Парамановъёс: «Яра али нылпиосмы вань»

Улын Ушма гуртын улӥсь Виктор Параманов бускель гуртысьтыз гинэ, Вылын Ушма гуртысь, кышно вае. Нина, Казаньысь училищеез йылпумъяса ӧнерезъя швея-вышивальщица луэ ке но, Улын Ушмаысь клубе техничка луыса ужаны интыяське. Кӧня ке дыр ортчыса (тыршыса ужамзэ адӟо ук) егит Нинаез клублэн заведующиезлы тодмосто.

— Нырысь клубын ужай, собере фермаын скал кыскись луыса тырши, али нош кык ар ӵоже ини почта ёзэсын ужасько, — шуэ Нинапай. — Тыршид ке, котькыӵе ужез но быдэстыны луэ.

Гуртын вордскыса будэм адями, зэмзэ но, нокыӵе ужлэсь уг кышка. Соин, дыр, Парамановъёс туннэ нуналэ туж трос пудо вордо — скалзы гинэ 10 йыр! Со сяна парсьёссы, ошъёссы, кунянъёссы вань... «2009-тӥ арысен кутскыса пудоосты трос вордыны кутскимы, (крестьянско-фермерское хозяйство) гуртын со бадӟым юрттэт луэ, — шуэ Нинапай. Секыт ке но, семьямы, нылпиосмы понна тыршиськомы».

Ньыль нылпи будэтӥсь семьялы пудо вордон, зэмзэ но, бадӟым юрттэт сётэ, дыр. Бадӟымез нылзы, Юлия, 1997-тӥ арын вордске. Туннэ нуналэ со КФУ-ын дышетӥсьлы дышетске. Пиоссы — кыктоос Владислав но Валерий — вордскемын 2000-тӥ арын. Пиос туэ гинэ школаез йылпумъязы, кӧня ке нунал талэсь азьло армие служить карыны но кошкизы ни. Анайзы верамъя, пиос нокытчы дышетскыны пырыны малпамтэзы — сразу армие мыноно кариллям.

— Мон малпасько, соослэн ӧжыт ужлэсь шутэтскемзы потэм, дыр, — серекъя пиослэн анайзы. — Яра али скал кыскон аппарат вань — таиз уж мон вылын. Куддыръя кузпалэ но юрттылэ — мыным ӝыт но ужаны тупалля. Но пиосмылы трос ужаны тупаз, пудоез но асьсэос утизы. Сомында пудоез вордыны пиосмытэк ӧй луысал, дыр. Соослы секыт йӧтӥз ни. Умой гинэ служить карыса мед бертозы, армиын азьло дыръёсы кадь кышкыт ӧвӧл ни шуо, соиз шумпоттэ, — шуэ анайзы. 

Парамановъёслэн нош одӥг пизы будэ — Паша, со 2014-тӥ арын вордскем. Павликлы али ньыль арес гинэ, но анай-атаез оско, покчи пизы но, агайёсыз кадь ик, семьялэн юрттӥсез луоз шуыса.

Ваньмыз ласянь ушъямон нылкышноез, ньыль нылпиослэсь анайзэ уж дораз но туж ярато (Нинапай туннэ нуалэ почтаын ужа). Адямиосын кыл шедьтыны быгатӥсь, ужзэ валаса быдэстӥсь почтальонэз туэ но азинлыко ужамез понна почтальонъёслэн праздниксы дыръя кузьымен но пусйиллям. 

Нинапай почта ёзэсын али кык ар гинэ ужа ке но, адямиос со борды дышиллям ни. Почтальон Улын, Шор но Вылын Ушма гуртъёсын ужа.  Пенси, пособиос сётъян, газет-журналъёсты нуллон, коммунальной тыронъёслы кагазъёс сётъян — та ваньмыз Нина Фёдоровналэн ужпумъёсыз. Со сяна,  луэмезъя пӧртэм вузъёсты но вузано.

— Уже аслым туж кельше, малы ке шуоно шутэтскон нуналъёсмы вань — дорысь ужъёсты но ужаны дыр луэ. Планме но котьку тырмытыны тыршисько, — шуэ нылкышно.

«Нош, кыӵе ке но яратоно ужды, хоббиды вань-а?» шуэм юанме сётыса но ӧй вутты, валэктонзэ но басьтӥ: «Вань кадь ужъёсты ужаса дорамы пыреммы бере ини кытчы пуксим, отын ик изиськом».

Яра али Нинапайлэн анаез, Лидия Михайловна Добромыслова, 80 арессэ ортчем ке но ни, быгатэмезъя юрттылэ.

Таӵе семьяен тодматскон — ачиз бадӟым шумпотон. Бадӟым, эшлыко, ог-огзылы юрттӥсь луэменызы соос синмаськымон луо. Трос нылпиосты вордон, соос понна улон — та соослэн самой валтӥсь ужпумзы но самой бадӟым шумпотонзы. Со котьку но озьы мед луоз.