«Сырья гуртэз чагыр экранын возьмато» — Леонид Сапожников

Удмурт кино — со асьме понна шер пумиськылӥсь узырлык. Туннэ нуналэ удмурт кылын уськытэм киноос чиньыен лыдъямон гинэ. Но соос пӧлы табере нош одӥг любительской, Римма Николаевалэн «Пӧртмась вень» спектаклезъя, Сырья калыклэн тыршеменыз уськытэм кино ватсаськиз. Зэм, сое профессиональной кино шуыны уг луы. Шудӥсьёсыз но, снимать карисьёсыз но та ужлы дышетскемын ӧвӧл. Но сырьяослэн тае собыдӟа тыршемен лэсьтэмзы синмаськытэ но, паймытэ но.

«Тӥледын валче шумпотӥсько, удмурт шыкысамы эшшо одӥг лул узырлык устаськиз шуыса. Тодӥськоды на, дыр, кытысь гинэ, кыӵе гинэ ёросъёсысь, улосвылъёсысь ӧз жингыръялэ, куке асьме гуртамы асьме нылпиосмылэн, асьме гуртоослэн пыриськемзы улсын ТНВ каналын арысь аре огез бӧрсьы огез возьматъязы Сырья гуртын уськытэм киноосты. Нырысетӥез вал «Унябей сяськаос», кыкетӥез — «Бельгы», куинетӥез — «Удмуртские танцы Шошмы» фильмъёс. Инмарлы тау, Сырья гуртэз чагыр экранын возьмато», — таӵе кылъёсын усьтӥз Леонид Дмитриевич та ӝытэз.

Сырьяын малы кино уськытыны малпаллям? Кинолэн историез

Тросэз юалозы: кинлэн йыраз лыктэм меда кино уськытыны? Кинолэн историез таӵе. Кылем арын асьме ёросысь гурт клубъёс азе пуктӥллям сыӵе ужпум: спектакль дасяно, куспазы вожвылъяськоно. Соин Леонид Дмитриевич азьын но, Сырья гурт клублэн кивалтӥсез луэ бере, кылдэм юан: кытысь пьеса шедьтоно, маин калыкез паймытоно? Солэн аслаз верамезъя, «бигеръёслэн со (пьесаоссы — ред.) пумтэм-йылтэм, но удмуртъёслэн сыӵе узырлыксы ӧвӧл шуымон, ӧжыт». Бугыръяськем со «Удмурт дунне», «Ӟечбур» газетъёсын, «Инвожо», «Кенеш» журналъёсын но, интернетын но. Бератаз шедьтэм Римма Николаевалэсь «Пӧртмась вень» пьесазэ. Нылпиосты люкаса пьеса пуктон бордын ужзэс кутскиллям гинэ но, Леонид Дмитриевичез лэзиллям Казане дышетскыны. Озьы спектакль пуктон ужлэсь сое мозмытӥллям. Но дышетскыса бертэм бераз, нылпиосты люкаса, соос малпало та спектакльлэсь кино пӧрмытыны. Озьыен, сырьяослэн спектакльзы, гуртын репетициос лэсьтыса, трос пол пумиськылыса, съёмкаос лэсьтыса, кинолы пӧрмем.

Кин уськытэм, кин монтировать карем?

Вань юанъёслы одӥг ответ — ачиз Леонид Дмитриевич. Сое та дырозь тросэз тодэ вал клублэн заведующиез, «Сырья зоутъёс» коллективлэн кивалтӥсез, Балтась удмуртъёслэн азьветлӥсез шуыса. Нош со вылаз ик режиссёр но, оператор но, монтажёр но вылэм. Ачиз, аслаз камераеныз кинозэ уськытэм. Вераны кулэ, артистъёс но ваньмыз Сырья гуртысь — адске вал, нылпиос возьдаськизы, соослэн камера азьын асьсэды возьматэмзы луымтэ на, дыр, та дырозь, но озьы ке но туж тыршыса, асьсэ рольёсазы «пырыса» шудӥзы. Лариса Чернова но Ольга Чернова профессиональной актрисаос кадь рольёссэс быдэстӥзы — камералэсь кышканзы но, возьдаськонзы но ӧвӧл. Молодцы! Уськытэмын но кино та гуртын ик. Быдэс корказэс съёмочной площадка карыны сётӥллям Антонида Давыдова, Александр Чернов, озьы ик кинолэн люкетъёсыз уськытэмын Семён Черновъёс, Мария Яковлеваос дорын но. Бельгыын шулдыръяськем кадръёс Сырья нюлэскын уськытэмын, шундыӝужанэз пумитаны но Сырья возь вылэ ӵукна куинь часэн мынӥллям. Съёмочной процессы шулдыр ик луэм. Тани мар вера одӥгез валтӥсь ролез шудӥсь ныл, Ангелина Камашева: «Монэ та спектакльын валтӥсь ролез шудыны ӧтемзы бере, пумит ӧй луы. Малы ке шуоно мон соку ик валай, та туж тунсыко ужрад луоз шуыса. Нырысь возьдаськи, но собере дыши кадь. Мыным туж кельшиз та кинолэн сюжетэз. Тужгес ик со интыез, кытын валтӥсь героиняез кызьпу арамаын ӵук ӟардонэз пумита. Озьы ик та киноын шудэме юрттӥз мыным матынгес тодматскыны калык дӥсьёсын. Оскисько, учкисьёслы киномы кельшем, дыр, шуыса». 

Мар шуизы кино сярысь куноос?

Кино учкыны, гурт калык сяна, Ципьяысь ӧтем куноос, асьме удмуртъёслэн «аксакалъёссы» но вуизы — Пётр Григорьевич Чернов кузпалэныз Мария Фёдоровнаен но Василий Фёдорович Трофимов.

— Ӧжыт калыклэн аслэсьтыз кылзэ, йылолъёссэ, лулчеберетсэ, валляна зоутъёссэ азьпала нуон — со капчи уж ӧвӧл, тае ваньмы но валаськомы. †ошатоно ке бигер калыкен удмурт искусствоез, кырӟанъёсыз, литератураез — ваньзэ но — шӧдӥськоды, бигер калык аслэсьтыз кылзэ, йылолъёссэ, лулчеберетсэ ыштонтэм понна ваньзэ лэсьтэ. Со калык туж азьпала вамыштэмын. Асьмелы туннэ Леонид Дмитриевичлэн возьматэмез, татчы пиналъёслэн пыриськемзы — со туж но туж умой. Но мынам таӵе мылкыд каронъёсы вань — азьпалан возьдаськытэкгес, чебергес, вераськысагес, шулдыргес возьматоды шуыса оскем потэ. Та туж кулэ асьмелы. Анай кылэз тазьы валче ӧм ке возьмалэ, со ышыны быгатэ. Вань кадь Сырья калыклы, Леонид Дмитриевичлы тужгес но, таӵе уже пыриськемзы понна, туж бадӟым тау. Леонид Дмитриевич кадь энтузиастъёс ӧз ке луэ, кылмы быроз шуыса малпасько. Соин азьпалан но таӵе ужъёсты — концерт-а со, кино-а, люкаськыса шулдыръяськонъёс, шудонъёс-а — йылолъёсыз вунэтытэк, азьпала нуимы ке, асьмелы но шулдыр луоз, будӥсь пиналъёслы но, мӧйыослы но, — вуттӥз малпанъёссэ Пётр Григорьевич.

Василий Фёдорович но аслэсьтыз верано кылъёссэ ватсаз: «Татчы лыктыкум ик малпаськи ни, Сырья калык эктыны но, кырӟаны но усто шуыса. Леонид Дмитриевич кыӵе ке концерт дасям, дыр,  шуыса малпай. Утид ке, татын художественной фильм адӟим. Таӵе сюлме небыт пыӵась, кельшись киноос кемалась адӟись ӧй вал ни. Телевизорын, асьтэос тодӥськоды, ыбылӥсько, вийыло, пуштыто, ӝуато — спектакльёс ӧвӧл. Нош тӥ молодцы, мон туж шумпотӥсько. Пиналъёс, егитъёс сокем тыршыса, быгатыса шудӥзы соослы оскем рольёссэс чылкыт удмурт кылын. Мон тани ачим туж умой удмурт кылын вераськыны уг быгатӥськы ни, малы ке шуоно 1-тӥ классысен 10-тӥ классозь милемлы удмурт кылъя одӥг урок но ӧз луы, аръёс сыӵе вал. Но тӥ эн возьдаське удмурт кылын вераськыны. Табере та кинолэсь кыкетӥ серизэ витём ни. Молодцы егитъёс, туж умой шудӥзы. Ларисаен Оляез (Чернова Лариса но Чернова Ольга — киноын рольёс шудӥзы — ред.) ми тодӥськомы ни ваньмы но, соос ини асьмелэн «заслуженной артистъёсмы». Леонид Дмитриевичез но нимаз ушъяно. Балтась районын самой бадӟым сюлмо, удмурт калык понна сюлмаськись, азьветлӥсь, творческой ужась, удмурт пияш — со Леонид Дмитриевич вал, али но со озьы ик».

Кинолэн премьераяз Сырья гурт калык гинэ люкаськем вал — гуртазы уськытэм киноез нырысетӥен луыса кин дунъялоз бен? Малпасько, вуонояз та киноез удмурт гуртъёсын, оло, бигер гуртъёсын но возьматозы, вӧлмытозы. Оло, сырьяослы, каллен гастрольёсы но дасяськыны кутсконо.