Шуныт пумиськон

Ӵапак та нуналэ вордскем дырысеныз 71 арзэ пусйысал асьме аспалмы — гуртомы, тодмо но дано удмурт гожъясьчимы Н. М. Никифоров. Со сярысь трос ке но веразы, но асэныз Николай Михайловичен мыным огпол гинэ адӟиськыны тупаз. Кыдёкысь (али озьы потэ ини) 1997-тӥ арын мыным, сокугес гинэ школаез йылпумъям но Удмурт кун университетэ заочно дышетскыны пырем егит ныллы, 4-5 толэзь ӵоже Турья гуртысь покчиёзо школаын ужаны тупаз. Пиналъёслэсь тодӥсько на ай милям гуртамы писатель вордскиз ук шуыса верамзэс. Соку Николай Михайлович Киров улосвылын улэм вылэм. Шутэтскон нуналъёсы бертылыкуз, мон ас гуртам тупаськем, дыр. Соин ик нимысьтыз пумиськеме ӧвӧл. 2004 арын Покчи Лӧзя гуртын вордскем тодмо удмурт писательлэсь Г. С. Медведевлэсь 100 аресъем юбилейзэ пусйыку (ми В. П. Камаевен соку ужрадэз нуимы) мон нырысьсэ но, берпумзэ но адӟиськем вылэм Н. М. Никифоровез.

Туннэ мон шумпотыса вераны быгатӥсько, писательлэн вордскем гуртаз куке но улӥ, дышетӥ, солэн ветлэм сюрес кузяз вамышъяй шуыса. Али но та гуртын мынам тодмоосы, матысь адямиосы вань.

Писательлэн гожъямъёсыз асьмелы, гуртын вордскем адямиослы, тужгес но сюлэмлы матынэсь но валамонэсь. Гожтэмъёсысьтыз геройёсыз огшоры улонысь басьтэмын, зэмос сюжетоесь. Пиналъёслы гожтэм веросъёсыз авторлэн укыр но визьнодасесь, ӟечлы дышетӥсесь. Бадӟымгес произведениоссэ ке лыдӟид, лыдӟемъя лыдӟемед потоз азьланьтонзэ, малы ке шуоно соос бордазы кыско адскисьтэм магнит выллем нюжаен.

Н. М. Никифоров трос ӟуч но удмурт писательёсын одӥг радын шуысал ке, ӧй янгышасал, дыр. Ӟуч литератураысь Н. В. Гоголь, М. А. Булгаков, удмуртысь — О. Четкарёв но Ф. П. Пукроков огвыллем темая гожъяськизы. Улонысь паймымон кужым (сверхъестественная сила) кивалтӥз соослэн гожтосазы, кудӥз одӥг лыдӟисез но палэнэ ӧз кельты, пересьсэ но, пиналзэ но бугорез кадь бордаз биниз, люказ. Огшоры гуртысь улонэз, зэмос учыръёсты возьматӥсь, паймымонэсь сюжетъёсыныз Н. М. Никифоров удмурт литератураез узырмытӥз.

Та нуналэ нырысьсэ мон адӟи солэсь рукописьёссэ. Сыӵе чебер но валамон, кышномуртлэн кадь почеркен со гожъяськем вылэм. Музъемозь ик йыбырттыса, тау кареме потэ Балтась ёросысь Вуж Турья гуртлы, огшоры крестьян семьяын вордскыса будэтэм таӵе дано но тодмо адямиез, удмурт калыклэсь зэмос пизэ, Николай Михайлович Никифоровез.

Бадӟым тау Шор Кушкет шоръёзо школалы писателез сӥлы каремезлы но покчиослы сӥзем книгазэ поттыны юрттэмезлы!

Наталия Антонова, Покчи Лӧзя шоръёзо школаысь удмурт кылъя но литературая дышетӥсь