Табань сиён, гурезьысен нискылан но эшъяськон

Котькуд калык праздниклэн — аслаз сямъёсыз. Тани, кылсярысь, Йӧвылэпотонэз гинэ басьтомы. Табаньтэк но салазкиен нискылантэк та праздникез син азе пуктыны уг луы. Эшшо эшъяськонтэк, шуысал на мон. 

Турья гуртын Йӧвылэпотонлы сӥзем шулдыръяськон но туэ зэмос эшъяськон праздниклы пӧрмем.

— Туэ туж трос адями люкаськиз, Бурнак гуртысь эшъёсмы трос вуизы. Туж шумпотӥ. Ӟаныысь но, Починкаысь но, Сизнерысь но лыктэмъёс вань вал. «Борнак» возёсмылэсь кивалтӥсьсэ но, гурт поселенилэсь главазэ но ӧти вал. Соос но семьяосынызы лыктӥзы, саламъёсын. Куать-а, мар-а самоварен чай пӧзьтӥмы, со но ӧз тырмы. Плов пӧзьтӥмы, табань пыжимы. Нискылан гурезьмы но вань вал. Тракторен лымы донгаса, огъя тыршемен лэсьтӥмы сое. Мыло-кыдо нискыламы, шулдыръяськимы. Ваньмы мылкыдъёсмес усьтыса, мызган гуръёс чузъяськем улсын кырӟамы но, эктӥмы но та ӝытэ. Бускель гуртъёсысь калык но палэнын ӧз сылы, милемын ӵош шулдыръяськиз. Данъяськисько, эшлыко улӥськомы шуыса, — шумпотыса вера Турья клубен кивалтӥсь Ирина Исьмекова.

Йӧвылэпотон праздникез татын кӧня ке ар ӵоже ини аспӧртэмлыко ортчыто: гуртсэс куиньлы люкиллям но арлы быдэ черодэн вошъяськыса та праздникез радъяло вылэм. Огъя вераса, одӥгъёсыз радъяло, мукетъёсыз соос доры куно луыса лыкто. Тӥни озьы арлы быдэ вошъясько. 

Турья гуртын кылем арын вуж клубзэс, ярантэм югдуре вуэмын шуыса, борӟазы но 2015-тӥ арын ужзэ дугдытэм покчиёзо школалэн юртаз выжтӥзы. 

— Озьы, табере мон школалэн юртаз ужасько. Кылем арын толшоре, ёросысь исполнительной комитетлэн кивалтӥсезлэн Айдар Хайрутдиновлэн кивалтэмез улсын нимысьтыз комиссия лыктэм но «тупатъянлы ярамон ӧвӧл» шуыса йылпумъян лэсьтэм бере, вуж клубмес борӟазы (солэн фундаментэз но быдмемын вал ини). 2015-тӥ арын борӟаськем школамы вань вал милям: кык класс, коридор но столовой. Кылем арын февраль толэзе со школаез умой югдуре вуттон понна ужъёс кутскизы. Каллен-каллен отын ужаны кутски. Со али радъяса быдтымтэ, пушкыз лэсьтэмын: колхоз юрттыса но отысь-татысь пайдаяськонын луэм арбериос вайыса. Педпаласен кык укнозэ блокен борӟазы, укнолэсь одӥгзэ ӧс каризы но табере урам паласен пырон ӧсмы вань ини. Борддоръёсыз обшивать каремын ӧвӧл на, со ужъёсты «Борнак» возёслы быдэстыны косӥзы. Возёсмы ик выль занавескаосын но юрттӥз. Выль сельсоветмы туж ушъямон. Мебелен юрттӥз, шедьтӥз, ачиз вайиз. Туж шумпотӥсько табере туалет но шуныт интыын, ву но пыремын шуыса. Кыӵе ёрмыса улӥсько вал ук азьло. Ву ведь котьку но кулэ: юыны но, выж миськыны но. Канистраен, я машинаен, я ледянкаен нуллӥсько вал азьло, — выль ужан юртэз сярысь вера Ирина Николаевна. 

Та юртын ини кӧня ужрадъёс ортчиллям. Выль ар шулдыръяськонъёсты гинэ басьтомы: 31-тӥ толшоре Выль ар праздник-маскарад, 3-тӥ толшоре нылпиос понна Ёлка, 5-яз теннисъя турнир, собере Вуж Выль ар. 

— Егитъёс маин ке но мед вырозы, соосыз клубе кыскыны кулэ шуыса, Айдар Фоатовичлы теннис ӝӧк курыса вазиськи. «Хыялысь» вайизы. Егитъёс асьсэос люкаськыса, сетка но теннис шаръёс, ракеткаос басьтӥзы. Нунал потэм шудо. Туж кельше соослы. Школьникъёс но, егит пиос но шудо. 

5-тӥ толшоре теннисъя турнир но орчытӥмы, студентъёс но татын, Казаньын ужасьёс но берто шуыса. Трос адями люкаськиз. Починкаос но лыктӥллям вал. Вормисьёс кузьым но басьтӥзы. 

Собере сяме пыремъя песяйёсын Вуж Выль арез пумитамы. Кушкетысь мызганчиез Павлов Алексеез ӧтимы. Милям песяйёсмы юмшаны, эктыны, шулдыръяськыны задор. Асьсэос ик Тол Бабай но Лымыныл луыса дӥсясько. Соосын туж тунсыко ужаны. Кин кылбур вера, кин кырӟа... Кампет басьто. Выль ар кызэз котыръяса кырӟазы, мызганэн но юмшазы, 80-90 аръёсысь кырӟанъёс улсын дискотека но луиз. 

Огъя вераса, песянайёсмы туж мыло-кыдоесь милям. Кемалась ӧвӧл Смаильын ортчем «Балкыш» фестивальлэн зональной этапаз но соосын пыриськимы.

Учырен пайдаяськыса, туж бадӟым тау кылъёсме вераме потэ гурт калыклы, вань артистъёсылы, Алексей Павловлы но соослэн семьяоссылы, котькуд ужын юрттэмзы, куара кылзэмзы понна, — шуэ Ирина Исьмекова.

Туспуктэмъёс: И. Исьмекова