Сыӵе тӥни чебер но «сюлмез-кӧтэз позыртон» дыре Семыкед вуэ!
Ма чидалод-а та вакытэ ӵукна султыса уӵылэсь чирдэмзэ, кикылэсь силемзэ, атаслэсь чоръямзэ, шырчиклэсь шуламзэ яке тюрагайлэсь кырӟамзэ кылзытэк?
Нош вуиз тулыс, льӧмпуос пурӟо,
Садъёсын, ӵук ӟардытозь ик, уӵыос чирдо
(Г.Сабитов)
Чидалод-а лудлэсь вож турынэн шобырскемзэ, писпулэсь куаръяськемзэ яке пӧртэм сяськалэсь усьтӥськемзэ адӟытэк? Италмас, льӧмпу, улмопу сяськаяськон вакытэ ик ӧтчазы тани Кутэш гуртын улӥсьёс Семык шулдыръяськонэ. Мон но отчы мынӥ — ас малпанъёсме гожтытэк ӧй чида! Сокем сюлэм поныса, рос-прос малпаськыса, вань кадь пичи янгышъёсты тупатыса, ладэн-ладэн интыяса дасямын вал та гурт шулдыръяськон. Азьло ик инты бырйиллям — Вуколапын: шур дурын, сюрес матын, котькуд ласянь адске, кезьыт тӧллэсь кык паласен гурезь возьма, пинал пужымъёс но выль будэм сусыпуос вожекто — ма, солэсь но чеберез вань меда? Кӧня меда тыршизы футбол, волейбол шудон капкаос лэсьтыны, шонер гожзэ но турынлэсь сузяса тодмоятӥллям, эктӥсь-кырӟасьёслы но инты дасяллям, пеймытлы дасяса тыл но пыртӥллям! Тани ӝоген шулдыръяськон кутскоз — шур дурысь пуртыосын ӝук пӧзе, чорыг лым быректэ, тыл вылын сӥль ӵыжа, эгырен самоваръёс гурлало, калык люкаське.
Шулдыръяськонэз дасясьёс туж тыршиллям: тодӥмы, ма со Семык дыр, кызьы сое азьло дыре пусйиллям, Кутэш гуртлэсь улон сюрессэ туж кыдёкысен син азямы пуктыны быгатӥмы, паймимы, та пичи гуртмы кык поллы бадӟымгес луэм, кибашлы калык отын улэм.
Капчи мылкыд сётэмзэ, сюлмысь гажамзэ возьматыса, люкаськем калыкез ӟечкыланы лыктэм Ѓаны гурт кенешлэн кивалтӥсез но. Вань кадь дасясьёсты нимын-тулын вераны уг малпаськы, малы ке шуоно куд-огзэ гожтытэк кельтыны быгато, соин сюлэмшугъяськымон медаз луы, ваньдылы ик бадӟым тау! Нош бускельме, гурт кузёез, Романов Николай Ивановичез, нимаз ик пусйытэк уг луы. Ас малпанъёссэ быдэстон понна, кӧня эшъёссэ, гурт калыкез, ӵыжы-выжызэ та ужрадэ кыскыны быгатэм, ваньзэ мур малпаса, сюлмысь быдэстон бордын ужам. Семык шумот со — анай-атайёсты буре ваён нунал, соос асьмелы улон сётӥзы, пыд йылэ султытӥзы — котькинлы сое тодыны кулэ. Таяз аре тани, Коля агайлэсь верамзэ кылзыса, ваньмы ик синкыли кисьтӥмы. Озьы тупам, Кутэш гуртын пиналысен сопал дуннее эзелен-а, эзельтэм-а, вазь кошкисьёс трос луиллям. Ваньзэ соосты нимын-тулын буре вайыса, сюлме пыӵась кылъёсын соослэсь лулъёссэс тӧдьы шаръёсын инме келямы, чырты выжыямы лёг лыктыса, синкылиен пытсаськимы. Вераса но уд оскы, вань кадь шаръёсмы каллен гинэ, ваньзы ӵош шай пала кошкизы — вылазы усем сюйзы небыт мед луоз!
Инмарлы тау, улон уг дугды, тани трос гинэ пиналъёс будо милям пичи гуртамы! Эктӥсез — эктэ, кырӟасез — кырӟа, домраен но арганэн шудо, котькуд ласянь ӵошатско, «Анай, атай но мон» вожвылъяськонэ вожмаськыса пыро.
Шулдыръяськон азьланьтӥське, тани Абагурезе Тол бабай вуэм, милям шулдыръяськемлы ӧз чида меда? Малы ке дорамы ӧз лыкты, бакчае пуктэм будосъёсыз, улмопу сяськаосыз кынтонлэсь жаляз луоз. Озьы ке но, скутере пуксьыса, сюрес кузя кузьымъёс куяса кельтэм! Ох, шумпотон вал ини со! Кузьымъёсыз чырткемъёс гинэ басьтыны вуизы — кужмо бызьыны кулэ, гурезе тубыны секыт. Ма кыӵе но шудон-ӵошатсконъёс малпаллям азьветлӥсьёс: 80-тӥ аръёсын луэм шудонъёсмес но киямы кутӥмы, пӧртэм быгатонзэс возьматӥзы пичиос но, быдэ вуэм нылъёс но пиос, воргоронъёс но нылкышноос!
Кызьы шуо улонын, «ма ке но вылез — со кемалась вунэтэмез». Тани Коля агаймы 30 ар ортчем бере концертын возьматэм номерзэ выльысь возьматоно карем — паймытӥз туала егитъёсты, дораз лыктыса но ӧм, пе, валалэ, кытысь меда сыӵе пичи кык воргоронъёс потӥллям. Нош ӟучъёс шуизы «классный номер!» Кема аръёс ӵоже пинал мылкыд тыныд, Коля: эктӥсь, кырӟась, чорыгась но пӧшурась, ужась воргорон, атай но песятай. Пичи гинэ тылгизьылэсь яркыт, шуныт но бадӟым тылӝу кылдытыны быгатӥськод, соин но тон доры котькин кыстӥське!
Шулдыръяськон уйшорозь кыстӥськиз, эктыса но кырӟаса Вуколапын вольыт ик луиз. Вань ёросэз югдытыса но сайкатыса, бадӟым салютэн йылпумъяськиз та нунал. Вуюись кадь тасмаё удмурт дӥськутэн чебер апайёслэн куно каремзы, шулдыръяськыны быгатэмзы кемалы син азямы
кылиз. Нош огзэ вераме потэ, куд-ог дэрем сӧзулъёс янгышен чебермамын, тасмаоссы огпасьта вуремын, сое вуонояз тупатыны кулэ, котькуд дӥсьлэн ас радэз вань ук. Со сярысь туж умой гожтэм вал «Азьлане» газетэ Ижкарын улӥсь Верош апай, сое ке лыдӟоды, чебер апайёс, дӥськутъёсты шонер вурем луозы, яке удмурт кылъя дышетӥсьёслы вазиське, соос тӥледлы котьку но юрттозы.
Азьло дыре асьме палась удмурт гуртъёсын улӥсьёс, Семык возе люкаськыса, шулдыръяськиллям, табере со йылос быриз ке но, гурт нунал ортчытонъёс сяме пырыса кыльыны кулэ. Мон малпамъя, таӵе шулдыръяськонэз кык гуртэн радъяны быгатӥд ке, капчигес луысал: гуртъёс но пичиесь кылизы, дасяськисьёслы но секыт, нош бускель гуртэн огазеяськыса ортчытӥд ке, ӵошатсконъёс но чырткемгес луысалзы — котькуд гурт ваче сылыны тыршоз, адскыса вераськонъёс но мылкыдо луысалзы, калык но тросгес люкаськысал. Тани таяз аре Кушкетын но Кутэшын огнуналэ тупаз: Кушкет нылъёс гуртазы мыно, Кутэш пиос гуртазы кыльыны малпало. Соин ӧжытак кыстаськон кылдэ куд-ог семьяосын, бертэм куноос но кытчы луыны уг тодо. Ушъямон Кушкет, Турья, Починка, Кутэшъёс — мукет гуртъёс малы ке но шып гинэ пуко. Нош Кутэш калык, тулыс ужъёс макем трос ке но, лулчеберетъя ужасьсы ӧвӧл ке но (клуб ӧвӧл та гуртын), шулдыръяськонэз дасяны быгатэм! Солы паймимы, берен нуналаз шай вылэ мыныны потӥмы но, Вуколапын одӥг жуг-жаг но кыльымтэ, ӵукна ик султыса ваньзэ утялтӥллям! Азьланяз но тӥледлы выль малпанъёс, капчи мылкыд, ужады азинсконъёс, юн тазалыкен тупаса улон сӥзисько.
Нина Андреева,
Киров улос.
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев