Сырья гуртлэн ортчемысьтыз

Покчи классъёсын дышетскыкуз ик визьпог луэменыз РОНО-ысь инспекторъёсты но паймытъяз. Дышетскемез сизьым класс гинэ ке но, туала профессоръёслэсь со чик но кулэс ӧвӧл. 1950-60-тӥ аръёсы гурт калыкез паспорт сётытэк кужмысь гуртэ кельтон политика ӧй ке луысал, Яким Степанович академикозь но тубысал, дыр. Со теоретик гинэ ӧвӧл, практик но. Мар малпа, ачиз ик лэсьтэ. Тодон-валанъёссэ шараяз Ципья электростанциын, пилорамын, колхозын ужакуз. Котырысь гуртъёсын сое тодӥсьтэмез ӧвӧл, дыр. Нимысьтыз дышетскем ӧнерчиослэсь тупатъяны быгатымтэ арбериоссэс куштыса лэзьыны жалясьёс солы вазиськыло. Вань улытозяз кӧня меда часъёс, мисьтаськон, вуриськон машинаос тупатъяз ни дыр! Нокинэ но берыктыса уг лэзьы со: кусозэс но тышкаса сётэ, мызган-кубызъёслы но «лул понэ» - кыкетӥ улон кузьма. Мопедзылы поршень но ачиз ик коып (форма) лэсьтыса, дюралез ӵыжатыса кисьтэ. Часъёслы, машинаослы воштос ёзъёс но ачиз лэсьтэ. 1971-тӥ арын басьтэм мисьтаськон машиназы али ке но час кадь ужа...

1970-80-тӥ аръёсы аракы пӧзьтонэн нюръяськон вакытэ милициын ужасьёс гуртэ лыктыса, коркая утчалляськыса ветлозы вал. Соос Яким Степановичлэн юртаз но кожылӥзы. Но дунне вылын луымтэ капка, корказь пуннетъёссылы, улыно-вылыно корказязы калэн кыскыса тыл ӝуатонзылы паймыса, зарни киё муртлэн мурӝолъёсаз утчалляськыны ӧз дӥсьтэ, таӵе кузёез ӧз исалэ.

«Сталевар, конструктор» гинэ ӧвӧл, Яким Степанович историк но. Паймымон тунсыко маде со атаезлэн Нырысетӥ Дунне оже пыриськемез, пленысь пегӟыса бертэмез сярысь, Граждан ож вакытэ юртазы вуэм винтовкалэсь историзэ... Сырья гуртлэсь историзэ но быдэс зӧк тетрадь тыр гожтӥз. Кӧня ке люкетэныз тодматэммы потэ газет лыдӟисьёсмес но.

Асьме палъёсысь удмурт гуртъёслэсь ортчемзэс лыдэ басьтоно ке, Сырья (Серья) гуртлы XVII-тӥ дауре нэгыз понӥськем. Та палъёсын со вакытэ котырак нюлэс луэм. Татчы пӧйшураны ветлӥсьёс нюкъёсысь ческыт но юзмыт ошмес вуэз туж кельшытӥллям, соин ик татчы интыяськоно луиллям. Гурт кылдон аръёсы татын пылатымтэ (крашине пырымтэ) удмуртъёс улӥллям. Тае соку луэм вашкала нимъёс но юнмато: Баймет, Дыкыр, Бытлӥ, Канӝы, Эке, Менка, Доут, Каляка, Дусак, Эсак, Коньык, Бегей, Ион но мукет. Али дыре та нимъёс корка, выжы нимъёсын гинэ кылемын ини. Сама бабайлэн бакча пумаз нюк дурын Керемет вӧсяськон инты луэм, отын кулэмъёслы курег, ӵӧж, ӟазег вандыса вӧсяло вылэм. Выллапал урамтӥ тубыса ог 300 метр кемын 30 сотых быдӟалаен тэль будэм, кызо-ньылпуо тэль кушын толэс вандыса вӧсян инты луэм, сое «Толэс вӧсян тэль» шуиллям. Соку Сырья гуртлэн шаез Вуко гурезь бамын луэм. Кулэмъёсты зӧк корез путкарыса лэсьтэм коросэн (гроб) ватылӥллям. Со тусь выллем луэм, корослэн вылкыметэз но тусь кадь луэм. Кулэмъёсты пыдынызы лымшор пала карыса ватӥллям. Ципья гуртэ черк лэсьтэмзы бере, удмуртъёсты крашине пыртыны, адямиослы ӟуч нимъёс поныны кутскиллям. Вуко гурезь бамысь шае берло ватэмъёслэсь кӧнязэ ке гудӟыса поттӥллям, вӧсяса, Ципья шае христиан йылолъёсын ватӥллям.

Улыса-вылыса, гурт бадӟымам, татчы Малмыжысь кык ӟуч семья лыктэм. Кузьма нимо ӟуч воргорон Вылын ошмес нюк дуре юртъер пуктэм. Кыкетӥез ӟуч семья - Троцианскийёс (Сама бабай) - корказэс гуртлэн лымшор пумаз пуктӥллям. Кузьмалэн нылпиосыз луымтэ, кышноеныз гинэ улэм. Арлыдазы вуэмзы бере, соос берен Малмыже кӧчиллям. Соос юртсэс Сапожников Семёнлы вузаллям. Семёнлэн куинь пиосыз кышнояськемзы бере яна пото. Максим пиез Бечейёс бере гурт пуме корка пуктэ. Карпа пиез Эсак Васьлей бере гурт пуме интыяське. Нош Николай атай юртаз кыле. Берло соосты ваньзэсты Семон Микуайёс шуо.

Сырья гуртын вашкала дырысен тыршись, киужлы усто калык улэм. Нылкышноос етӥн мертчанлэсь шорт черсӥллям, солэсь дэра куо вылэм. Дэралэсь вылдӥсь, ыштыр, пуйыос вуриллям. Нош воргоронъёс тӥр ужлы усто луиллям. ӝӧк, пукон, шкаф выллем корка пушкын кулэ луэм арбериосты ваньзэ асьсэ киосынызы лэсьтӥллям. Плотниковъёслэн пиоссы уробо, уробо питран, дӧдьы, салазки лэсьтонэн выро вылэм, нош Сапожниковъёслэн пиоссы гын сапег погыллялям. Гын сапег погылляны палэнэ - Киров улосэ потало вылэм.

Гуртын куинь дуриськон куала луэм: Макарлэн (берло со ӝуаз), Мирон Педорлэн но Пильмон Васьлейлэн. Дуриськон куалаоссы дорын обиньёссы луэм. Калякаослэн (Ивашовъёс) Арборка шурын вукозы ужам, вуколы матэ обиньзы сылэм. Вукое изыны ваем нюргес ю тысез отын куасьтӥллям. Калякаос туж тыр улӥллям, улыно-вылыно кык корказы луэм: одӥгез кирпичлэсь, кыкетӥез зӧк коръёслэсь. Кирпичлэсь но излэсь ӝутэм кузь кладовойзы (1937-1939-тӥ аръёсы сое клуб карыса тупатӥзы), нош ик одӥг пичигес кладовойзы луэм (сое берло магазин каризы). Кык кладовой куспын корлэсь ӝутэм кык амбар сылэм. Гидкуазязы кӧлан но дӥськут возён кеноссы, кенос улын тыриськон но ю тысь мертан инты луэм. Калякаослэн семьяязы вить воргорон луэм. Со дыре музъемъёсты воргоронъёслы гинэ люкиллям. Соин ик Калякаослэн музъемзы но бадӟым луэм. 80 гектар музъемзэс медъяса ужатӥллям. Аран, кутсан, ю тысез шертон, изон выллем ужъёсты но медъяськемъёс быдэсъяллям. Асьсэлэн вукоязы изэм пызьзэс Казаньын вузаллям, со уксёлы вузъёс басьтӥллям, гуртысь лавкаын вузаллям. Соослэн Ципья базарын но татчы лыктэмъёсты чаен сектан интызы луэм. Калякаослэн куать валзы луэм, соосты медъяськыса Асан Сандыр (Сапожников) утем. Огъя вераса, Калякаослэн, валъёссы сяна, 4 скалзы, 30 ёрос ыжзы луэм, озьы ик соос дасоосын ӟазегъёс, ӵӧжъёс, курегъёс вордӥллям. Бакчаязы 50-лэсь уно улмопу будэм, 25 муш умортозы, муш корказы луэм. Калякаосты 1930-тӥ арын сентябрь толэзе раскулачивать кариллям, Красноярск улосысь Енисейск город дорысь шахтаосы ужаны лэзиллям.

Сырья калык вашкала дырысен огкылысь но кельшыса улэм, праздникъёсы дэмен шулдыръяськонъёс ортчытъям. Кылсярысь, Акашка празднике быдэс гуртэн шулдыръяськиллям. Та нуналэ «Акашка ворттылон» шуэм йылол ортчытон сяме пыремын луэм. Соку нюк сопалась возь вылэ мыныса, така вандӥллям, така сӥлен ӝук пӧзьтӥллям, со ӝукен «Акашка ворттылонэ» пыриськисьёсты сюдӥллям, шулдыръяськиллям. Выль кенэз вал вылын ворттылытон сям но туж тунсыко луэм. Та сям пумысен одӥг учырез кылэме вань. Илья Петыр кышно соку выль кен луэм. «Акашка ворттылон» дыръя сое но вал вылын ворттылытӥллям. Вал вылэ пуксем выль кен Илья Петырлэн капкатӥз пырыкуз, капка сьӧрын сылӥсь одӥг мурт капка борды бодыен туж кужмо шуккем но валзэ кышкатэм. Вал кышкаса палэнэ тэтчем ке но, выль кен вал вылысь усьымтэ. Соку отын луэм калык «ӧз пышмы ведь» шуыса, горыны кутскем.

(Кылемез вань).