет юртлэн холлаз аспӧртэмлыко адӟытонэз синйылтыны луэ вал. Сое Янгул гуртысь гуманитарной юрттэт люкан пунктысь но Ура гуртысь азьветлӥсьёс радъязы. Татын маскировочной сетьёсты керттон понна пӧртэм пумо лентаос но соосты лэсьтон понна инъет. Озьы ик лэсьтыны кутскем блиндажной сюсьтылъёс но чай дасян понна люкам турын-куаръёс но пӧртэм шыдъёс. Татын ваньзэ пыр-поч валэктӥз Ляйля Габдулхакова — Янгул гуртысь одӥгез азьветлӥсь волонтёр:

— Та адӟытонэн милям возьматэммы потэ вал, кызьы пиосмылы дорын но юрттыны луэ, макем та уж кулэ шуыса. Котькуд адями ваньмон дыръяз мар ке пайдаёзэ лэсьтыны быгатэ, али юртъер котырысь ужъёс кулэсмемын, ваньмон дырмы но тросгес луэ, соин одӥг-кык частэ ӟеч ужлы сӥзид ке, аслад но сюлэмыд шумпотонэн тырмоз. Котькуд адями тае мед валасал но волонтёр уж борды эшшо но тросгес адями мед басьтӥськысал, но жаляса верано луэ, тросэз уг валало. «Соос миллионъёс басьто», «Сомында юрттэт кытчы мыноз», «Ми лэсьтом — отын вузалозы» — таӵе веранъёс ӵемысь кылӥськыны кутскизы адямиос пӧлын. Та туж шонертэм но сюлэмтэм веранъёс: ожгарчиос Инмарен сётэм улонзэс асьме чагыр инбаммы но яркыт шундымы понна сёто, соослэн семьяоссы нуналысь нуналэ сюлмаськыса уло, пиналъёс атайёстэк будо, нылкышноос кузпалъёссытэк нуналъёссэс ортчыто, нош асьмеос шуныт коркаосамы улӥськом. Тынад шудбуред — со кыӵе ке нылпилэн атаезлэсь мӧзмонэз, со кыӵе ке нылкышнолэн уйёсы кисьтэм синкылиосыз, со кыӵе ке анайлэн уен-нуналэн чигиськись сюлэмез. Концертэ лыктэмъёс тае умой валало вал, соос та ӝытэ малпаськись ымныръёсын, мур малпанъёсын тырмыса кошкизы.

Концерт зэмзэ но мур пуштросо пӧрмиз. Кырӟанъёс, эктонъёс, кылбуръёс, сценкаос — ваньмыз калыклы кельшымон луизы. Куинь час пала кыстӥськись концерт 72 400 сюрс манет коньдон люказ. Татчы аслэсьтыз шӧдскымон люкетсэ пыртӥз «Яна тормыш» (кивалтӥсез — Раниль Габдрахманов) возёс. Со 10 000 манет сётӥз.

Концерт йылпумъяськыку, нимысьтыз видеоролик но возьматэмын вал. Татын пусйиськизы гурт поселениосысь нимысьтыз ожгар операцие пыриськисьёс. Секытэн йӧтӥз учкыны соосты, кинъёс улонзэс сётӥзы шимес ожмаськонын но ноку уз берытске ни вордскем юртазы. Быдэс зал синкылиен учкиз тае. Соос котьку сюлэмъёсамы улозы, соослэн батырлыксы ноку уз вуны! Соосты буре вайыса, вань учкисьёс султӥзы но одӥг минут чус сылӥзы. Та секундъёс концертлы эшшо но мур, кулэлыко пуштрос пыртӥзы, дыр.

Таӵе ужрадъёсты нокинлы саклыктэк кельтоно ӧвӧл. Кӧня гинэ асьмеос ум вералэ кышкыт но шимес вакыт сярысь, та даурез лэсьто сыӵе ик адямиос. Оло, ӵошен одӥг малпанэ вуыса, дуннеямы мар ке воштӥськыны быгатоз! Огазе луыса гинэ, асьмеос зэмзэ ик Вормонэ вуыны быгатомы.

— Кык ар — со трос вакыт ӧвӧл. Со кык ар ӵоже быдэс шаермылэн, республикамылэн, ёросмылэн огшоры улонэз воштӥськонъёс пыр потӥз. Нырысь ик ваньмыз COVID бордысен кутскиз, соку тазалыкмес юн эскероно луим, табере тани нимысьтыз ожгар операци. Трос гинэ данъяськымон воргоронъёсмы кошкемын. 85 ар талэсь азьло кылдэм «Ваньмыз фронт понна, ваньмыз Вормон понна!» лозунг туннэ нуналлы но асдыръем луиз. Ӟеч мылкыдо калыклэн огазе луэмез, тыршемез но воргоронъёсмылэн батырлыксы нырысетӥ интые потэ. Татын туннэ батыръёсмылэн ӵыжы-выжыоссы но, анай-атайёссы но. Тӥледлы бадӟым тау шуисько сыӵе батырлыко пиосты будэтэмды понна. Озьы ик волонтёръёслы но тау кылъёсты вуттэме потэ, соос куддыр изьытэк но сюрес вылэ пото, курем арбериосты ӝог вуттыны тыршо. Татчы ик ватсаме потэ лыктэм гурт калыкез, интыысь кивалтӥсьёсты, кудъёсыз дырзэс но коньдонзэс жалятэк вуизы туннэ радъям ужрадэ. Вормонлэн но ожлэн ӧвӧл йӧскалыкез, огазе луыса гинэ вань секытъёсты вормыны луэ. Огазе луон али туж кулэ асьмелы! — таӵе кылъёсын кутскиз ужрадэз Балтась ёрослэн исполнительной комитетэзлэн кивалтӥсезлэн воштӥсез Ильгам Гайнутдинов.
Та интыын вераны кулэ, тросэз калык ялэм 300 манет гинэ ӧз вайы, тросэз 500 манетэн лыктӥз, со понна туж бадӟым тау шуо радъясьёс, пиосмылы шӧдскымон юрттэт.

Тау ваньдылы, кин аслэсьтыз люкетсэ пыртӥз та ужрадэ! Кужымды ӟеч но шонер ужлы гинэ сӥземын мед луоз, нош солэн бервылъёсыз сяськаяськись улонэ мед вуттозы. Ӵошен луоме! Ӵошен матэктоме сайкыт но тынӥсь улон дыръёсмес!