"Скалъёс мынэсьтым кырӟамме кылыса, пельёссэс выллань карыса ик кылзӥсько"

«Ужез тодыса будӥмы ми»

Егорова (Апакова) Галина Пантилеймоновна Ӟаны гуртын вордске. Гуртысьтыз школаын 7 класс дышетскыса, Тюнтер гуртысь школае выже но отын 1986-тӥ арын 10 классэз йылпумъя. Школазэ йылпумъяменыз валче фермае ужаны интыяське.

— Школаын дышетскыкумы ик колхозэ ужаны ветлӥськомы вал бере (кылсярысь, милемыз кӧжы берыкъяны ветлытӥзы, парсьёсты но возьмамы), ужез тодыса будӥмы ини ми. Нялтас вераса, монэ атае Пантилеймон Яковлевич пичи дырысен ужаса будыны дышетӥз — мон соин ӵош чорыганы, губи, узы-боры люканы ветлӥ. Соин школаез йылпумъямен валче Кутэш гуртысь фермае ужаны интыяськи, пинал скалъёсты кыски, — вера Галина Пантилеймоновна.

Но 1988-тӥ арын егит Галина Любовь Колоколова эшеныз Казане дышетскыны мыныны малпа. Кӧня ке толэзь ӵоже дышетскыса секретарь-машинисткалэсь ӧнерзэ басьто но, нылъёс Дербышкиысь заводын ужаны кутско.

— Уже кельше вал ке но, асме мукет интыын утеме потӥз но мон, шонергес вераса ми, со ик Люба эшеным, Ижевске кошкимы. Ужаны интыяськимы радиозаводэ, паяльникен катушкаосты бинимы, огшоры кылын верано ке. Отын кык ар ӵоже ужай но берен вордскем палъёсам бертыны малпай. Озьы, 1990-тӥ арын Ӟаны гуртысь клубын заведующей луыса ужаны кутски.

Но отын но кема уг ужа Галина Пантилеймоновна – 1993-тӥ арын Улын Ушма гуртэ картлы кошке. Семьяын кык нылпиоссы вордско — Михаил но Мария. Жаляса вераны кулэ, Галина Пантилеймоновналэн Сергей кузпалыз туж вазь, 2010-тӥ арын кулэм.

«Пудоен ужаны мыным кельше»

— Татчы, Ушмае улыны лыктэме бере, 1997-тӥ арын Ленин нимо колхозэ ужаны интыяськи, али со «Сурнай» общество. Кутски ужаны Улын Ушмаысь фермаын скал кыскись луыса, 2005-2010-тӥ аръёсы «Герат» обществоысь парсь фермаын тырши. «Сурнайын» скал кыскисьёс тырмымтэысь, монэ нош ик отчы ужаны ӧтизы. Мон соглаш луи. Тӥни со дырысен «Сурнайын» тыршисько ини, — ужез сярысь вера Галина апай.

Капчи луымтэез шоры учкытэк, ужезлы кемалась дышем ини кышномурт. Ужез улоно гуртаз гинэ — кыдёке ветлоно ӧвӧл, уждунзэ дыраз тыро, валче ужано адямиосыныз кусыпъёсыз умой.

— Туннэ нуналэ Кушаева Еленаен кыкнамы куспамы тупаса ужаськомы. Пудоен ужаны мыным кельше. Ма, скалъёс мынэсьтым кырӟамме кылыса, пельёссэс выллань карыса ик кылзӥсько, кызьы соосын ужаны уз кельшы? — серекъя Галина Пантилеймоновна.

Мынэсьтым паймемме шӧдыса, кышномурт веранзэ азьланьтӥз…

«Ужасько мон кырӟаса-кырӟаса»

Шонергес вераса, удмурт кырӟанэз кырӟаны кутскиз. «Тон мынам сюлэм висёнэээ…». Жингрес, чан-чан куаразэ кылзӥськыны тыршыса, кырӟанлэн мукет чуръёсыз йыре ӧз кыле ни.

— Мон кырӟаны туж яратӥсько. Кырӟанэн мон улӥсько, ужасько. Огпол Фёдорова Лизаен Казаньысь радиое мыныса но кырӟаны быгатэммес возьматӥмы ини, — шуэ Галина Пантилеймоновна.

Кырӟаны Ӟаны гуртысь клубен кивалтыкуз кутскем, дыр, шуыса малпаськем вал но, янгышаськем — та ӧрен тунсыкъяськонэз школаын дышетскон дырысеныз кылдэм вылэм ини.

— Школамылэн директорез, Ермаков Иван Васильевич, фольклоре ветлытӥз милемыз, удмурт лулчеберетэ со кыскиз шуыны кулэ. Солэн тыршеменыз пичи дырысен кырӟаны, эктыны яратӥ. Со бордысен ваньмыз кутскиз ини. Туннэ нуналэ тани Галина Денисовна Петрова пӧртэм конкурсъёсы, фестивальёсы пыриськыны ӵектыса улэ. Мон ведь Покчи Лӧзяысь «Вуюись» ансамбле ветлӥсько. 2019-тӥ арын ансамбленымы Казаньын ортчись «Широкая масленицае» пыриськимы. Менделеевскын, Бавлыын республика масштабен ортчем Гырон быдтонъёсы пыриськимы. 2013-тӥ арын Казаньын ортчись Универсиадае но пыриськимы. Огъя вераса, коллективмы мыло-кыдо, кивалтӥсьмы но сыӵе, соин нокыӵе ужрадъёслэсь палэнэ ум кылиське.

Галина Пантилеймоновна, кырӟаны но эктыны яратэмез сяна, яратэ на вылэм удмурт дӥськутъёсты люканы. Туннэ нуналэ солэн коллекцияз вить удмурт дэремъёсыз, сизьым айшетъёсыз, куинь камзолъёсыз вань. Со сяна, нылкышно бигер но цыган костюмъёсыныз но ушъяськыны быгатэ. Дорысьтыз мунёосыз гинэ но солэн пӧртэм чебер дӥськутъёсын дӥсятэмын.

— Удмурт дэремъёсы анаелэсь кылизы. Мукетъёссэ ачим кулэ карыса вурытӥсько. Дэремъёсыным шумпотыса выступать карисько. Мон понна котькудӥзлэн аслаз историез, аслаз дунлыкез вань, — валэктэ Галина Пантилеймоновна.

Собере удмурт кылын нош кӧня ке кырӟанъёсты быдэстӥз.

…Тӥни озьы усто скал кыскисен тодматскон кырӟаны яратӥсь, мыло-кыдо улонэн улӥсь кышномуртэн тодматсконлы пӧрмиз…