Со сяська тӥ понна, солдатъёс, ож лудысь бертымтэ ӧрӟиос!

8-тӥ куартолэзе Ярак-Чурма гуртысь трос функциен центрлэн актовой залаз интыысь библиотекалэн, покчиёзо школалэн но нылпи садлэн коллективъёссы валче Быдӟым Вормонлы сӥзем «Мы — наследники той войны» ним улсын митинг ортчытӥзы. 

Тулыс нош ик лыктэ ас дыраз,
Сяськаен чеберъя улонэз.
Со сяська тӥ понна, солдатъёс,
Ож лудысь бертымтэ ӧрӟиос! 

Люкаськем калыкез ӟечкылаз школа-нылпи сад комплекслэн директорез Ефремова Алевтина Петровна. Со шудбуро улон но сайкыт инбам сӥзиз. Школаын дышетскись нылпиос но садикысь воспитанникъёс, шаермес утисьёсты данъяса, кылбуръёс лыдӟизы, кырзанъёс кырӟазы, чебер дуннемы понна улонзэс сётэм песяй-бабайёссэс, ӵужанай-ӵужатайёссэ буре вайыса, одӥг минут чус сылӥзы.

Актовый залын ужрад ортчем бере, нылпиос но дышетскисьёс, визьнодасьёс но дышетӥсьёс, огъя вераса, вань люкаськем калык мынӥз обелиск доре сяська поныны.

Туж секыт но курыт, куке та югыт дуннеысь кошко егитъёс. 2024 арлэн кутсконаз, кезьыт тол нуналэ, гуртэ вуиз мугорэз юзыр карись ивор. Нимысьтыз ожгар операциын быриз гуртомы — Володя Спиридонов. Калыклы со осконтэм ивор вал. Кулэм нуналысеныз ортчиз ни 4 толэзь. 

Ӵапак 8-тӥ куартолэзе ик Ярак-Чурма гуртысь трос функциен центр доры трос калык люкаськиз. Борддораз Спиридонов Владимир Васильевичез буре вайыса но пыраклы калыклэн тодаз мед кылёз шуыса усьтӥськиз синпель пул. Ужрадэ пыриськизы Владимирлэн семьяез, анай-атаез, матысьёсыз, гурт калык но ёросысь вуэм кивалтӥсьёс – Балтась ёрослэн главаезлэн воштӥсез Сабирзянов Наиль Нургаязович но ёрос военкоматысь ожгар службае басьтонъя но дасянъя ёзэтлэн начальникез Закиров Рифат Рашитович.

Мария Матвеева

Ярак-Чурма гурт