Тыршид ке, котьма но пӧрме

Вераськон мынэ Улын ушма гуртысь Волковъёслэн семьязы сярысь. Дас ар талэсь азьло одӥг скал басьтэмзы дырысен асьсэлэсь улонзэс соос пудоостэк син азязы уг пукто ни. Нуналлы быдэ, ӵукна но, ӝыт но пудо дорын Волковъёс.

Малпасько, колхозын ужась адями ужлэсь кадырзэ вала но ужлэсь уг кышка шуыса. Уж дораз адями пудоен выре ке, дораз но трос пудо вордэ со — озьы малпасьёс трос, дыр.

Николай Владимирович Волков — «Сурнай» колхозын пудо утись луыса ужась пиосмурт — ӵапак сыӵе. Вань улонэз солэн пудоосын герӟаське шуид ке но, шонер луоз, дыр. Вазь ӵукнаысен ӝытозь колхозын пудоосты утем бере, дораз бертыса со дорысьтыз пудоосэ но уте. Нош соос солэн... Скалъёссэ гинэ басьтӥд ке, 11 кузя! «Кызьы вутскиськоды сомында пудоез вордыны» шуэм юанэлы Николай Владимирович тазьы вераз: «Ма, тыршиськом отчы но, татчы но вутскыны. Тыршид ке, котьма но пӧрме ук». Но котькызьы тыршид ке но, сомында пудоез утёнын юрттӥсьёстэк уз луы, дыр. Николай Владимировичлэн кышноез но, Ирина Николаевна, «Сурнай» колхозын ик доярка луыса тырше. Дораз но скалъёсты утьыны, вордыны Николай Владимировичлы кузпалыз юрттэ — ма кызьы сотэк. Кышноез уж дораз луыку, семьялы Николай Владимировичлэн анаез юрттэ.

— Анае но доярка ук мынам, соин но пудоез утён — со понна тодмо уж. Трос учыре ӵукназэ скалъёсты анае кыске, нош ӝытазе — кышное, — шуэ воргорон.

Ма, али скалъёс сяна, мукет пудооссы но вань Волковъёслэн — парсьёссы.

— Адями мар гинэ вераз ке но, сомында пудоосты утьыны-вордыны туж секыт. Тани, кылсярысь, тулыс но гужем мамында ужъёс луо гуртын, пудо сяна но. Но ми тыршиськом, турынзэ но турнаськом. Гужем нуналъёс кузь, луэ ваньзэ но ужаны, мылкыдыд луиз ке, — шуэ Николай Владимирович. — Скалъёсты йӧл сдавать карыса уксё поттӥсько шуыса гинэ вордыны уг луы ук, соослы дыр шедьтоно, котькудзэ сюдоно, утёно.

— Тани мар сярысь малпасько ай, — шуисько, — гужем кык арня ӵоже кутьы возьмано луэ, лэся, ук тӥледлы...

Нош Николай Владимирович серекъяз гинэ. «Ӧвӧӧӧл, сомында ум возьмаське. Милям скалъёсмы ваньзы но кутьые уг пото. Кардамы вань, отчы куд-ог скалъёсты кельтӥськомы, мукетъёссэ кутьые поттӥськомы. Но  кутьыез, зэмзэ но, кӧня ке нунал возьмано луэ».

Куд-ог дыръя Николай Владимирович, ачиз верамезъя, малпасько пе, малы мыным тамында пудо кулэ ни шуыса. Соосын секыт ук, семьялы, нылпиослы но дыр ӧжыт кыле. Но таӵе малпанъёсыз ӝоген вуно солэн. «Туж жаль пото соос мыным. Мар бен мон соосты, аслэсьтым скалъёсме, вузаса лэзём-а, мар-а?! Кемалась вузаса лэзьысал ни озьы ке, но соос мынам сюлмам ук, котькудӥз. Ваньзы но аслам скалъёсы, одӥгзэ но кытысь ке палэнысь басьтыса ӧй вайы», — вера Николай Владимирович. Нылкышно озьы верасал ке, паймымон но ӧй луысал, дыр. Нош пиосмуртлэсь сыӵе кылъёс кыло шуыса малпаськымтэе вал. Николай Владимирович кадь пудоосты сюлмысь яратӥсь адямиосын вераськеме ӧй вал али. Сыӵе адямиос котьма ласянь но тыршисесь луо, дыр. Николай Владимирович аслаз анаезлы, кузпалэзлы но кык нылпиосызлы (пиез 4-тӥ классын, нош нылыз 2-тӥ классын дышетско) пыкет но валтӥсь юрттӥсь луэ. Соос но Николай Владимирович понна озьы ик. Семьяязы ог-огзэсты валаса но ог-огзылы юрттыса улӥсь анай-атайёс нылпиоссы понна но пример луыса уло.