«Талэсь чебер инты ӧвӧл»

«Легендаын вераське, Янгурчи гуртлы инъет Янгыш но Каныш нимо кык агай-вынъёс понӥллям шуыса. Та нимъёс языческой осконэн улэм поръёслэн паськыт вӧлмемын луиллям. Гуртлэн нимыз Янгышен (Янгушен) герӟаськыны кулэ.

Нырысетӥ удмуртъёс Янгурчие, крестить каронлэсь пегӟыса, Ципьяысен выжиллям. Янгурчи Ципья Починка луыса кылдэм. 1884 арын Янгурчиын 28, 1910 арын 34 хозяйство луэм. Гурт бадӟым будыны быгатымтэ. Кызетӥ даурлэн кутсконаз луэм бадӟым тылпу но ас ужзэ лэсьтэм: 34 юртлэсь 14-ез гинэ изъянмытэк кылем. 1871 арын гуртысь крестьян Алексей Кондратьев ас юртаз лавка усьтэ, ас валэныз Казаньысь вузъёс вайыса вузкарыны кутске.

Гуртысь тямыс воргоронъёс Граждан оже пырисько, одӥгез гинэ улэпен берытске. 1920 арын школа, 1931 арын нылпи сад усьтӥське. Со 1942 арозь ужа, отчы 40 котыр нылпи ветлэ. 1929 арын колхоз кылдэ. Но со ӝог таркаське. 1931 арын нош ик улӟытӥське, 1950 арын «Труд» колхоз борды итӥське. Гуртысь 48 воргорон Быдӟым Отечественной оже кошке, соос пӧлысь 25-ез гинэ берытске».

(Гарифзян Мухамметшинлэн «Балтась энциклопедиысьтыз» вакчиятыса сётэмын).

Туннэ нуналэ ньыль хозяйствоен кылем (документъёсъя 6, соосыз дача луыса кутӥсько) Янгурчи гурт но, кызьы адӟиськоды, узыр историен, шаерлэн улоназ чузъяськем этапъёсты ортчем. Туннэ татын улӥсь Мария Коновалова гуртысь тужгес арлыдо муртъёс пӧлысь одӥгез луэ. Со гуртлэсь шӧдскымон бадӟым луон дыръёссэ — 14 хозяйствоен луэмзэ — тодэ на. «Гуртын скал но вал вордон ферма ужаз, анай дас куинь ар ӵоже валъёсты утиз на ай. Корка вадьсамы буш интыын но тани юртъёс вал, — шуэ со. — Анай калыклэсь тросэн гуртысь кошкон дыръёс сярысь туж вӧсь луыса вералляз. Соку эстӥськыны пу ӧй вал, соин но адямиос Марий Эл шаере, городъёсы выжизы. Калык со дыре огшоры тунсыкъяськыса кошкымтэ, дыр, ини. Али тани туж умой ке но, гуртъёс быро, та понна мынам сюлмы висе. Туннэ кыӵе муген таркасько бен соос? Гуртын улон туж каньыл ук. Газ пыртэмын, асфальт сюрес вань, пудо, тылобурдо вордоно ке карид — сокем умой. Кытчы гинэ ӧд мыны, кытын гинэ ӧд ужа, ужатэк улыны уг луы, шуг-секытъёс но кылдо. Мон ачим олокытын но улыса ути, Казахстанэ но вуи, но нокытын но улыны ӧй быгаты, ас гуртэлэсь чебергес инты ӧй шедьты… Ческыт вуэн ошмес сюрес вамен гинэ, отын ик нюлэс кутске, котыр узы-боры…  Губияны, боры люканы лыктӥсьёс туж трос. Азьло али гуртмы пыр асфальт сюрес уг ортчы вал, адямиослэн машинаоссы но сомында ӧз луэ. Сюрес дурын гинэ улӥськомы бере, ми доры арборъёс шутэтскыны, чай, ву юыны но пырало вал… Али уг пыро ини»…

Туннэ Мария апай кык внукеныз улэ. Бадӟымез Ярослав, Савалиысь гурт возёсъя техникумез йылпумъяса, Ципьяысь жилищно-коммунальной хозяйствоын ужа, Ксения Ципья шоръёзо школаын дас одӥгетӥ классын дышетске. Укноысь занавескаосты утюганэн вырись ныллэсь «Бигерен валаськод-а?» шуыса юаськем вал. «Ӧжытак валасько», — бигерен вазиз со. Востэменыз озьы верам вылэм, нокыӵе акценттэк, капчиен бигер кылын вераське Ксения! «Нылпи садын ик бигерез дышетӥ вал. Классын ми тямыс кузя. Ӟуч, бигер, удмурт, пор нылпиос вань. Школаын ӟуч кылын вераськиськом, котькудмы вордскем кылъя урокын ас анай кылмес дышетӥськом, удмуртъёсын но дорын удмурт сямен вераськиськом», — валэктӥз со. Школае автобус нуллэ вылэм, туж умой.

Соослэн бускелязы улӥсь 75 аресъем Федосия Дмитриевна но гуртын трос юртъёс луэм дыръёслэсь мӧзме. «Улэммы ӵоже «Азьлане» газетлы гожтӥськимы, али но очки поныса лыдӟисько, — шуиз со. — Почтальонмы Ципьяысь, кусыпмы кык иськем гинэ ук, пенсиез куддыръя доре вае, куддыръя ачим мыныса басьтӥсько, магазинэ но Ципьяе ветлӥськом»…

Федосия апайлэн пиез Михаил корказылы пумит сылӥсь обелискез но ар ӵоже учке, котырзэ сузя, толалтэ лымызэ куя вылэм. Кинлэн ке косэмезъя ӧвӧл, ас мылкыдэзъя. Ньыль юртэн гуртын ожлудэ кылемъёслы, ожысь тазаен бертэмъёслы выль, туала обелисклэн луэмез синмаськытӥз но, паймытӥз но. Ваньзылэн но нимъёссы гожтэмын. Чебер. Чылкыт.

Дмитриевъёслэсь вылӥгес, урамлэн мукет пумаз Поликарповъёс уло вылэм. «Яра али Светамы вань шуыса шумпотӥськом, — Ципьяын медсестра луыса ужась гуртозэс Мария апай ушъямысь уг дугды. — Кыӵе гинэ куронэн ӧд вазиськы, котьку юрттэ. Ачиз каньыл, трос тодэ, умой кенешъёс сётэ, висьыны ке кутскид, эмъя».

Янгурчиын улӥсьёслэн эшшо одӥг шумпотонзы вань: трос аръёс буш сылэм интыын кӧня ке ар талэсь азьло егит семья — Филипповъёс — туала, чебер юртъер пуктыса улыны кутскиллям. «Анай-атайзы та гуртысь, ас дыраз Ципьяе выжизы вал, бадӟым пизылэн Вячеславлэн Янгурчие корка пуктэмезлы сокем шумпотӥмы. Ачиз со кутам арбериосты лэсьтонъя цехын ужа, кузпалыз Юлия — Ципьяын «Сбербанкын», куинь нылпизы вань. Соослэсь адӟыса, эшшо лыктӥсьёс шедьысалзы ке, умой луысал шуыса мылкыд кариськом», — люкиськыкумы вераз Мария апай. Малпанъёссы зэм но быдэсмыны быгато кадь потэ.

— Азьло татын улӥсь котькуд семья ас гудӟем колодчаеныз пайдаяськиз, ошмес но артэ гинэ луэмысь, ву трасса кыскымтэ вал. 2015-тӥ арын гуртэ ву пыртӥськиз. Газ вань, асфальт сюрес вань. Интыез туж чебер. Шумпотымон, берло дыре та гуртэн тунсыкъяськисьёс луизы. Али юрт пуктыны инты юасьёслы та гуртын музъем ӵектомы, — шуиз гурт поселенилэн главаез Азат Нотфуллин.