Шумпотыса витиськом, котькуд ар итӥськиськом

Улосвылкуспо акция радъяськиз Удмуртилэн котькуд ёросаз но караз, со сяна Бигер но Башкир Элькунъёсын, Пермь шаерын, Киров улосвылын, Москваын но нимысьтыз площадкаос ужазы. Озьы ик диктант лыдӟемын вал «Мынам Удмуртие» радиолэн но «Удмуртия» телеканаллэн меӵак эфиръёсаз. Кызьы ивортэ «Удмурт дунне», та нуналэ оглом 160-лэсь трос площадка ужам.

Балтась ёрос но та ужрадлэсь палэнэ ӧз кыльы: котьку сямен, таяз аре но куинь зонаын — Покчи Лӧзя, Ӟаны но Ципья шоръёзо школаосын — удмурт диктант гожтон понна площадкаос ужазы. Туж шумпотымон: удмурт кылын тодон-валанзэс эскерыны мылкыд карисьёс ужрадэ пыриськыны луонлык но шедьтӥзы, дырзэс но ӧз жалялэ. Гожтӥсьёс пӧлын вал школаын дышетскисьёс, дышетӥсьёс, шоро-куспо арлыдъемъёс но мӧйы калык. Туэ тужгес арлыдоез диктант гожтӥсь луиз Покчи Лӧзя черкогуртысь 71 аресъем Мария Тургузёва, нош тужгес егитэз — Ӟаны шоръёзо школаысь 13 аресъем пияш Никита Папаев.

Диктантлэн текстэз туэ Семьялэн арезлы сӥземын вал. Нимаськиз со «Семьялэн шудэз». Дасяз текстэз гожъясьчи, «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн кивалтӥсез Елена Миннигараева.

Туспуктэмъёс: Ольга Плотникова, Ӟаны но Ципья шоръёзо школаослэн архивъёссы.