Покчи Лӧзя школалэн геройёсыз

Кемалась ӧвӧл редакцие таӵе гожтэт вуиз.

«Ми, Гондыргуртын улӥсь куинь пересьёс, тӥледлы вазиськиськом! Милям тау кареммы потэ Малые Лызи школаын дышетскись нылпиослы. Тани соос: Васильев Даниил, Иванов Максим, Борисов Кирилл, Иванов Иван но Ефремова Алина. Милям асьмелэн секыт ужаны кужыммы ӧвӧл ни, соос ми доры лыктыса юрттыса кошко, лымы куяло, ву ваё, жуг-жагъёсты октыло. Ми туж шумпотӥськом милемлы юрттэмзылы, милемыз утемзылы. Милям пумтэм тау кареммы потэ соослэн чырткем но юрттыны быгатэмзылы. Азьпалан улоназы но сыӵе ик чырткемесь, быгатӥсь, анай-атайёсызлэсь, дышетӥсьёслэсь кылзӥськись луыса мед будозы, пиос армиын служить карыны дышетскыса мед будозы.

Саламен тӥ доры Александра, Ольга но Александр Ефремовъёс». (Редакцилэн тупатонъёсызтэк сётӥське — ред.).

Валады, дыр, ини, статья сӥземын луоз волонтёр ужен вырись школьникъёслы.

Малпаськид ке, дышетскисьёслэн туннэ нуналэ валтӥсь «ужзы» — со азьпалан улонын умой интыяськон, улонын ассэс шедьтон понна школаын умой дышетскон гинэ луыны кулэ кадь. Ма, со сяна вань на юртъер котырын анай-атайёссылы юрттон выллем чыры-пыры ужъёс. Но та ужъёс пӧлы нокызьы но ас кожазы улӥсь мӧйыосты утён, соослы ваньмыз ласянь юрттон уг пыры кадь. Таӵе ужъёсты быдэстон понна анай-атайлэн тышкаськыса косэмез но, дышетӥсьёслэн куремзы но кулэ ӧвӧл — бадӟым, жалясь сюлэм гинэ мед луоз...

Сыӵе бадӟым сюлэмо нылпиос Покчи Лӧзя школаын вань вылэм.

...Покчи Лӧзя школа дасо аръёсын ини тодмо луэ аслаз трос мыло-кыдо тыршись, ужась школьникъёсыныз — волонтёръёсыныз. Азьло, совето дыре, со «тимуровской движение» шуыса нимаськем, али — волонтёрской. Но кыӵе гинэ со движенилэн нимыз ӧз луы, ужпумзы соослэн одӥг — огназы кылем арлыдо адямиослы юрттон.

— Милям волонтёрской движенилэн ноку но быремез ӧй вал, шуыны луэ. Пионеръёслэн вакытсы йылпумъяськем дырысен ик. Соку но волонтёр отрядъёс вал, али но со озьы ик, — шуэ Тамара Валентиновна Плотникова, Покчи Лӧзя школаысь визьнодан ужпумъёсъя директорлэн воштӥсез.

Зэмзэ но. Тани туннэ нуналэ но школаын ужа «Горящие сердца» нимаськись волонтёръёслэн движенизы. Та движенилэн рамкаосаз ужзэс быдэсъяло куать отрядъёс (классъёс), соос юртто мӧйыослы юртъер котыразы. Котькудӥзлэн аслаз кивалтӥсез (класслэн кивалтӥсез) вань, соослы тодмостэмын песяй-бабайёс. Волонтёръёс луо пӧртэм классъёсысь нылъёс но пиос (тужгес но 5-8-тӥ классъёсын дышетскись школьникъёс). Песяй-бабайёс пӧлын ас кожазы улӥсьёсыз но, семьяен улӥсьёсыз но вань. Кылсярысь, куд-ог пересьёслэн нылпиоссы, ас семьяоссэс кылдытыса, кыдёке улыны кошкиллям. Сыӵе учыре мӧйыослы нылпиослэн юрттэтсытэк нокызьы но уг луы.

— Нылпиос туж шумпотыса ветло мӧйыослы юрттыны, — мылкыдъёссэ вуттэ Галина Денисовна Петрова, Покчи Лӧзя школаысь педагог-организатор, «Горящие сердца» движенилэн кивалтӥсез. — Одӥг праздникез но кельтытэк — Мӧйыослэн нуналзы, Вордскем нунал кадь бадӟым праздникъёсы — пересьёсты ӟечкыланы ветло, открыткаос кузьмало. Мӧйыослы шумпотон понна трос кулэ-а. Соос, конечно, верало «Эн ветлэ ни, нылъёс-пиос, шутэтске» шуыса, нош нылпиос вуизы ке, асьсэос макем шумпото. Вераськыса пукыны гинэ но адями кулэ ведь соослы.

Зэмлык понна вераны кулэ, нылпиос праздникъёс дыръя гинэ ӧвӧл, огшоры нуналъёсы но арлыдоос доры ветлыны тыршо. Ӵемысь соос лымы сузяло, пул путкаръяса, поленницае радъяса тыро, юртазы утялско вылэм... Та сярысь дышетӥсьёссы мадизы. Нош асьсэос востэм нылпиос ӟеч ужъёсты лэсьто ке но, соос сярысь ушъяськыса уг верало. (Оло, удмурт сямзы шӧдӥське?..)

Дышетскон процесслы нылпиослэн юрттэмзы номырин уг люкеты-а шуыса юанлы школалэн директорез, Эмиль Наилевич Гарипов, таӵе валэктон сётӥз: «Нылпиос арлыдоослы юрттыны дышетсконлэсь ваньмон дыразы гинэ ветло. Шутэтскон нуналъёсы, каникулъёс дыръя яке ӝыт, урокъёс бере. Куддыръя классной час занятиос ортчыку ветлыло. Соин но дышетсконзылы нокыӵе изъян но уг луы», — оскытӥз со.

Шумпотыса верано, волонтёр движение Россиын туннэ нуналэ модаын. Доброволец луон — со аспӧртэмлыко тренд. Но Покчи Лӧзя школалэн геройёсыз мода сьӧры уг уйисько, оло, 5-6-тӥ классын дышетскисьёс «тренд» шуэм кыллэсь валэктонзэ но уг тодо, дыр, али... Соосты чӧлто яратон, гажан, жалян мылкыдъёс. Тау ӟеч уждылы, геройёс!