Туала вакытысь «супергероиня»

Балтась ёросын кӧня гинэ гуртъёс, ваньзы кыӵе ке тунсыко, узыр историен тырмемын. Кӧргем гурт но соос пӧлын нимысьтыз инты басьтэ. Инкуазьлэн кузьмам чеберлыкеныз но узырлыкеныз валче улэ татысь калык. Татын но дано адямиос вордскемын, татын но улон ас радызъя мынэ.

Гужем зэмзэ но туж шулдыр вакыт, ваньмыз сяськаяське, шунды пыже, тылобурдо чирдэ, писпуос вожекто. Пӧсьтолэзь аслэсьтыз нимзэ но зэматӥз: пӧсь омыр гадез ик ӝуатэ. Но, кызьы калыкын верало, инкуазьлэн начар куазез ӧвӧл.

Озьы ик Фёкла Владимировна но оске: адями котьку ӟеч лэсьтыса гинэ улыны кулэ! 

Одӥг даур... Син азяды пуктэ али: адями та дыр ӵоже мар гинэ ӧз адӟы?! Кыӵе гинэ учыръёсын, югдуръёсын адями уг пумиськы. Озьы ке но, 2024 арын анай, песянай, ӵужанай, апай, дано дышетӥсь пыд йылаз, матысьёсыз но эшъёсыз вӧзын пумита дано арлыдзэ. Тазалыкез кӧня ке лябӟемын ке но, со уг на сётӥськы: аслаз 100 аресаз со кышетсэ но ачиз думе, газет но лыдӟе, улонысь датаоссэ но тодэ, ветлыны но кужымез тырмыт на. Нялтас вераса, «Азьлане» газетлэн но дано юбилеез — 90 ар, озьыен, Фёкла Владимировна весяк сямен газетэнымы артэ, милям оскымон эшмы луэ. 

Мыным али 29 арес. Ӝытъёсы котьку сямен яке книга лыдӟисько, яке журналистика удысысь выль амалъёсын тодматскисько, яке материал утчасько-гожъясько, яке юртъер котырысь ужъёсын вырисько. Уждурын чылкыт но ӝикыт интыын пукисько, толалтэ кезьыт шуыса верасько, нош гужем — пӧсь куазьлы ӝожтӥськисько. Нош туннэ статьялэн героиняезлы — 100! Кайгыриз меда со кезьытлы яке пӧсьлы?! Аслаз 29-аз солы мае гинэ адӟыны ӧз кылды меда?! Ачиз но вера со: «Кыӵе гинэ учыръёс ӧй вал, кыӵе гинэ дыръёс ӧз луылэ, ваньзэ вераса быдтонтэм». Фёкла Владимировналэсь веранъёссэ кылзыса, мон малпай: йӧтоз меда туала егит поколенилы 80 аресозь ке но улыны? Тӥ но малпаське!

Тодэ ваёнъёстэс выльдон вылысь: вотэсбамысьтымы Халтуринъёс сярысь трос гинэ лыдӟыны быгатӥськоды. 95 аресъем юбилеяз Фёкла Владимировна сярысь статья потӥз ни вал газетлэн 27 (12.07.2019) номераз, огъя Халтуринъёслэн династиенызы газетлэн 6 (17.02.2023) номераз тодматскыны быгатоды.

Туннэ вераськонмы (со вал 9 пӧсьтолэзе — Ю.Щ.) пичияк мукет ӧрын ортчиз. Та арняе гинэ, 8 пӧсьтолэзе, Семьялэн, яратонлэн но осконлыклэн нуналэз вал, вылаз ик та аре асьмеос Семьялэсь арзэ пусйиськом. Фёкла Владимировнаен но ӵапак вераськонмес семьяен герӟамы. «Кема улон начар. Секыт тани, чиньыос но висё», — шуыса пумитаз Фёкла Владимировна. «Ма, тани газет но лыдӟиськоды, вылэм, ук али», — шуисько. «Времяез кытчы ке карыны кулэ ук, ортчытыны кулэ. Номыр уг ужаськы, шутэтскисько гинэ», — валэктон сётэ дано дышетӥсь. Тазалыкез вань кужымен ужъёсты быдэсъяны уг сёты ке но, сюлмыз весь кытчы ке дыртэ на, уж куре…

— Шулдыр, бадӟым семьяын улӥ: песяй-бабай, анай-атай, куать кузя нылпиос, соос пӧлысь быдӟымез ини мон, туннэ нуналэ одӥгез гинэ вань на, татын гуртын ик улэ, мынам кадь ик тазалыкез ӧвӧл ини солэн но. Дас адями улӥм одӥг коркан! Улонлэн ӝожтӥськон палъёсыз ӧй вал: юртъермы но туж бадӟым, сиён но, уж но тырмыт вал, гуртын пудо-животтэк кызьы улод, соиз но вань вал. Бабай но ужа вал ай мон пичи дыръя. Атай мукетъёс кадь мултэссэ ӧз но юы (кудӟытӥсь юонъёс сярысь вераськон — Ю.Щ.). Анай артэн коркась вал, куинь пиосыз валче улӥзы, кулак карыса, келязы. Пичиысен ик соос понна туж бӧрдӥ, мыным соку 6-7 арес вал, 1930-тӥ аръёс. Та самой нырысетӥ сюлмаськонэ вал. 

Дышетскон вакытаз егит нылашлэн могӟетъёсыз ӧз кылдэ. Анай-атаезлэн тыршеменыз, 1931-1941-тӥ аръёсы Фёкла 10-классъем школаын дышетскыса, сое умоен йылпумъяны быгатӥз.

— 18 инвожое дышетсконме йылпумъяй. Сыӵе шудо вал мон, ваньмыз котыр шулдыр вал, аттестат басьтӥ ук, школаез йылпумъяй. Со дыре 10 класс быдтэмъёс трос ӧй вал... Нош 22-аз жугиськон кутскиз. Жугиськон асьтэос тодӥськоды ини, кыӵе со, вераса но уд быдты. Жугиськон кутскон дыръя мыным 17 арес вал ини. Таиз кыкетӥез бадӟым шуккон луиз. Атайме ожмаськонэ басьтӥзы, кема ӧз ветлы отын, сӧсырмыса бертӥз. Со бертэм бере бабаймы но сопал дуннее кошкиз ини, атай сое ватыны быгатӥз али. Мынэсьтым адӟемез ваньзэ верад ке... Нокин но медаз адӟы сое: ӝуанэз но, жугиськон дыръя улонэз но, картэ но пенсие потытэк кулӥз…

— Нош кызьы улон тӥледыз Григорий Семёновичен герӟаз? 

— Со мынэсьтым одӥг арлы вазьгес йылпумъяз школаез, собере Арча педучилищеын дышетскиз. Кӧргеме ик дышетыны бертӥз. Жугиськон кутскыку, мон Ӟаныысь школаын дышетӥсько вал нырысетӥ арзэ. «Мон интые гуртэ берты», шуыса армие кошкиз. Со кошкем бере, мон гуртэ бертӥ. Отысен арнялы быдэ лэзьяз кадь со гожтэт (серектыса), ялан гожтэт гожъяз, жугиськон дыръя но гожтэтъёсын улӥм. Жугиськон бере, 1945-тӥ арын, куарусёнэ сое гуртэ лэзизы армиысь, 1946-тӥ арын кышнояським. Со дырысен валче улӥм, умой кусыпъёсмы вал. 

— Сюанъёс кызьы ортчо вал со вакытэ?

— Соку бадӟым сюан уг каро вал. Сюан шуыса нимаськиз ини со ачиз. Гуртамы, коркасен корка ветло вал валляна сямен. Коркалы быдэ пыртӥзы. Анайлэн дасям удмурт дӥсеныз, но камалие гинэ ӧй вал. Со дыре камалиед вань ке, выт (налог) тыроно луэ вал. Выт тыремлэсь кышкаса, анайлэсь но, песяйлэсь но камализэс магазинэ сдавать каризы. Милемлы соин камали ӧз йӧты. Удмурт дӥсь лэсьтыны, черсыны мыным ӧз кылды, анайлэн, песяйлэн дасям удмурт дӥсенызы ветлӥ. 

— Кызьы нош семьяын кузпалэн, анайзы-атайзыен огъя валаса улоно?

— Ог-огдэс яратыса, вожпотондэ возьматытэк гинэ улыны луэ! Мон ачим но бадӟым семьяысен бадӟым семьяе лыктӥ. Анайзые туж умой кышномурт вал, кулыкуз но ӟыгыртыса, чупай али, туж яратӥсько вал. Кема улӥз, кузпалэ кулэм бере 5 ар пыкет луиз на мыным. Огпол со мыным тазьы вераз: «Кен, чаль ай татчы, одӥг кыл кырӟало ай мон тыныд». Та вакытэ Фёкла Владимировна небытэн но шунытэн, анайзыеныз улон вакытэ кадь ӟыгыртӥз но кырӟан кылъёссэ мадиз:

«Кизёно анаме вамен усыясал,
Кытконо валъёсме жалясько.
Верано кылъёсме ваньзэ верасал,
Азьпал улонме жалясько».

Сюлмаз шунытэн кылем кылъёссэ яратӥсь кен али но тодэ, со юн гажанэз возьматэ. Котькуд семьяын анайзыен-атайзыен таӵе шуныт кусыпъёс луизы ке, соку, оло, семьяосмы но зӥбытэсь, оскымонэсь луозы, люкиськонъёс но шергес пумиськысалзы. 

Вань дышетон сюресаз кышномурт пичи пиналъёслы сюлэмзэ сётӥз. Дышетскисьёсыз пӧлысь Иван Васильевич Ермаковез но тодаз вайиз, солэсь сузэрзэ — Антонида Васильевнаез, Ӟаныысь ик Михаил Папаевез. Нылызлэн верамезъя, Миша агай ӵемысь гинэ жингыртэ, улэм-вылэмез сярысь юалляське. Та дышетӥсь понна туж дуно, сое уг вунэто! 
— Азьло ик Ӟаныын дышетӥ, собере Кӧргемын, Дургаын... Пӧртэм нылпиос вал, гуртысь огшоры пиналъёс. Ваньзы огкадь луыны уг быгато ук: кылзӥськисез но, куара кылзӥсьтэмез но. Шумпотыса вераме луэ, копак ассэ укылтэм возисьёсыз ӧй вал. Вань сюлэмме покчиёзо школаын дышетонлы сётӥ. Жаляса верано, валче ужасьёс гинэ ӧвӧл, Ципьяын гинэ вань — Серафима Михеева (Серафима Михайловна но туэ аслэсьтыз 100 аресъем юбилейзэ пусйиз — Ю.Щ.). Дышетскисьёслэн дӥськутсы ӧй вал, гуртысен гуртэ ветлоно ук. 
Дано юбилееныз Фёкла Владимировнаез ёросысь кивалтэт но ӟечкылаз: Балтась ёрослэн главаез Рамиль Нутфуллин, ёросысь социальной дурбасьтонъя ёзэтэзлэн кивалтӥсез Алсу Гатиятуллина, дышетонъя ёзэтлэн кивалтӥсез Ренат Мухарлямов, Кугунур гурт поселенилэн главаез Руслан Егоров. Озьы ик матысьёсыз, ӵыжы-выжыосыз, гуртоосыз но узыр дасям ӝӧкен куно кариськизы. 

Мар сӥзёд на быдэс даур ортчем песянайлы? Вань шуныт кылъёс вуизы та нуналэ юбиляр доры, соос ваньзы улонэ мед выжысалзы. «Кема аръёс ӵоже улыны мед кылдоз на тӥледлы нош ик», шуыса сӥзёнлы со вакчи гинэ валэктон сётӥз:

— Шонер уд вераськы, вӧтады ӟечен кулыны мед кылдоз шуоно!

Улон — туж кужмо бергась дунне, татын тӧлэз но золгес пельтэ, зорез но кезьытгес йӧтэ, шундыез но кыӵе ке умойтэм пӧсен шунтэ кадь. Но адями со понна ик кылдэмын, та сяськаяськись дуннеез эшшо но чебергес, умойгес карыны. 

Вераськонмылэн пумаз Фёкла Владимировна туж шонер кылъёс вераз: «Адямилы котьку ӟеч лэсьтыны тыршоно. Кыӵе гинэ урод сямо, начар мылкыдо адями медаз луы, тон солы котьку ӟечсэ гинэ лэсьтыны тыршы». Зэмзэ но, котькуд ӟеч уж одно ик ӟечен берытске, сюлмад кыӵе мылкыдъёс возиськод, сыӵе сюлмо адямиос ик бордад кыстӥсько.