Шулдыр мылкыдзы котьку бордазы

Шумпотымон, туннэ нуналэ та малпан, улонэ пыӵаса, пумен чебер сямлы но пӧрме ини. Котькуд аре кыӵе ке но выль гурт итӥське Гуртлэсь нуналзэ пусйисьёслэн радазы. Туэ, кылсярысь, Сырья гуртын нырысетӥзэ радъяськиз таӵе шулдыръяськон, нош Карек-Сермаын кыкетӥзэ ортчиз.

Куазьлэн кезьыт луэмез но, гуртлэн кыдёкын интыяськемез но ӧз люкеты та нуналэ Карек-Серма гуртэ трос калык люкаськонлы. Гурт кузя кыстӥськем машинаослэн лыдзы гинэ но талы юнматон луиз. Гурт калык но палэнын — Удмуртиын, Киров но Свердловск улосъёсын, Марий Элын, Татарстанлэн пӧртэм ёросъёсаз — улӥсь аспалъёссы сяна, та нуналэ Починкае гажаса ёросмылэн пӧртэм сэрегъёсысьтыз вуизы куноос. Нош кузёос ваньзэсты куно карыны дась вал: пуртыязы — ческыт вазь ӝук, самоваръёсазы — быректэм чай, ӝӧк вылъёсазы — табань но мукет ческыт сиёнъёс, бордазы — капчи мылкыд!

Праздник Починка гуртысь самодеятельной артистъёслэн тыршеменызы дасям концертэн кутскиз. Шумпотымон, гурт артистъёс пӧлын нылпиос но вал. Удмурт калык дӥсен пиналъёс шоры учкыса, мылкыд ик бурдъяське уга. Сыӵе соос мусоесь, матынэсь!

Шулдыръяськон мыныку, починкаос адӟем карымон гуртооссэс но данъяны ӧз вунэтэ. Сцена вылэ ӧтьыса, кузьымен пусйизы «Татарстан Республикаысь гурт возёсысь сӥё-дано механизатор» нимез данэн нуллӥсь Владимир Якимовез, «Борнак» возёсын скал кыскись луыса ужась Ирина Матвееваез, гуртысьтызы самой пичи улӥсьсэс Милана Игнатьеваез но трос муртэ визьмо карем дышетӥсьсэс Василий Никитинэз.

Починкаосты но люкаськем куноосты ӟечкыланы вуылӥз «Борнак» обществолэн тӧроез Рафкат Накипович Назипов но. Кивалтӥсь праздникен ӟечкыласа, таукарон кылъёс вераз но ваньзылы ӟеч мылкыд, азинсконъёс сӥзиз. Пусйыны кулэ, ӵапак Рафкат Накипович ик та шулдыръяськон ужрадлэн валтӥсь юрттӥсез луиз.

— Гурт калыклэн нимыныз но аслам нимыным туж бадӟым таукарон кылъёсме верасько «Борнак» возёслэн тӧроезлы Назипов Рафкат Накиповичлы, Гуртмылэсь нуналзэ ортчытон малпанмылы дурбасьтэмез но коньдонэн юрттэт сётэмез понна, — кивалтӥсьлы таукарон кылъёссэ вера Карек-Серма гурт клублэн заведующиез Зоя Никитина но.

— Озьы ик коньдонэн юрттэмез понна туж бадӟым тау Прокопьев Владиславлы. Никитин Василий Петровичлы нимаз ик тау, котькуд ужамы, котькуд кутсконамы кичӧлтӥсь, визь-кенеш сётӥсь луэмез понна. Гурт калык туж трос юрттӥз, мылысь-кыдысь праздникез ортчытонэ пыриськиз. Йыбырттыса ик тау карисько гуртоосылы. Гуртмылэн егит старостаезлы Игнатьев Яковлы пумтэм тау, вань организационной моментъёсты, коньдон но артистъёсын кусып тупатон ужпумъёсты со радъяз. Шестакова Галяпайлы нимаз ик тау, куинь сумка арбери вайиз, карасэн муэз гинэ но вал. Вань лыктэм куноослы но тау, милесьтым шумпотонмес, шулдыр мылкыдмес люкемзы понна», — ватса на Зоя Михайловна.

Праздник шулдыр ортче соку, куке калыклэн аслаз вань мылкыдыз шулдыръяськыны. Починкаын но шулдыръяськыны мылкыд карем адямиос пу вандонын, пуйыен но ведра карнанэн бызьылонын, чорыганын асьсэды эскерыны, атас кутонэ пыриськыны быгатӥзы. (Атас кутон сярысь вераку, мискинь атас сьӧрын трос кузя бызьылӥсь адямиос син азе пуксё. Нош починкаослэн атассы визьмо ужам, ассэ но, сое кутыны вырись адямиосты но раньӟытымтэ, ачиз быръем аслыз кузё. Озьы, атаслэн кузёез Ӟаны гуртысь кен Терентьева Людмила луиз). Кышнооссэс котьку ки вылазы нуллыны дась луэм воргоронъёс но шедизы (сыӵе ӵошатскон но вал). Нылпиос сярысь но починкаос вунэтӥллямтэ, соос понна но пуйыен бызьылон, горшок пыргытон но курегпузэн бызьылон выллем вожвылъяськонъёс радъямын вал.

Праздниклэн кульминация вакытэз Удмуртиысь куноослэн — Алёна Тимерхановалэн, Иван Котельниковлэн, Андрей Корниловлэн но Ури-бери Ориналэн — выступлениоссы луиз. Артистъёслэн шулдыр кырӟамзы улсын калык мылысь-кыдысь эктӥз. Нош Орина котьку сямен адямиосты кӧтсы пӧсьтымон серекъятӥз. Йылпумъяса вераме потэ, туэ но ёросамы ортчем гурт шулдыръяськонъёс мылысь-кыдысь шутэтскыны, ӵыжы-выжыосын, кемалась адскымтэ тодмоосын, гуртоосын пумиськыса вераськыны луонлык сётӥзы. Котькинлэн но соос мусо пальпотонъёсын, сюлмысь ӟыгыръяськонъёсын, шуныт тодэ ваёнъёсын но выльысь пумиськонлы осконэн тодаз кылизы, дыр, шуыса малпасько.