«Синкылиен дурем вормон…» (фото)

Шаермы сӥё-дано карыса Быдӟым Вормон нуналэз пусйиз. Городъёсын но гуртъёсын 9 куартолэзьлы сӥзем митингъёс, буре ваён ужрадъёс ортчизы.

8 куартолэзе Сизнер гуртысь калык но Быдӟым Атыкай оже пыриськем ӵыжы-выжыоссэс, гуртооссэс буре вайиз. Сӥё-дано ужрадэ пыриськизы гуртысь арлыдоос, егитъёс но пиналъёс. Соосын ӵош Вормон нуналлэсь шумпотон но куректон мылкыдъёссэ люкизы «Смаиль» обществолэн тӧроез Ильгам Мансурович Шакиров, Смаиль гурт поселенилэн главаез Рифнур Гайнанович Юсупов но Смаиль гуртысь ветеранъёслэн огазеяськонзылэн председателез Солтан Ибрагимович Фатихов. Озьы ик сизнеръёсыз та синпель нуналэн ӟечкыланы вуылӥз ёросысь дышетонъя управленилэн кивалтӥсез Ренат Камилевич Мухарлямов.

Сизнер гуртысь Ципья шоръёзо школаын дышетскись пиналъёс ужрадэ пыриськемъёслэсь мылкыдъёссэс бугыртӥзы ож дырысь кырӟанъёсын но мур пуштросъем кылбуръёсын. Быдӟым тыложе пыриськем но фашизмен нюръяськем ожгарчиосты буре вайыса минут ӵоже чус сылӥзы но йыбыртыса, тау каремзэс вуттыса синпелет доры сяська керттэтъёс понӥзы. Ужрад йылпумъяськиз «Смаиль» обществолэн кивалтӥсезлэн Ильгам Шакировлэн юрттэменыз дасям узыр ӝӧк сьӧрын чай юонэн.