«Сюлмысь тыршыса ужыку гинэ ваньмыз умой пӧрме»

«Алга» обществоысь Андреев Владимир Александрович — возёсысь егит механизаторъёслэн одӥгез. Егит шуыку, син азе али гинэ школаез яке дышетскон юртэз йылпумъям пиос пуксё. Но, жаляса верано, «Алга» обществоын сыӵеос ӧвӧл вылэм.

Владимир Александрович ассэ обществоысь самой егит ужасьёслэн одӥгез шуэ. Но ужан стажез солэн ӧжыт ӧвӧл ини — 15 ар.

— Вордски мон 1986-тӥ арын Ярак-Чурма гуртын. Вордскем гуртысь покчиёзо школаын, собере Покчи Лӧзяысь шоръёзо школаын тодон-валан басьтыса, 10-тӥ классэз йылпумъяме бере ик, гужемъёсы кӧня ке ар ӵоже «Алгаын» ужай ини. Комбайнёрлэн юрттӥсез луи. Тӥни соин егит дырысен мыным та уж матын луэ, — асэныз тодматыны кутске механизатор.

2004-2006-тӥ аръёсы Подмосковьеын служить карыса бертэмез бере, Владимир Александрович колхозэ ужаны интыяське. Со дырысен со «Алга» обществоысь одӥгез ушъямон механизатор луэ. Кыӵе гинэ уж уг сёто, ваньзэ дыраз быдэстэ. Ремонт ужъёсын но выре, пӧртэм техника сьӧры но пуксе.

—  Нырысетӥ техникае «Дон-1500» комбайн вал. Кема ик соин ужатэк, «Нива» комбайн сьӧры пукси. Соиныз ини 10 ар ужай. 2017 арысен «Акрос 550» комбайнэн тыршисько. Ушъяськеме уг поты, но котькуд техникае шоры кылкутыса учки. Тӥяськиз ке, ачим тупатӥ, ачим утялтӥ. Техника но ведь адями кадь ик — кызьы тон со шоры учкиськод, со но тон шоры озьы ик учке. Ваньмыз кулэ каронэз, утялтэмез вите, — валэктэ комбайнёр.

Комбайнъёс сярысь механизатор кема вераськыны быгатэ, угось соос сярысь со трос тодэ: котьма ке но, дас вить ар руль сьӧрын ужа ни ук.

Толалтэзэ ремонт ужъёсын выре но пӧртэм мукет ужъёсты быдэсъя ке, тулыссэ кизён кампание пыриське Владимир Андреев, нош гужем комбайнэн ужа. Вераськыкумы (гудырикошконлэн пумаз) йыды кутсан ужъёсын выре вал.

Юрттӥсеныз Герасимов Олеген но тупаса ужало. Олег Александрович но егит механизаторъёс пӧлысь (статьямылэн героезлэсь одӥг арлы гинэ покчигес). Ӵош дышетскиллям, ӵош будӥллям, табере ӵош ужало но. Кыкназы но тыршисесь, ужасесь. Куспазы гинэ ӧвӧл, мукет ужасьёсын но валче тупаса, ог-огзылы юрттыса ужало вылэм.

— Адямиен тупаса улыны но ужаны тыршисько. Мар карыны куризы, сое быдэстӥсько. Ужме но туж яратӥсько. Ведь сюлэмдэ сётыса ужаку гинэ, ваньмыз умой пӧрме. Жаляса вераны гинэ кулэ, «Алгаын» егит механизаторъёсмы ӧвӧл, егитъёс городэ кыстӥсько. Туала куронъёслы тупась техника но вань, уждунзэ но дыраз тыро, коллектив но умой — огъя вераса, ужан понна вань условиос кылдытэмын кадь ини. Соин ми шумпотыса ужаськомы, котьку но озьы мед луысал. Оло, егитъёс но лыктысалзы, нош ми соосты ужмылы шумпотыса дышетысалмы, — мылкыдъёссэ усьтӥз Владимир Александрович.

Сыӵе усьтэм мылкыдо, капчи сямо, валтӥсез — нокыӵе ужлэсь кышкасьтэм ужасьёссы луыку, «Алга» возёсысь кивалтэтлы ӵуказеез понна кышканэз ӧвӧл.  Оскисько, Владимир Александровичлэн нимыз газетмылэн бамъёсаз одӥг пол гинэ уз поты али шуыса.