Святой источникмес вӧсязы (+фоторепортаж)

Ӵукна та нуналэ черкын вӧсь ортчиз. Нош Литургия бере черке лыктэм адямиос священникъёс сьӧры крестной ходэн купель доры мынӥзы. Ваньзы источник пала вамыштӥзы, мӧйыос но, нылпиос но, огъя 60-лэсь тросгес адями вал. Инмарлы тау, куазез но умой луиз. Ваньзылэн мылкыдзы но ӝутскемын вал шуыны кулэ – кема витизы ук святой источниклэсь вуэмзэ. Ципьяысь гинэ ӧвӧл, Сырьяысь, Тагашурысь, Сизнерысь но Вуж Ципьяысь но адямиос лыктӥллям.

Отец Георгий верамъя, та праздниклы источникез вуттон понна, черкын ужасьёс шутэтскон нуналъёсты тодытэк ужаллям, тыршиллям. Соослы туж бадӟым тау шуыны кулэ. Озьы ик тау каронмес вуттыны кулэ та празднике лыктэм отец Василисклы (Седмиозёрной монастырьысь иеромонах) но отец Владимирлы (Малмыжысь диакон).

Источник вӧсямын, купель радъямын – табере отчы мылкыд карисьёс вуэн пыласькыны но, ошмесысь ву басьтыны но ветлыны быгато. Святой источникенымы пайдаяськоно гинэ ӧвӧл, сое утьыны но кулэ асьмелы. Ум вунэтэ со сярысь.

Туспуктэмъёс Алеся Жуковалэн