«Сютэм улон милемыз но палэнтӥ ӧз ортчы»

Черод вуиз лыдӟисьёсты Вылын Ушма гуртын улӥсь арлыдоосын тодматыны.

Шумпотымон: Вылын Ушма бадӟым гурт ӧвӧл ке но, ож дырозь но ож дыръя вордскем нылпиос татын шӧдскымон трос али. Жаляса гинэ пусъеме потэ, тросэз соос пӧлысь вераськыны соглаш ӧз луэ — кин ке газетэ потыны кышка, кин ке возьдаське. Но кызьы луиз ке но, кӧня ке арлыдоосын матысенгес тодматскыны быгатӥмы ик. Соин кӧня ке номеръёс ӵоже Вылын Ушмаын улӥсь песянайёсын но песятайёсын тӥледыз но тодматомы.

Гуртысь самой мӧйы но со дыре ик чырткем песянайёс пӧлысь одӥгез Марфа Артемьевна Добромыслова луэ шуи ке, уг янгыша, дыр. Визьмо но тунсыко вераськись, ваньзэ лад-лад карыса валэктыны быгатӥсь Марфа апай куноослы но пумит ӧвӧл, вераськыны но котьку дась.

Марфа Добромыслова (ныл фамилиез Петрова) вордскемын 1937-тӥ арын Вылын Ушма гуртын огшоры крестьян семьяын. Нокытчы кошкытэк, со вань улонзэ та гуртын ортчытэм.

— Гумыры ӵоже та гуртын улӥсько. Вордски огшоры семьяын, пичи дырысен трос курадӟонъёс пыр потоно луиз — улонэ секыт дыръёслы тупаз. Анае но, атае но колхозын ужазы. 1942-тӥ арын атайме жугиськонэ басьтӥзы, мыным соку ньыль арес вал. Ми палась соку атай сяна нош кык воргорон оже кошкиз, соос пӧлысь одӥгез милям гуртысь, мукетыз Шор Ушмаысь вал (уг ке янгышаськы, одӥгез Ураков, мукетыз — Степанов). Соосты келяны мынӥсь адямиосын ӵош ми но анаеным мынӥмы. Шор Ушмае вуытозь гинэ келяны быгатӥ атайме. Мыным, пичи вал бере, Балтасе вуытозь мынӥсь валэ пуксьыса мыныны косӥзы. Но валлэн кузёез монэ пуксьыны ӧз лэзьы. Озьы мон бӧрдыса-бӧрдыса огнам дорам бертыса кошки. Надя эше но монэным ӵош келяны мынэм вал, но сое, ӧжыт бадӟымгес луэмысьтыз, валэ пуктӥзы но со оже кошкисьёсты Балтасе вуытозь келяны быгатӥз. Анае но атаез келяз. Нош монэ берыктыса лэзизы, вань сюресэз бӧрдыса бертӥ, монэ кенаке соку кышкаса «Мар луиз, нылы?» шуыса пумитаз.., — тодаз вае Марфа апай.

Пичи Марфалэн атаез жугиськонэ кошкыку, солэн Анатолий выныз луэм. Атайзэс егитэн оже ыстӥллям, выныз воксё пичи луэм со дыре. Анайзы соосын, кык пичи нылпиосыныз, огназ улыны кылем. Песяйзы луэм ке но, та дуннеысь со вазь кошкем.

— Атай жугиськонэ кошкем бераз песяймес ӧз адӟы ни. Мон ачим но песяйме пырак уг тодӥськы ни, вазь кулӥз со. Соин анаймылы туж секыт йӧтӥз. Пӧртэм ужъёсты быдэсъяз. Кытын мар ужаны косӥзы, сое быдэстӥз. Гужем кизёно вал, собере — арано. Ваньмыз киын ужаськиз ведь. Али анай ӧвӧл, ми но, нылпиос, анайёсмылэсь кыльытэк соосын огкадь ужамы, — шуэ Марфа Артемьевна.

Солы ас дыраз туж трос курадӟыны, пичи дырысен секыт ужлэсь мар луэмзэ тодыса будыны тупам. Марфа апай анаез сьӧры бусые ужаны ветлэм, соин ӵош уриськем. Сиёно турынъёсты люкаса дораз ваем, со турынъёслэсь анайзы шыд пӧзьтэ вылэм. Турнан вакытэ Марфа апай озьы ик чуньыбыж куар люкам, собере солэсь кӧмеч но нянь пыжо вылэм.

— Али жугиськон бере но кӧня аръёс ӵоже улон секыт вал. Кӧня ужамы… Ужтэк пукемме мон тодам вайыны но уг быгатӥськы. Пичи уробоен турын, пу нуллӥськомы вал Толяен кыкнамы. 1945-тӥ арын атаймы жугиськонысь бертӥз ке но (жугиськонын со пленэ шедем но Латвиын ужам), улонмы капчи луиз шуыны уг луы. Трос семьяосты кадь ик, сютэм улон милемыз но палэнтӥ ӧз ортчы. Яра али юлтошъёсынымы ог-огмылы юрттылӥмы. Табере эшъёсы пӧлысь огез но ӧз кыльы ни, ваньзы кулӥзы.., — тодэ ваёнъёсызлы сётске песянай.

Статьяез пыр-поч «Азьлане» газетысь лыдӟыны быгатоды.