Пуэдэн висьыны кутскид ке…

Эмьюмвузанниосын трос пӧртэм пумо эмъюмъёсты адӟыны луэ: асьме кунын поттэмъёсыз но кунгожсьӧрысь вуэм дуно эмъюмъёс. Нош юртто меда соос? Вашкала дырысен адямиос инкуазьлэн кужымезлы оскизы но пӧртэм турын-куаръёсын, емышъёсын, вӧйёсын эмъяськизы.

Соос пӧлысь троссэ тӥ ваньды тодӥськоды ини, дыраз висёнъёсты палэнтыны тӥледлы юрттозы таӵе кенешъёс:

1.     Азьло ик ньылонэз (чыртыез) гылъяны кутсконо. Татын тӥледлы юрттозы пӧртэм вируслы пумит составен турын-куаръёс: тӧдьысяська (ромашка), шалфей, аирлэн выжыез, мята, виртурын (зверобой). Озьы ик тӥледлы туж пайдаё луоз пыштурынэн (яке мелиссаен) но эмезен лэсьтэм пӧсь чай. Ньылонэз бичатыку, таӵе чай воштонтэм эмъяськон амал луоз.

2.     Нырысетӥ висён нуналъёсы озьы ик сугон но кумызь юрттозы. Шорияк вандэм сугон яке кумызь паръёсын шокано. Та процедураез суткаяз 3-4 пол гинэ лэсьтоно.

3.    Одно ик ингаляциос карыны кулэ. Татын тӥледлы юрттӥсь луозы таӵе куаръёс: тыпы, кедр, пужым, эвкалипт, сусыпу, ньылпу, лултурын (чистотел), шалфей. Куаръёслэсь эфирной вӧйёссэ ингаляци лэсьтон аппаратэ ватсаны мултэс уз луы.

4.     Пыдъёслы «ванночкаос». Куке тӥляд пичияк кызонды потӥз, ныръёсты пытсаськизы, соку ик пыдъёсты пыр профилактика но эмъян процедураос лэсьтоно. Та ужын юрттозы йӧнатон кизерметъёс (жидкостьёс) но эфирной вӧйёс, соосты пӧсь вуэ йылтыны кулэ. Пайдаез эшшо но бадӟым мед луоз шуыса, вуэз котьку пӧсь возёно. Бератаз, носки кутчаса, шуныт одеялэн шобырскыса изьыны выдоно. Но! Тодыны кулэ: секыто нылкышноослы, варикозэн но 37,5° температураен висисьёслы та процедураез лэсьтыны уг яра! 

5.     Чечы но лимон. Котькин та «дуэтлэсь» пайдазэ тодэ. Зэмзэ ик, висён нуналъёсы та туж бадӟым капчиятон луоз, эшшо но пайдаёгес луоз куркума но имбирь ватсады ке. Сӥятэм чаез пичи ымтыръёсын юыны кулэ.

6.     Пӧртэм емышъёс (эмезь, сутэр, чие, шу, нюрмульы) но та вакытэ зэмос юрттӥсьёс луозы. Макем тросгес юиськод, сокем чальгес вань вирусъёсыд мугордэ «куштозы».

Огъя вераса, котькуд адями висёнлэн «пик» вакытаз ассэ учкыны кулэ: шуныт дӥсяськыса, одно ик пыдъёсты сак учконо, гольык йыр ветлоно ӧвӧл. Тазалыкмы — асьме киосамы! Висёнъёслы ум сётӥське! 

Эн вунэтэ, калык медициная эмъяськоно туж чакласькыса, эмчиен кенешыса гинэ!