«Пенсие потытозям но пудо дорын вал»

Ӟаны гуртысь Мамыкова Марфа Кузьминичналы 16-тӥ пӧсьтолэзе 90 арес тырмиз. Дышем сямъя, юбиляръёсты ёросысь но интыысь кивалтэт ӟечкыланы вуэ.

Таяз учыре кышномуртэз вордскем нуналэныз Балтась районысь главалэн воштӥсез Наиль Сабирзянов, ёросысь социальной дурбасьтонъя ёзэтлэн кивалтӥсез Алсу Гатиятуллина, Шор Кушкет гурт поселенилэн главаез Юрий Перфилов, «Дуслык» обществолэн кивалтӥсез Николай Колоколов ӟечкыланы вуизы.  90 аресъем юбилееныз ӟечкыласа, Марфа Кузьминичналы РФ-лэн Президентэзлэсь ӟечкылан открытказэ, район главалэсь Таукарон гожтэтсэ сётӥзы, трос кузьымъёсын шумпоттӥзы, ӟеч мылкыд каронъёссэс вуттӥзы.

«Тӥ кадь мӧйыос — туала поколение понна зэмос пример. Улонды капчиен ӧз сётскы ке но, шуг-секытъёсты чидаса, азьпалэзлы оскыса улӥды. Трос нылпиосты будэтӥды, гумырды ӵоже уно кужым поныса ужады. Ваньмыз понна бадӟым тау Тӥледлы. Азьпал улонды юртты кадь шуныт но югыт мед луоз», — шуиз Наиль Нургаязович.

Марфа Кузьминична вордскем 1931-тӥ арын Пор-Кутеш гуртын. Секыт сютэм аръёс сярысь вераськыны туж ик уг яраты ке но, со дыръёсты песянай котьку тодаз возе, нылпиосызлы со сярысь маде вылэм. Милемлы но курадӟыса улэмез сярысь ӧжытак вераз.

— Жугиськон кутскыку, мыным дас арес вал. Секыт аръёс вал со… Куддыр Новая Гора гуртозь нуналаз кык пол ветлылӥ нянь кураса. Озьы ветлӥсьёс ӧжыт ӧй вал. Кин ке ӧз ветлы, ултӥяськемзы потымтэысь меда, уг тодӥськы. Нош мон ветлӥ — сием потэ вал ведь… Огпол, али кадь тодӥсько, гуртысь берен берыктыса лэзизы, тон туннэ няньлы лыктӥд ини шуыса… Сыӵе тӥни аръёс вал со.

Марфа Кузьминична секыт улонэз адӟем ке но, школаын 10 классэз дышетскыны быгатэм. Школаез йылпумъяса, гуртысьтыз фермаяз ужаны интыяськем.

— Гумырам фермаын ужай. Секыт ужлэсь ӧй кышка, та сярысь данъяськыса вераны быгатӥсько. Пенсие потытозям но пудо дорын вал. Улон капчиен ноку но ӧз сётскы, мазэ веранэз. Но туннэ нуналлы Инмарлы тау шуыса улӥсько. Нылпиосы, внукъёсы, правнукъёсы вань, юртэ чылкыт, монэ учко, утё, нош мар кулэ на зэмос шумпотон понна? — шуэ юбиляр.

Марфа Кузьминична кема аръёс ӵоже Ӟаны гуртысь фермаын Михаил Папаевлэн кивалтэмез улсын ужам. Михаил агай но, юбилееныз валче, Марфа Кузьминичнаез ӟечкыланы вуиз. Ужам аръёсыз сярысь со но вераз:

— Олокӧня аръёс ӵоже Марфа Кузьминична гуртысь фермаын ужаз. Мон соку фермаен кивалтӥ. Марфа Кузьминична пудо сюдон цехын тыршиз. Уж секыт вал, ваньзэ ведь киын быдэстоно луиз. Тыршись, ужась, пал но кыл верасьтэм Марфа Мамыкова котькыӵе уж борды басьтӥськиз, ӧз кышка, секыт шуыса но ӧз ӝожтӥськы. Со сыӵе адямиос пӧлысь, кудъёсыз сярысь верало «трос ужа, ӧжыт вераське» шуыса. Соос куинь эшъёс вал — Ермакова Рая, Мамыкова Елизавета но Мамыкова Марфа. Котьку ог-огзылы юрттыса, эшлыко ужазы. Ужын но, доразы но — котьку ӵош вал соос. Вылаз ик ваньзы одӥг урамын улӥзы. Ма, вал шуыса вераны туж шонер но уз луы — соос туннэ нуналэ но кусыпсэс уг ышто.

Марфа Кузьминична туннэ нуналэ Лев пиезлэн семьяеныз ӵош улэ. Нылкышнолы пиез туж умой подход шедьтыны быгатэ вылэм, ачиз но со пиез борды кыстӥське. Та сярысь юбиляр песянайлэн ӵыжы-выжыосыз но веразы. Кенэз но, Людмила, анайзызэ туж умой уте. Школаын ужа бере, буш дырыз солэн ӧжыт, ужез дораз но бертэ. Соин анайзэ учкыны тросгес Лев Николаевичлы тупа. Марфа Кузьминична доры нылпиосыз, внукъёсыз ӵемысь куное бертыса уло. Туннэ нуналэ эшъёсыз но вань али, соос но юбиляр сярысь уг вунэто. Тани юбилееныз сое ӟечкыланы нылпиосыз, внукъёсыз куное бертӥллям, эшъёсыз но ӵыжы-выжыосыз люкаськиллям вал. Марфа Кузьминична — узыр анай но песянай. Солэн 8 нылпиез сяна, туннэ нуналэ 13 внукез но 15 правнукез вань ини.

— Инмарлы тау карыса улыны быгатӥз ке, адями шудо. Мон асме шудо адями шуыса вераны быгатӥсько. Нылпиосы пӧртэм интыосы улыны интыяськизы ке но, мон сярысь ноку но уг вунэто. Вить ар ӵоже Ижкарын нылы дорын но улӥськем вал, со но монэ гажаса утиз, возьмаз. Табере тани татын, гуртын улӥсько. Кузпалэ, Николай Петрович, куамын ар талэсь азьло кулӥз ини, но нылпиосы оген кылемме шӧдыны но мӧзмон мылкыдъёсын улыны уг сёто. Ваньмыз понна тау соослы, — шумпотэ Марфа Кузьминична.