Солдат орденъёс

ДАНИЛОВ ЕГОР ГАВРИЛОВИЧ

II но III степенё Слава орденлэн кавалерез.

Вордӥське 1903-тӥ арын 25-тӥ толшоре Кускем гуртын. Кургем школаын дышетскыса начальной образование басьтэ. Пичи но егит дырыз ортче крестьян ужын. 1930-тӥ арын семьяеныз ӵош вордскем гуртазы кылдытэм «Комбайн» колхозэ пыро. 1932-тӥ арын сое та колхозлы тӧрое быръё. 1936-1937-тӥ аръёсы, шудо улон утчаса, мукет интыосы ужаны кошкылэ. 1937-тӥ арысен нош ик вордскем колхозаз ужа.

Быдӟым ож кутскемен, Егор Данилов но тынӥсь улонэн люкиське — 1941-тӥ арын гудырикошконэ сое армилэн радъёсаз басьто.

Нырысь со военной подготовкаез ортче, обороная лэсьтӥськонэ пыриське. 1943-тӥ ар кутсконысен ожмаськонэ пыриське. Ожгар сюрессэ со пулемётчик луыса ортче. Ленинградэз утёнэ но мозмытонэ, Выборг, Тарту городъёсты, Восточной Пруссиез мозмытонэ пыриське. Мирной улонэ 1945-тӥ арын куарусёнэ гинэ берытске.
Егор Данилов кышкасьтэм ожгарчи вал. Солэсь мӧлязэ II но III степенё Слава орденъёс, трос медальёс чебертӥзы. Со быдэс улонэз ӵоже I степенё Слава орденлы ӵектэмын луэмез сярысь но вераз, со данъетсэ возьмаса улӥз.

Война бере со нош ик вордскем гуртысьтыз «Активист» колхозын бригадир, амбарен кивалтӥсь луыса ужаз, пересьмем бераз бригадаын ужась луиз. Ветеран общественной ужлэсь но ӧз люкиськылы. Гуртоосыз сое гурт кенеше депутатэ бырйылӥзы, со кивалтӥз эштос судэн.
Улонысь кошкиз 1986-тӥ арын 27-тӥ шуркынмонэ.

Гожтэм но туспуктэм Гарифзян Мухамметшинлэн Балтась энциклопедиысьтыз басьтэмын