Шуд мед ваёз Выль ар!

Ку кутске Ошлэн арез. Китай календарь асьмелэныз уггес тупа, соя Ошлэн арез 2021 арлэн 12 февральысеныз гинэ кутске, нош кыстӥське 2022 арлэн 30 январёзяз.

Кыӵе луоз 2021-тӥ ар. Високосноез бере вуись ар каньыл луыны оскытэ. Со ужаса ортчоз, валтӥсь ужед сяна, тыршоно луоз ачид бордын но адями кусыпъёс бордын. Но вань тыршемъёс та арын кык полэсэн берытскозы. Ош яратэ зэмлыко но сюлмысь ужась адямиосты. Ӧжытак тыршиды ке сое ас палады карон понна, со тӥ шоры одно ик ӟечен учкоз.

Бизнес. Коньдон ласянь ар умой луоз, малы ке шуоно Ош — оскымон партнёр. Узырлык ас тыршемды бордын гинэ луоз. Но Ош улонэ воштӥськонъёсты секытэн пыртэ, со вуж сямен ужаны яратэ, соин кужмо но ӝог азинтӥськись компаниослы та шуг-секытъёс кылдытыны быгатэ. Соин, ӧнерчиослэсь но асьтэлэсь кылзӥськыса, тупамон сюрес утчаны тырше. Ӝог узырмонлы Ош уг оскы, вормонъёсы со ас сюресэныз вамышъя, тыршыса ужан амалэн. Соин капчи сюресъёсты утчано ӧвӧл.

Кусыпъёс. Кусыпъёс ласянь вуоно арез кык пумо вераны луэ. Ош выль адямиосты улоназ секытэн лэзе, оген улыны яратэ. Нош семья ласянь ваньмыз каньыл луоз. Ош мылкыдъёссэ кутыса возе, соин кужмысь соосты шараяны эн косэ — азяды воксё витьымтэ мылкыдъёс усьтӥськыны быгато.

Воштӥськонъёс. Ош — каньыл но аслыз ачиз оскись знак, соин арлэсь но кужмо шуг-секытъёсты, воштӥськонъёсты витёно ӧвӧл. Асьтэлы, уждылы, семьядылы саклык висъялэ — ваньзэ тае Ош яратэ но та ӧръёсын тӥледлы юрттоз.

Кызьы пумитано Ошлэсь арзэ. Кызьы верамы вал ини, Ош вуж сямъёсты яратэ, соин 2021 арез умойгес луоз семьяен пумитаны. Ӝӧк вылын уно но огшоры сиён луыны кулэ: картофкаен сӥль, дышем салатъёс, сылалтэмъёс но уно будос сиён. Олокыӵе тодмотэн, экзотической сиёнъёсты дасятэк умойгес луоз. Ош сӥль арлэсь кузёзэ обидёз шуыса лыдъяське, соин мукетсэ дасяны тырше. Юонъёс пӧлын тупамонгес луозы морсъёс, сокъёс, компотъёс но емышъёслэсь настойкаос. Вунэтоно ӧвӧл ческыт сиён (десерт) сярысь но — Ош соосты яратэ.

Выль арез семьяен но матысь эшъёсын пумиталэ — праздник шуныт мед ортчоз, котькин ассэ дораз выллем мед шӧдоз. Ош шунытэз но ӝикытэз яратэ. Ӵошен праздник интыдэс чебермалэ, сиён-юонъёсты дасялэ. Огъя кариськыса ужамез Ош синйылтоз. Тунсыко конкурсъёсты но шудонъёсты дасяны луэ.

2021 ар Тӧдьы Металлической Ошлэн арез луэ бере, буёлъёсты но сыӵегес ик быръёно. Дэремъёс капчи но сайкыт буёло луыны кулэ, тӧдьыез чилясьёсын чеберманы луэ, Ошлы та одно ик кельшоз. Дӥсьёс, буртчин, хлопок выллем, инкуазь басмаослэсь мед луозы. Горд дӥсьёсын Ошлэсь вожзэ эн поттэ.

Сыӵе ик тусъёс но инкуазь материалъёс (пу, корт, из) улон интыез чебермаку но кутӥськыны кулэ.

Мар витёно 2021 арын.

Комак. Карьерадылы уногес саклык висъяны уте — та ӧрын тӥледыз витёзы вормонъёс. Нош уждэс воштыса, уногес пайда поттыны быгатӥськоды. Азьвыл ужады но тӥледыз саклыктэк уз кельтэ, соин вожъяськисьёс но луозы. Соос вылэ учкытэк, йырын малпаськыса ужалэ.

Ош. Аслыз матын луись ошъёс шоры арлэн кузёез оскытэк учкоз. Огъя вераса, ар умой луоз, но со понна тыршыны тупалоз, улонъя гинэ уяса мыныны уз луы. Берлолы кельтэм ужъёс собере саклык висъямез кулэ карозы.

Тигр. Тӥледлы, вань кужымдэс люкаса, сое тазалыктылы висъяно луоз. Эскеронъёсты ортче, кемалась висёнъёстэс чаклалэ, асьтэды уте. Тазалык сярысь сюлмаськон та арлэн валтӥсь ӧрды луыны кулэ. Мугорды со понна тӥледлы тау кароз.

Кролик яке Коӵыш. Тигрлы выллем ик, тӥледлы но тазалыклы саклык висъяно. Сокем ик мур ӧвӧл ке но, сое чаклатэк эн кельтэ. Улонады воштӥськонъёс пыртон сярысь малпанъёсты ке вал, та ар умой кутскон сётоз. Басьтӥське, эн кышкалэ!

Дракон. Та тӥляд арды! Дӥсьтыса ваньмыз борды кутске — тӥледлы удалтоз. Яратон, уж, путешествиос — умоесь событиос тӥ борды магнитэн выллем кыстӥськозы. Эн лэзе ки улысьтыды та луонлыкез!

Кый. Ош кыез сокем ик уг яраты ке но, кый быгатоз умойтэмысь потыны но кулэзэ басьтыны. Ваньмыз ик капчи уз луы, но кескич луыса, Кый вормыны быгатоз.

Вал. Валъёс шоры Ош ӟечен учкоз. Но улондылэсь ас понназ радъяськемзэ витьыса огшоры пуконо ӧвӧл. Лэсьтэ малпамдэс, янгшады ке но, вуоноын шонер сюрес вылэ потыны быгатоды. Уногес дырдэс инкуазьын ортчытъялэ, та тазалыктэс умоятыны ӟеч амал луоз.

Ыж яке Каза. Асьтэлэсь пуш куарадэс кылзэ, со уз пӧя, уногес асьтэлы оске. Азьтэмдэс вормыны тырше — та арын со туж ик умой сюресчи уз луы. Семьялы тросгес саклык висъялэ, матысьёсты асьсэды вунэтэмен медаз шӧдэ.

Маймыл. Та пайдаё, уно сюрпризъёсты вайись ар луоз. Эн палэнтӥське соослэсь соку ик, нырысь пайдазэс чаклалэ. Котырысьтыды адямиосын сак луэ, тӥледыз умойтэм уже кыскыны турттӥсьёс но шедьыны быгатозы.

Атас. Кемалась асьтэды искусство удысын утемды ке потылӥз, та ар — тупамон дыр. Ош улонады шуг-секытъёс пыртыны быгатэ, соин матысьёстылэн юрттэтсылэсь эн палэнтӥське, секыт дыре соос тӥледын ӵош шонер сюрес бырйыны быгатозы.

Пуны. Тӥледлы шутэтскон кулэ, малы ке шуоно Ошен вожмаськыны секыт луоз. Ӵашетӥсь ужъёслэсь палэнтӥське, уногес дырдэс инкуазьын ортчытэ, шутэтскондэс зарезь дурын ортчытыны тырше. Та тӥледлы кужымдэс берыктыны юрттоз.

Кырпарсь. Та уз луы туж капчи ар, но тырше мылкыддэс уськытытэк улыны. Луэм шуг-секытъёсты кылдэмзыя сэрттэ-пертче, соосты бадӟыматыса эн курадӟе, жалялэ асьтэдыз. Дышетске пуктэм ужпумъёстэс мукет адямиосын люкыса ужаны, ваньмыз борды эн басьтӥське, сотэк чигиськыны но секыт дыре шонертэм ужаны быгатӥськоды.

Ошлэн араз вордскем нылпиос

Сыӵе нылпиос каньылэсь, кылзӥськисесь луо, асьсэды кутыны быгато. Нылпилэн вуоноын шуг-секытъёсыз медаз кылдэ шуыса, анай-атайлы сое пичи дырысеныз асэрико (самостоятельной) луыны дышетоно. Ӵемысь сыӵе нылпиосты котырысь адямиос уг валало, соос калыклэсь палэнско но дырзэс огназы ортчытъяны тыршо, доразы пуко. Нылпилы пушказ пытсаськыны сётонтэм вылысь, бадӟымъёс умой сямъёссэс шонер ӧръяны кулэ. Ошлэн араз вордскем пиналъёс пичи дырысен кылкутонэз шӧдо но анай-атайёссылы котьма ласянь юрттыны тыршо. Тырше семьяын керетонъёстэк, черекъятэк улыны, соку нылпиос каньыл, ӟеч но юн сямо луыса будозы.

Интернет вотэсъёсын пайдаяськыса дасям статья

Фото: Тәнзилә Габдрахманова