Семья! Макем мур та кыллэн пуштросэз...

24 декабре Ципьяысь Черновъёслэн дано семьязы изумруд сюанзэ пусйиз.

Мария Фёдоровна  но Пётр Григорьевич Черновъёс ӵошен улонзылы 55 ар тырмон юбилейзэс пусйизы. Витьтон вить ар ӵошен улыны котькуд пар уз быгаты, нош вылаз ик куспазы эшлыко улыса та аръёсты ортчытыны туж ӧжытэз гинэ пӧрмытоз. Тани ӝыны даурлэсь уно дыр ӵоже соос артэ, туннэ нуналэ но Черновъёс улон сюрес кузя ваче ки кутскыса вамышъяло.

Юбиляръёсты таӵе бадӟым лыдпусэн ӟечкыланы лыктӥзы Наиль Сафин —  «Балтасигаз» организацилэн кивалтӥсез, Рашид Хадиев — «Труд» обществолэн кивалтӥсез, Рифат Абдуллин — районысь ветеранъёслэн советсылэн председателез, Люция Нигматзянова — ЗАГС отделлэн кивалтӥсез, Эльмира Каюмова — ЗАГС-ысь кичӧлтӥсь ӧнерчи но Ципья гурт поселенилэн главаез Азат Нотфуллин.

Кузпалъёслэн улон сюрессы капчи луымтэ, соос вань вылазы вуэм шуг-секытъёс пыр потӥллям. Мария Фёдоровна 14 ар фермаын скал кыскись луыса ужам, «За трудовую доблесть» медален пусйиськем. Сырья гуртысь клубен кивалтэм, Ципьяысь школаын физикая кабинетын лаборант луэм, «Росгосстрахын» страховой агент луыса ужам. Мария Фёдоровналэн огъя ужан стажез — 44 ар. Со ужысь ветеран луэ. Пётр Григорьевич трос аръёссэ «Труд» колхозлы сӥзем. Нырысь огшоры рядовой ужась луэм, собере валтӥсь инженер луэм, нош собере 15 арлэсь уно колхозлэн председателез луыса ужам. Со ужан аръёсын гуртъёсын лэсьтэмын вал школаос, нылпи садъёс, магазинъёс, гурт клубъёс. Пётр Григорьевич туж юрттӥз Ципья шоръёзо школаез, «Калыкъёслэн эшъяськонзы» музеез тупатыны. Юрттӥз районын улӥсь пӧртэм калыкъёслэсь кусыпъёссэс юнматыны но азинтыны, калык эшъяськонэз юнгес карон понна ваньзэ лэсьтӥз, асьме калыкъёсмы — удмуртъёс, бигеръёс, ӟучъёс, поръёс — эшлыко, ог-огзэсты валаса но гажаса мед улозы шуыса тыршиз. Туннэ нуналэ, пенсиын луыса но, со Ципьяысь Пресвятой Богородицалэсь храмзэ выльдыны юрттэ.

Кузпалъёс котьку мыло-кыдо общественной уже пыриськизы. Со дыре ик шуныт но оскымон мылкыдъёссэс но ог-огзэсты валанзэс утьыны быгатӥзы. Али но соос ог-огзы шоры сокем шуныт но яратыса учко —  вожъяськон ик кылдэ. Чиданзы, визьнодзы но ог-огзэсты валамзы юрттӥзы соослы 55 ар ӵошен луыны. Изумруд сюан — со быдэс улон, тыршыса ӵошен ужамлэн бервылыз.

Черновъёс куинь нылпи будэтӥзы. Туннэ нуналэ бадӟымез пизы Василий семьяеныз Москваын улэ. Николай но Лариса ас семьяосынызы — Ципьяын. Огъя Черновъёслэн сизьым внуксы но одӥг правнуксы вань.

— Милям анай-атаймы — гажамон но дано адямиос, кызьы район понна, озьы ик милемлы но, матысьёссылы. Ужлы трос дырзэс сётоно луизы ке но, милемлы но соос котьку дыр шедьтӥзы. Милемыз будэтӥзы, визьнодазы но умой тодон-валан сётӥзы. Валамон, ужезъя атайлы ӵем дорысь кошкылоно луылӥз, но анаймы сое ноку ӧз пыкылы. Анай но атай ог-огзэсты котьку валазы, юрттӥзы. Соин ик, дыр, паймымон чиданлы, гажанлы но яратонлы луыса, соос сомында ар ӵошен улыны быгатӥзы, оскиськом, эшшо уно-уно аръёс улозы на шуыса. Юн тазалык, шудбур но кема улон аръёс сӥзисько, — ас мылкыдъёссэ вераз Черновъёслэн Лариса нылзы.

Изумруд сюанозь улыны изумруд сюлэмын адямиослы гинэ кылдэ, дыр. Тани Пётр Григорьевич но Мария Фёдоровна улонзылэсь изумруд бамзэс яратыса но оскыса берыктӥзы. Но та нуналэ кузпалъёслэн синъёссы егитэсь, шудоесь, яратӥсь вал — оло, со 55 аръёс ӧз но луэ кадь. Йырамы улонысь тужгес шудо минутъёс гинэ кылё вылэм — сотэк чупасал шат туннэ но «егит пи» ас «нылзэ» сюан нуналазы кадь?