Соослы пичиысен быдэ вуыны, егитысен секыт ужъёслы дышыны тупам...

Семьяязы соос вить кузя нылпиос луиллям. Атайзэс жугиськон кутскемен валче нырысетӥ нуналъёсаз ик оже басьто. 1942-тӥ арын со ивортэк ыше.

— Атаез ожын бырем. Берлогес покчи сузэрыз кулэм, — веранзэ кутске Наталья Мамыкова, Александра Петровналэн нылыз. — 1948-тӥ арын анаез но операция бере тифен висьыса кулэм. Анай бӧрдыса вера вал, гуртамы вайыны но ӧм быгатэ, Арча шае ватӥмы шуыса.

Озьы Александра пичи дырысеныз сирота  кыле. Жугиськон аръёсы, валамон, солы тужгес секыт йӧтэ: нылаш бусыысь шепъёсты люка, киын ара, сютэм улэ… — Анай трос шуг-секытъёсты адӟыса будэм. Укмыс аресысен араны ветлэм. Таӵе учыр верамез вань. Огпол соос, нылпиос, бусыын ужаса-ужаса жадиллям. Анай отын ик, бусыын, умме усем. Одӥг нылкышно сое сокем жалям, вырӟытыны но лэзьымтэ. Соку анай изьыса шутэтскыны быгатэм. Тӥни таӵе учыр солы пыраклы тодаз кылем ини. Та выллем учыръёс трос луиллям соку, — шуэ нылкышно.

Но секыт улон шоры учкытэк, ӝыт дышетсконо школаын куать классэз йылпумъяны быгатэ Александра апай. Собере дядяез сое дораз пинал утись интые басьтэ. Александра кӧня ке ар ӵоже со дорын улэ. Берлогес Павел агаез доры Ежово гуртэ улыны кошке (агаез агрономлы дышетскем). Отын Александра Петровна дышетскыны но вутске. Дышетсконзэ йылпумъяса, Елена юлтошеныз Балтась ёросысь Ярак-Чурма гуртэ ужаны лыкто, Александра агроном луыса, нош эшез — товаровед. Егит Александралэн татын нокыӵе ӵыжы-выжыосыз но, тодмоосыз но уг луо. Улыны но гуртысь одӥг юртэ интыяське.

— Ӵапак татын агроном луыса ужакуз ик, анай вуоно кузпалэныз, атаен, тодматске. Атайлэн апайёсыныз эшъяськем со, одӥг гуртын улӥллям бере, ӵем пумиськиллям, валче ветлӥллям, шулдыръяськиллям. Тӥни соос анаен-атаез тодматыны малпаллям. Анаез алдаса, соос сое юртэ пыртӥллям но анайлэсь сапегзэ ватӥллям. Анай кытчы пырыны но тодымтэ. Озьы ик атаен матысенгес тодматскиллям но семья кылдытӥллям. Анайлэн анай-атаез ӧй вал бере, кытчы кошкысал ини со? Кылем, — вера Наталья Николаевна.

Ивановъёс 1953-тӥ арын юн семья кылдыто, вить нылпилы улон кузьмало. Людмила нылзы физикая но математикая дышетӥсь, туннэ нуналэ дано шутэтсконын ини, семьяеныз Аксубаевоын улэ. Александр пизы Тетюшиысь педучилищеез йылпумъям, физкультурая дышетӥсь луэм, со но пенсиын ини, Покчи Лӧзяын улэ. Нина нылзы Кукморысь вуриськон училищеез йылпумъям, улэ Малмыжын, со но дано шутэтсконын ини. Геннадий Киров улосвылысь Советск городын дышетскыса, отын улэм, туннэ нуналэ Покчи Лӧзяын улэ, покчи нылзы Наталья Покчи Лӧзя гуртысь нылпи садын возьмаськись (сторож) луыса ужа. Александра Петровналэн дас внукез, тямыс правнукез вань.

Улон Ивановъёсты ас дыраз пӧртэм интыосы вуттэ. Кузпалыз Николай Иванович пединститутэз йылпумъяса, армие мыныса бертэмез бере, ёросысь школаосын дышетэ: Гондыргуртын, Вуж Кушкетын, Покчи Лӧзяын. Нялтас вераса, Покчи Лӧзяысь вуж школаез но со ужаку лэсьтӥллям. Александра Петровна котьку кузпалэныз валче луэм. Кузпалэз Кушкетын ужаку, со та школаын нянечка луыса ужам, интернатын улӥсь нылпиосын вырем, Покчи Лӧзяын ужакуз но интернатын тыршем, выж миськись, нянечка луэм.   

Туннэ нуналэ Александра Петровна Наталья нылыныз Покчи Лӧзя гуртын улэ. Жаляса верано, тазалыкез лябӟемен, ачиз вераськыны ӧз ни быгаты. Синмыз но уг адӟы кышномуртлэн. Но со туж шумпотэ, пересьмон даураз со огназ ӧвӧл, солэн утисьёсыз вань шуыса.