«Сиён пӧзьтон — секыт уж со», — Лариса Перфилова

Лариса Михайловна вордскемын 1978-тӥ арын Пор-Кутеш гуртын. Шор Кушкет школаын 11 классэ йылпумъямез бере, со Арчаысь колледже вузкарись-коммерсантлы дышетскыны пыре. 1996-тӥ арын сое йылпумъяса гуртаз бертэ но Пор-Кутешын магазинын вузкарись луыса ужаны кутске (отын ик азьвыл практика но ортче). Со арын ик Сала Кушкетэ Александр Михайлович Перфиловлы картлы кошке (туннэ нуналэ семья Пор-Кутешын улэ). 1997-тӥ арын егит парлэн Виктория нылзы вордске (туннэ нуналэ менеджерлы дышетскыса, Казаньын ужа). 2000-тӥ арысен 2002-тӥ арозь Лариса Михайловна Ӟаны гуртысь магазинын вузкаре. Собере вордске Вадим пизы (али дыре КНИТУ-лэн колледжаз дышетске). 2004-тӥ арын Лариса Перфилова Ӟаныысь садикын покчи воспитатель (нянечка) луыса ужаны кутске, нош

кӧня ке толэзьскын солы сиён пӧзьтонэз оско. Ини 16 ар ӵоже та ӧнерлы сётскыса, аслэсьтыз ужзэ яратыса нылпиосты ческыт сиёнэн сюдэ со.

— Лариса Михайловна, тӥ кема аръёс ӵоже ини Ӟаны гуртысь нылпи садын сиён пӧзьтӥсь луыса ужаськоды. Нимысьтыз дышетскемды вань-а та ӧнерлы?

— 2004-тӥ арысен та интыужын тыршисько ни. Дышетскемея вузкарись ке но, аслэсьтым ужме туж яратӥсько. Сиён пӧзьтӥсь луыса ужаны кутскеме бере поварлы 4-тӥ рязряд но, собере 5-тӥ разряд но басьтӥ, нимысьтыз курсъёсты ортчыса.

— Малпасько, ваньзы лыдӟисьёс уг тодо тӥлесьтыд ужан радлыктэс. Со сярысь ӧжытак вералэ вал.

— Ужан нуналмы ӵукна сизьым часэн кутске, тямыс часъёсын сиён дасяськомы ни, йылпумъяське ужмы куинь час котырын. Ужаськомы технологической картая. Огшоры кылын верано ке, нылпиос понна 10 нуналлы дась меню вань. Со меню Казаньысен вуэ. Озьыен, Татарстанысь вань нылпиослы со менюя сиён пӧзьто. Вань куронъёслы тупась, нылпиос понна кулэ луись сиёнъёсын дасям меню со. Отын ваньмыз вань: сӥль, чорыг, пыжиськем, йӧллэсь дасям сиён-юонъёс. Огъя вераса, воксё ӝожтӥськымон ӧвӧл. Нылпиос со сиёнэз сиыса но уг быдто.

— Сиён сярысь вераськон потэм бере, юатэк кылеме уг луы. Куддыръя адямиослэсь кылыны тупа, сиён пӧзьтӥсь луыса ужасьёс кылем сиёнъёсты доразы нулло шуыса...

— Котькуд нунал ӵукна ми визьнодасьёслэсь юалляськиськом, кӧня нылпи туннэ лыктӥз. Нылпиослэсь лыдзэс тодэммы бере гинэ сиён пӧзьтӥськомы, мултэс сиён медаз кыльы шуыса. Ваньмыз веса пыр но потэ (шор группалэн, покчи группалэн менюез одӥг ке но, сиёнэзлэн граммез мукетгес). Огъя вераса, мултэс сиён ум пӧзьтӥське. Пыжиськемъёсты но чамаласа гинэ дасяськомы. Сиёнмы котьку выль пӧзьтэм луэ. Нялтас вераса, котькуд нунал ӵуксиёнлэсь, нуназе сиёнлэсь, ӝытсиськонлэсь пробазэ басьтыса но кельтӥськомы.

— Малы?

— Малы ке шуоно нылпиен мар ке луиз ке, кылсярысь, висьыны кутскиз ке, отравиться кариз ке, нырысь ик солэсь нылпи садын мар сиемзэ эскеро. Соин котькуд сиёнлэсь образецъёссэ 48 час ӵоже ми холодильникын возиськомы.

— Магазинын ужаны капчигес вал, дыр...

— (Серекъя). Мынам магазинын ужаме уг поты ни. Отын но, татын но лумбыт нуналэз пыд йылын ортчытоно. Но садикын мыным тросгес кельше. Дышиськем но, дыр, ини, дас куать ар ужасько бере. Табере ини юрттӥсе но вань.

— Юрттӥсьты сярысь но вералоды-а?

— Нырысь огнам ужасько вал, секыт луиз, ваньзэ вутскыны уг луы вал. 30 нылпиез но огнам сюдэме вань, туннэ нуналэ 33 нылпиосты сюдӥськомы. Сиён пӧзьтон — секыт уж со. Табере тани Татьяна Клеймёнова юрттӥсеным валче ужаськомы. Со Кушкетын улэ, туж умой ужа, юрттэ мыным. Тупаськомы куспамы. Соин гинэ ӧвӧл, вань коллективен но умой ужаськомы. Ог-огмылы юрттӥськомы, ог-огмес куддыръя вошъяськомы но. Атмосфера ужан интыямы котьку умой, эшлыко.

— Сомында ар ӵоже сиён пӧзьтыса ужам бере, жадьытэ, дыр. Дорады сиён пӧзьтонэн курадӟемды но уг ни поты, дыр.

— Мон ини пичи дырысеным сиён пӧзьтыны дышемын. Песяе дышетӥз. Нырысь ужаны кутскеме бере, йӧллэсь сиёнъёсты туж пӧзьтыны уг быгатӥськы вал, но дыр ваньмызлы ачиз дышетэ вылэм. Дорын, зэмзэ но, куддыръя шутэтскем потэ сиён пӧзьтонлэсь. Тужгес но пыжиськеме уг поты, малы ке шуоно садикын ӵем пӧраськоно луэ. Пыжиськон сяна, мукет сиёнъёсты дасяны но кулэ луэ. Тани туннэ капчи нунал вал (Лариса Михайловнаен вторнике,

20 октябре вераськимы — Н.Ж.), творожной запеканка дасяно луиз, сое секыт ӧвӧл дасяны. Пӧртэм сямен луэ ни. Но ӝожтӥськеме ӧвӧл. Котькыӵе ужын капчиез но, секытэз но луэ.

— Лариса Михайловна, ӟечкыласькомы тӥледыз ӧнер праздникеныды. Котькуд пӧзьтэм сиёнды ческыт мед луоз, пӧрамдэс сиисьёсты тау карыны, ужамдэс гажаны мед быгатозы.