Семык ортчиз, нош мылкыдъёс кылизы (1 люкет)

2015 арын «Гуртлэн нуналэз» шуыса пусйиськем ужрад туэ аслэсьтыз форматсэ кӧня ке воштӥз, таяз аре со «Семык ӝыт» шуыса нимаськиз. Та аспӧртэмлыко вашкалае берытскон амал луиз. Малы ке шуоно Вуж Кушкетысь «Семык возь» — со одӥгез тужгес данлыко инты, татын ас дыраз ёросысь ваньмыз шуымон удмуртъёс шулдыръяськиллям.

Семык — православной осконэн улӥсьёслэн улоназы одӥгез тужгес сӥлы карымон нунал. Праздник азьын котькуд гуртын адямиен пачылмем коркаосын мызган куара яке ӟырдыт вераськонъёс кылӥсько. Урамъёс нылпиосын тырмо, арлыдоос корка тыр адямилы шумпото. Ортчись ужрадъёс но трос калыкез люкало.
Пичи гуртын ужрадэз радъян но ортчытон — со туж секыт но трос кужымез кулэ карись уж. Соин одӥг адямиен тае лэсьтыны нокызьы но уг луы. Та понна оскымон адямиос луыны кулэ. Инмарлы тау, Вуж Кушкет гуртын сыӵеос трос вылэм ай. Паймымон кадь, чылкык вашкала удмурт дӥсен, камалиен, тӧдьы носкиосын но сьӧд галошаосын кышномуртъёс калыкез шулдыртӥзы, куноязы, мылкыдзэс ӝутӥзы. Лыктэм адямилы ваньмыз шулдыр но капчи потӥз ке, та шулдыр ӝыт сьӧрын туж трос киослэн тыршемзы ватскемын.

Ужрадэз ортчытыны дасяськон арня пала кыстӥськиз. Татчы ужъёсты люкылон, шудонъёслы кузьымъёсты люкан, интыез дасян но пыриз. Гуртысь калык ачиз ик коньдонэн, арбериосын юрттӥз. «Яна тормыш» колхозлэн кивалтӥсез Раниль Габдрахманов 10 кило сӥль сётӥз, гуртысь йӧл люкасьёс но коньдон висъязы. Гуртысь егит пиос тыл понна юбоосты пуктыны юрттӥзы.

Кутсконаз калыклы валэктэмын вал «Семык ӝытлэн» пуштросэз, маин со герӟаськемын, малы тунсыко но шулдыр ортчизы вашкала семык нуналъёс. Шумпотымон, лыктэм пересьёс али но тодо на, кыӵе вал чебересь но шулдыресь со семык нуналъёс. «Егитъёс семык возе мыныны самой чебер дӥськутъёссэс, камалиоссэс дасяло вал. Мызганчиос нимысьтыз инты басьто вал ини, соосты котьку сӥлы карыса пумитало вал», — тодэ ваёнъёсынызы люкиськизы пересьёс.
Гурт калыклэн нимыныз Пётр Даниловез но вылӥ данъет басьтэменыз ӟечкылазы. Солы нимысьтыз кузьым дасямын вал. «Котьку шумпотӥсько арлыдоосты, будӥсь пиналъёсты адӟыны. Вордӥськем гуртад бертыса, сяськаяськись улонэз, возиськись сям-йылолъёсты адӟыны туж шумпотӥсько», — вазиськиз гуртоосызлы Пётр Павлович.

Официальной кылъёс бере лыктэм калыкез ӝукен, турын чаен но табанен кунояськыны ӧтизы. Ӝукез Антонина Самсонова но Генриетта Павлова ческыт пӧразы, соин но, кема улытэк ик 20 килограмм вазь ӝук казанын ӧз кыльы ини. Ческыт табанен куноятӥз Людмила Раимова. Табань пыжон понна гурзэ сётӥз Пётр Ильмурзин.

Нош турын чаез сизьым самоварен пӧзьтӥзы, татын Виталий Клеймёнов но Олег Исаев зол тыршизы. Кык радэ тырем самоварысь ву пӧзьыса ик уг ву вал кадь, нош ӝук сием бере, самоваръёс воксё пӧземысь ӧз дугдэ ини. «Вӧтады уз пыре ни меда та самоваръёсты», шуыса вераллязы куноос.

Бадӟым площадкаын пичиос но бадӟымъёс понна шудонъёс мыныку, ӝӧк палан калык кырӟанъёс чузъяськизы. Вашкала дыре кадь мызган гуръёсын шулдыртӥзы ӝытэз Владислав Петров но Иван Кобылкин. Удмурт кырӟан-эктонъёслэсь мӧзмыса бертэмъёс бер ӝытозь но эктыны дась вал ай.
Шудонъёс пӧртэм пумо луизы. Татын ик сяме пырем арбери вандылон но, сапег куян но. Воргоронъёслы тужгес кельшымон луиз чорыган. Воргоронъёсын огкадь кышномуртъёс но визнанэз быгатыса уже кутӥзы. Огшоры ӧз пыриське, призъёсты но басьтыны быгатӥзы на. Нош покчи пиналъёс понна вань шудонъёс тунсыко луизы. Бадӟымъёс понна радъям пуйыен бызёнэ но пыриськизы.

Быдэс нунал ӟырдыт сюлмын возьмам парсь но атас кутонын «шудо муртъёсыз» луизы. Парсез кутыны гуртысь ик Мирослав Филиповлы шуд усиз. Пияшлэсь пальышась ымнырзэ адӟоно вал, кыӵе ӝуась синъёсын тырмемын вал со. Нош атас кошкиз Ципья гуртэ — Ильнар Закировлэн — семьяяз. Шумпотымон, гурт понна сюлмаськись но тыршись адямиос ӧжыт ӧвӧл, вылэм. Парсез но атасэз, ӝытэз ортчытон понна, сётӥзы Мария но Виталий Соловьёвъёс. «Инмар та понна милемлы нош но трос карыса сётэ ук», — шуизы соос. 

Ӝытэз шулдыртыны Ципья гуртысь Булат Назипов лыктӥз. Аслэсьтыз кырӟанъёссэ кузьмаса, калыкез эктытӥз. Анаезлэн вордскем гуртаз, ӵужанаезлэсь мылкыдзэ ӝутыса, кырӟаз Юлия Тукаева. Уйшорозь гурлазы кушкетъёс, тылъёсын радъям площадкаысь калык мылпотытэк гинэ кошкиз. Мар карод, ӵуказеяз туж бадӟым нунал — Семык. Солы рос-прос, сазь йырын дась луоно вал.