Сыӵе ини ужзы фермаын тыршисьёслэн…

Та нуналъёсы «Смаиль» обществоысь скал кыскисьлы Таисия Николаевна Хрисановалы интервью басьтон понна кӧня ке пол жингыртӥ, но вераськеммы соку ик ӧз луы — Сизнерын сеть начар кутэ вылэм.

Мукет нуналаз ӵукна ньыль час бере телефонам Таисия Николаевналэсь вуэм сообщение сайкатӥз: абонент, пе, сете потӥз. Логикаме «лэзи» но ум йылтӥ малпаськыса кыллисько: Сизнерын сеть уг куты бере, Таисия Николаевна ини Смаиле ужан интыяз вуэм (отын сеть кутэ уга). Кин ке, шуисько, та часэ шуныт валес вылын уйвӧтъёс адӟыса кылле али, нош скал кыскись ини кемалась пыд йылаз, ужан интыяз. Озьы: коть тон огшоры фермаын ужа, коть мегафермаын (Таисия Николаевна ӵапак сыӵе фермаын тырше), котькытын тонэ вазь ӵукнаысен пудо вите. Сыӵе ини ужзы фермаын тыршисьёслэн… 

— Ми, Наташа, — шуэ ачиз Таисия апай та сярысь, — сыӵе режимлы но секыт ужлы дышиськеммы ини. Мегафермаын ужаськомы шуыса, ужмы ӧжытгес яке капчигес шуыны но шонер уз луы. Озьы ик вазь ӵукна султыса ужаны мынӥськомы, бер гинэ бертӥськомы. Лумбыт киослы, пыдъёслы, куслы нагрузка луэ шуэм кыл ведь со. Соин егитъёслэн фермае ужаны лыктэмзы туж уг поты, дыр. Кӧня ке часлы доре бертыкумы дорысь ужъёсты но ужаса вуттыны кулэ ведь али. 

Ӧвӧл, та скал кыскисьлэн ӝожтӥськыса верам кылъёсыз ӧз луэ, кышномурт ӝожтӥськисьёс пӧлысь ӧвӧл, — со мыным, та уж сярысь номыр тодӥсьтэм муртлы, ас ужезлэсь аспӧртэмлыкъёссэ валэктыны гинэ турттӥз.  

Паймоно кадь, кызьы та дырозь Таисия Хрисанова сярысь газетэ гожтӥськымтэмы меда. «Смаиль» обществоысь ушъямон скал кыскисьёслэн одӥгез, со ини ёрос уровеньын но аслэсьтыз адӟем карымон, азьмынӥсь скал кыскись луэмзэ трос пол юнматӥз. Таисия Николаевна Азьмынӥсьёслэн слётазы трос пол Таукарон гожтэтъёсын пусйиськем скал кыскись. Нырысетӥзэ 2006-тӥ арын пыриськем вылэм. Кивалтэтлэн ужамзэ вылӥ пусъемез но дунъямез со понна шумпотымон ке но, ачиз та сярысь ушъяськыны Таисия Николаевна уг яраты. 

Трос аръёс ӵоже пудоосты яратыса ужась Таисия Николаевна ӧнерезъя медсестра луэ вылэм. Эшез Екатерина Пиляева кадь ик (со сярысь 2018-тӥ арын газетамы статья поттӥськеммы вал ини) со 1988-1990-тӥ аръёсы Можгаысь медициная училищеын дышетске но медсестралэсь ӧнерзэ басьтэ. Кык ар ӵоже ӧнерезъя Ижевскын ужаны но вутске.  

— Зэмзэ верано ке, фермае ужаны интыяськытозь, асме кӧня ке ужын эскерыса утьыны вутски.  Ижевскын 1990-1992-тӥ аръёсы медсестра луыса ужай, собере, вордскем гуртам ик картлы кошкыса, Сизнере берытски но кӧня ке дыр ӵоже колхозын ужай, ӧжыт гуртысь клубен но кивалтӥ. 2000-тӥ арын нош ик колхозэ ужаны потӥ, соку Сизнерын ош ферма вань вал али, отын ферма борӟаськытозь, 2004-тӥ арозь, ужай. Нош 2004-тӥ арысен ини Смаиль гуртысь фермаын скал кыскись луыса тыршисько. Скалъёсын ужаны мон дышиськем ини, сюлэмлы матын пото. Милемлы трос скал оскемын ке но, ужмылы ум ӝожтӥськиське, группаысь нылъёсын — Пиляева Катяен, Мубаракшина Гулюсаен — тупаса, ог-огмылы юрттыса ужаськомы. Котькыӵе ужын ог-огдэ валаса, юрттыса ужаны кулэ, соку ваньмыз пӧрмоз, — валэктэ Таисия Николаевна.  

Хрисановъёслэн доразы но пудозы ӧжыт ӧвӧл. Кузпалэныз Иван Ивановичен кыкназы гинэ уло ке но (нялтас вераса, воргорон но кема аръёс чоже «Смаиль» обществоын тырше, со механизатор), соос хозяйствозэс но умой нуыны вутско.

— Нылъёсмы Ирина но Люда картлы кошкизы, ас семьяосынызы уло ини, — шуэ Таисия апай. — Ми кыкнамы гинэ улӥськомы. Но мӧзмыны дырмы уг луы. Али мӧзмыны гинэ ӧвӧл, яратоно ужъёсын вырыны но куддыръя дыр уг тырмы. Кылсярысь, мон керттӥськыны, пыжиськыны яратӥсько. Сяськаосты но туж яратӥсько. Но дорад пудоед трос дыръя, сыӵе ужъёсын вырыны котьку дыр шедьтыны уг луы…

…Дас  тямыс ар ӵоже «Смаиль» обществоын кивалтэтэн но, валче ужано эшъёсыныз но огъя кыл шедьтыса ужа Таисия Хрисанова.

Азьмынӥсьёслэн слётазы трос пол пусйиськемез сяна, солы кӧня ке ар талэсь азьло Балтасьын ортчись Сабантуйын флагез но ӝутыны оскизы, Смаиль гурт поселениязы ортчись Сабантуйёсын но Таисия Николаевнаез ялан пусйыло. Вылаз ик, 2020-тӥ арын кышномуртэз «ТР-ысь сӥё-дано пудо утись» нимен но пусйиллям. Малпасько, солэн азьпалан но ужаз вутскем вормонъёсыз ушъямонэсь луозы но газет бамъёсамы адӟем карымон скал кыскисьлэн но нылкышнолэн нимез али огпол гинэ уз поты шуыса.