Шляпкинъёслэн династизылэн «педагогической родословнойзы»

Асьме ёросысь одӥг сыӵе дано дышетӥсьёслэн выжыенызы — Шляпкинъёслэн выжыенызы — тӥледыз тодматыны малпамы.

Александра Фёдоровна Шляпкина — дышетӥсьёслэн династизылы инъет понӥсь

20-тӥ даурлэн кутсконаз, 1919 арын 20 июне, Вятской губерниысь Малмыж волостьысь Сизнер гуртын трос нылпиё крестьян семьяын Фёдор но Мария Шляпкинъёслэн витетӥ нылпизы, Александра, вордске. Кызьы берлогес тодаз вайылэм солэн Галина нылыз, Александра Фёдоровна аслаз пичи дырыз, анай-атаез сярысь туж яратымтэ ке но вераны, Мария апайзэ но Григорий агайзэ туж шуныт мылкыдын гинэ тодаз вайылэм. Атаез Фёдор Шляпкин тыр улӥсь (зажиточный) крестьян луэмысьтыз «кулакъёслэн» радазы шедем но сое арестовать кариллям. Кулытозяз но Александра Фёдоровна тодымтэ, кызьы кулэм солэн атаез но кытчы сое ватӥллям. Вӧсь луэмзэ но бадӟым ыштонзэ Александра школаын гинэ вунэтыны быгатэм (школае сое нырысьсэ Григорий агаез ваем). Секыт сютэм аръёс шоры учкытэк но, пичи, ӧжыт эстӥськись кык комнатаен корка солы паймымон выжыкылысь юрт выллем потэм. Ӵемысь Александра Фёдоровна пичи дырысьтыз дышетӥсь сярысь валанъёссэ серекъяса тодаз вайылэм: «Ми черодэн туалет дорын куакъёс сьӧры пегӟыса дежурить кариськомы вал, дышетӥсь татчы ветлэ-а меда шуыса. Ми малпамы, Дышетӥсь — со Инмарлэн музъеме нылпиосты дышетыны нимысьтыз лэзем адямиез шуыса».

1933 арын, Мари-Турек ёросысь Хлебниково гуртысь 7 классэз йылпумъяса, Александра малпаськытэк Арчаысь педагогикая училищее дышетскыны пыре. Покчи классъёсты дышетӥсьлэсь дипломзэ басьтэмез бере, егит дышетӥсез направлениен Балтась ёросэ лэзё. Ёросысь калык дышетонъя ёзэтысен сое Тагашурысь покчиёзо школае начальной классъёсты дышетыны лэзё. Тагашурын ужакуз ини гуртысь егит пиен, Эшкеев Алексеен, тодматскем. Алексей парторг луэм. 1941 арын егитъёс паръяськиллям. Гуртын Александра Фёдоровнаез гажаллям но, яратӥллям но. Жугиськон бере, 1948 арын, Александра семьяеныз Ципьяе улыны выжем. Кузпалзэ Алексеез «Труд» колхозэ кивалтӥсь карыса тодмосто, нош ачиз Александра Фёдоровна ужзэ азьланьтэ Ципьяысь Удмурт шоръёзо школаын. Куамын арлы матэ та школаын ассэ нылпиослы сӥзьыса ужа со.

Дышетон удысын азинсконъёсыз понна дано дышетӥсь «За трудовое отличие», «За доблестный труд» медальёсын пусъемын. Александра Фёдоровна 2000 арын 81 аресэн кулэм.