Туала поколение

Ньылетӥ поколениысь нырысетӥез представитель — Александра Фёдоровналэн внучкаез, Галина Алексеевналэн бадӟым нылыз, Иванова Лилия Леонидовна. Со вордскемын 28 июне 1969-тӥ арын Волжск городын, но, кызьы верамы ини, кӧня ке улыса семьяез Ципьяе улыны выже. 1976-тӥ арын нылаш Ципья шоръёзо школае нырысетӥ классэ лыктэ. Тунсыко: пичи дыръяз Лилия дышетӥсь луон сярысь чик но малпамтэ. Но 9-тӥ классын дышетскыкуз, Ципья школае егит дышетӥсь Раиль Равилович Фахрутдинов лыктэ. Одӥг дышетӥсьлы но кельшисьтэм, историяя неординарной егит дышетӥсь бадӟым классъёсын дышетскисьёсты археологиен тунсыкъяськытыны быгатэ. Раиль Равилович егит ныллэсь дышетӥсь сярысь кылдэм малпанъёссэ воксё воштэ. Лилия но солэн куинь эшъёсыз, дышетӥсьсылы синмаськыса, педагогикая институтэ пырыны малпало. 1991 арын горд дипломен дышетсконзэ йылпумъям Лилия, историяя но англи кылъя дышетӥсьлэсь ӧнерзэ басьтыса, Балтась ёросысь Шор Кушкет школае ужаны лыктэ. Та школаын куке но ужазы ни солэн ӵужанаез Александра Фёдоровна, ӵыжы-выжыез Антонида Григорьевна, анаез Галина Алексеевна...

«Мыным кышкыт вал. Ас поннам малпай: быгато-а мон ӵужанай, анай кадь оскымон, йӧно дышетӥсь луыны?» — тодаз вае Лилия Леонидовна.

1994 арын Лилия Ивановаез Ципья школае историез но англи кылэз дышетыны ӧтё. Егит дышетӥсь соглаш луэ, та предметъёсты дышетэмез сяна, кӧня ке ар ӵоже покчи классъёсъя завуч но луэ.

Лилия Леонидовнаез дышетыны кутскемез дырысен котькуд дышетскисез яратӥз. Предметъёссэ умой тодӥсь, нылпиослы ас тодэм-валамзэ вуттыны быгатӥсь, котькуд урокез тунсыко ортчытыны тыршись — Лилия Леонидовнаез дышетскисьёсыз сыӵеен тодо.Со нылпиослы вань кужымзэ, вань сюлэмзэ сётыса ужа. Солэн дышетскисьёсыз районын гинэ ӧвӧл, республика масштабын но вормонъёсы вутско.

Озьы ик Александра Фёдоровналэн кыкетӥ внучкаез но, Анатолий пиезлэн Ираида нылыз, ассэ дышетон удысын шедьтэм. Ираида Анатольевна Эшкеева-Чернова 1972-тӥ арын 2 октябре Ципья гуртын вордскемын. Пичи дырысеныз Ираида дышетӥсь луыны малпа. Соин школазэ йылпумъямез бере, 1990 арын, УдГУ-э дышетскыны пыре. Удмурт филологияя факультетэз йылпумъяса, Ираида Анатольевна 1995 арысен туннэ нуналозь но Ципья школаын удмурт кылэз но литератураез дышетэ. Николай кузпалэныз соос Сырья гуртын уло. Черновъёслэн кык нылпиоссы вань.

Ираида Анатольевна — удмурт кыл понна, солэн вуоноез понна сюлмаськись дышетӥсь. Трос кужымзэ со сётэ дышетскисьёсты визьнодан понна. Солэн дышетскисьёсыз — районын, зонаын, республикаын удмурт кылъя олимпиадаосын вормисьёс но призёръёс. Трос грамотаосыз но наградаосыз Ираида Анатольевналэн район, республика масштабен но, озьы ик Удмурт Элькунысь грамотаосыз но вань.

Ираида Анатольевна монэ но удмурт кылъя но литературая дышетӥз. Котьку паймисько вал солэн секыт, валантэм темаосты капчи кылын валэктыны быгатэмезлы. Висиз ке но, куддыръя мылкыдыз ӧз луы ке но, ноку но дышетскисьёсызлы сое ӧз возьматы. Котьку пальпотыса милемыз пумитаз, пальпотыса келяз. Ираида Анатольевна, туннэ мынам Тӥледлы бадӟым тау шуэме потэ. Тӥляд дышетэменыды мон удмурт кылэз тодӥсько. Тӥляд дышетэменыды мон удмурт кылын гожъяськисько. Тӥляд дышетэменыды мон удмурт кылын потӥсь газетын ужасько. Куддыръя лыдӟисьёс юаллясько: «Йошкар-Олаын дышетскид кадь но, отын удмурт кыллы уг дышето, дыр, ук? Удмурт кылын умой гожъяськод». Нош мон котьку Тӥледын данъяськыса, верасько: «Уг дышето. Удмурт кыллы монэ Ираида Анатольевна гинэ дышетӥз».

Озьыен, Шляпкинъёслэн выжыязы ньыль поколениысь дышетӥсьёссы вань. Огъя ужан стажзы соослэн 200 арлэсь тросгес луэ. Котькудӥзлэн дышетӥсьлэн аспӧртэмлыко улонэз ке но, соосты ваньзэсты юн герӟа дышетон удыс. Котькудӥз соос пӧлысь ас дыраз, али но — трос нылпиослэн яратоно дышетӥсьсы. Трос аръёс ӵоже Шляпкинъёслэн династиысьтызы дышетӥсьёс нылпиосты визьнодазы но визьнодало. Кызьы гинэ улонмы медаз воштӥськы, но тӥляд нимъёсты котьку улозы, Дышетӥсьёс. Аръёс, дауръёс ӵоже дышетэм пиналъёсты тӥлесьтыд нимъёстэс утёзы.

Лилия Ивановалэн гожъямъёсыныз пайдаяськыса дасямын