«БиГерд» форумын егитъёсты сюдӥсь Наталия Михайловна Артемьева удмурт дэремен ужаны лыктӥз

Покчи Лӧзя столовойын ужасьёс понна та гужем нуналъёс эшшо но пӧсьгес луизы, дыр. Малы ке шуоно нуналлы 5 пол 70 адямиез сюдӥзы столовойын ужасьёс. Школаын али дыре завхоз луись Наталия Михайловна озьы ке но егитъёс  доры занятиосазы ветлыны дыр шедьтӥз, шумпотыса соос шоры учкиз, кичабонъёссэ но ӧз жаля.

- Туж мылкыдме ӝутизы егитъёс. Сюлмысь эктыны-кырӟаны дышетскизы, тыршизы. Макем шумпотымон со. Мон ачим но быгатыкум выступать карисько ук, соин но мон егитъёслэсь кырӟаны-эктыны дышетскемзэс учкыны лыктытэк ӧй чида. Татын егитъёс шоры учкыса сылӥ, нош ужысь бертыку ачим ас поннам кырӟаса-кырӟаса бертӥ, - шуэ Наталия Михайловна. – Бадӟым тау таӵе форум радъямзы понна, егитъёслы нимысьтыз тау мылкыдме ӝутэмзы понна.