Удмурт кино: мар со сыӵе но кулэ-а со асьмелы

Туэ гужем, «БиГерд» форумын, одӥгаз ӝытэ егитъёс понна бадӟым проектортӥ кино возьматӥзы. Ну ма бен — возьматӥзы но возьматӥзы. Туала дыре ма, кино учкыны проблема-а мар-а? Арысь аре трос выль киноос уськытӥсько, адями талы дышиз но ни. Пиосмуртъёс понна — боевикъёс, нылкышноос понна мелодрамаос. Егитъёс сярысь воксё веранэз но ӧвӧл — телефонмы гинэ ки уламы мед луоз, одӥг кнопкае нюрттӥськом но ваньмыз дась — часэн-часэн кыӵе кино учкемед потэ, сыӵезэ учкы, телефонад зарядкаез гинэ мед тырмоз.

Удмурт киноен нырысетӥ тодматскон

Но таиз кино огшоры гинэ кино ӧй вал — со вал удмурт кино. Нимаське «Пузкар». Ваньмы, киноез учкыны мылкыд карисьёс, актовой залын, пеймытын пукимы — тылэз кысӥзы ук. Трос кузя люкаськимы ке но, ваньмы шыпыт кариськыса кино учкиськом, одӥг адями но телефоназ уг пукы — йырмес но басьтытэк кино учкиськом. Озьы пукимы часлэсь тросгес, кино йылпумъяськытозь. Кино йылпумъяськем бере, нырысетӥ радысь нылъёс синвуоссэс чушыса, шыпыт гинэ ас понназы мар ке вераськыса улӥзы. «Ну, вера ни, ойдо, —  малпанъёсме куспетӥ карыса вазе мон дорын пукись ныл, Маргарита, — кыӵегес тыныд кино? Синдэ но басьтытэк учкид кадь». Собере азьын пукись нылъёс шоры учкыса, йырыныз шонтӥз но нош вера: «Нырысетӥзэ учкыкум мон но озьы ик учкиськем вал. Зол, туж зол. Быгато ик удмуртъёс но кино уськытыны». Та нуналэ ми Ритаен туж кема али удмурт кино сярысь вераськимы, малпанъёсмес ог-огмылы верамы. Соосты ӧжытак лыдӟисьёслы но вуттэме потэ. 

Ма со сыӵе — удмурт кино?

Паймоно кадь, туала дыре но, вылӥ технологиослэндаураз, удмурт кино сярысь асьме палан сокем ӵем уд кылы, воксё уг верасько шуид ке но, янгыш уз луы, дыр. Малы озьы меда со? Малпад ке, «удмурт кино» кадь аспӧртэмлыко удыс бадӟым саклыкез но тунсыкъяськонэз кулэ каре кадь. …жыт луэмысьтыз, дыр, удмурт кино асьме понна мар ке но тодмотэм, дышымтэ, но со ик дыре матын луись но тунсыко маке кадь потэ. Бен, мукет сямен луыны но уг быгаты. Валамон, удмурт кино (шуыны кулэ, удмурт национальной кино) уськытон понна туж трос тыршыны кулэ, малы ке шуоно сыӵе кинолэн трос аспӧртэмлыкъёсыз вань: кино удмурт кылын луыны кулэ, шудӥсьёсызлы но удмурт луоно, со удмуртъёслэсь лулчеберетсэс, сям-йылолъёссэс возьматыны, шуг-секытъёссэс шараяны кулэ. Удмуртъёс сяна удмурт киноез нокин уськытыны но уз быгаты, дыр — кин бен, асьмеос сяна, тодэ асьмеосты, асьме калыкмылэсь улонзэ? Нокин. Соин но удмурт кино — со асьме калыкмылэсь улонзэ, сюлмаськонзэ, шумпотонъёссэ возьматӥсь кино. Удмуртско-польской «INWIS» киностудия тани учкисьёслы ини кык удмурт фильм кузьмаз: «Узы-боры» (2011-тӥ ар) но «Пузкар» (2014-тӥ ар). Соос сярысь ӧжыт гожто, лыдӟисьёслэн та фмльмъёсты учкыны мылкыдзы мед ӝутскоз шуыса. 

«Узы-боры»

Та романтической комедилэн продюсерез но режиссёрез Пётр Палган луэ, сценаристэз — Дарали Лели. Кино потэмын 2011-тӥ арын. «Узы-боры» экранъёсы потытозь, удмурт кинематографилэн историяз кык гинэ полнометражной фильмъёс луэм — «Тень алангасара» (1994-тӥ ар) но «Соперницы» (1929-тӥ ар). Табере вакчияк «Узы-боры» кинолэн сюжетэзъя.

Гондыргуртысь Максим (Константин Никитин) Виктория Ядыгарова (Елена Фролова) кырӟасьлы, солэсь кырӟанъёссэ радио пыр кылзӥськыса, синмаське. Огпол Максим нимо пияш городэ Викалэн концертаз мыныны малпа, но отын кырӟасез городын улӥсь яратоно муртэз иномаркае пуктыса нуыса кошке. Максимез депрессиысь поттон понна, бабаез но апаез Максимен Викаез ӵош карыны малпало. Али гинэ армиысь бертэм Митрейлэн юрттэменыз соос Викаез гуртазы концертэ Пусйыны кулэ, удмурт кинолы шонер дунъет сётыны секыт — удмурт бере, кызьы умойтэмзэ вералод со сярысь? Фильмез уськытэм группа профессиональной но луымтэ — соос дышетско гинэ вылэм на кино уськытыны. Шудӥсьёсыз но ӵапак озьы ик, ма соос шудэмзы понна уксё но басьтымтэзы. Кино вылӥ качествоен уськытэмын ӧвӧл ке но, куара ласянь шуг-секытъёсыз кылдэмын ке но, огъя вераса, туж умой пӧрмем. Актёръёсыз умой шудо, музыкаез но туж умой, кулэезъя тупамон карыса интыямын. 

«Пузкар»

Кинолэн режиссёръёсыз Сергей Наговицын но Константин Ложкин. Сценарист — Дарали Лели. Жанрезъя «Пузкар» мелодрама луэ.

Валтӥсь геройёсыз — куинь егит пияшъёс, кудъёсыз Ижевскын квартира снимать карыса уло но асьсэлэсь улонзэс радъяны тыршо. Гаян (Максим Князев), интеллигентной пияш, журналист луыны малпа, Саша (Никита Моисеев) — «модник», ассэ эктон удысын адӟе, нош Стёпа (Иван Плотников) вордскем гуртаз бертыса, ассэ гурт улонлы но аслаз калыкезлы сӥзьыса улыны малпа. Сыӵе пӧртэмесь пиослы пӧртэм нылъёсын тодматскыны но кылдэ. Визьмо но серьёзной Даша (Ксения Ворончихина) школаын удмурт кылэз дышетэ, Арина (Наталья Алексеева), узыр семьяысь ке но, фотограф луыса уксё ужа, нош возьдаськись но востэм Таня (Надежда Наговицына) гуртын анай-атаезлы юрттыса улэ. Куать валтӥсь геройёс — куать пӧртэм сямъёс. Но геройёсты одӥгез герӟа: соос — туала удмурт егитъёс. Кинэ ке соос пӧлысь город чутрак воштӥз, нош кинэ ке — ӧз. Веранэз ӧвӧл, «Узы-боры» киноен ӵошатыса, «Пузкарлэн» ӟечлыкез но трослы умойгес, куараен но шуг-секытъёс кылдымтэ. Валтӥсь геройёсыз гинэ ӧвӧл, второстепенной рольёсты шудӥсь актеръёс но, мон малпамъя, туж умой шудо та киноын. Одӥгез гинэ умойтэм мылкыдэ вуттӥз — кино валантэмгес йылпумъяське. Но та али бадӟым юан — умойтэм-а та, умой-а. Оло, учкисьёс асьсэос но йырзэс мед висьытозы шуыса, асьсэлы йылпумъян мед лэсьтозы шуыса, озьы малпамын вал, дыр?

Луоз-а удмурт кинолэн азинсконэз? 

Та сярысь трос малпанъёс гожтэмын интернетын — статьяме гожтыку трос источникъёсын тодматски. Отын пӧртэм сямен гожъяло: кин ке шуэ, удмурт кинолэн нокыӵе азинсконэз уз луы шуыса (тае валэкто трос пӧртэм мугъёсын — луонлыкъёс кылдытымтэ, коньдон ӧжыт, удмурт актёрской состав шедьтыны секыт но мукет мугъёс), кин ке вера, удмурт кинолы кутскон понэмын, соин но азьпалан учкисьёсты выль удмурт фмльмъёсын шумпоттозы шуыса. Зэмзэ ке верано, мон кыкетӥ малпанлы матынгес луисько. Малы? Бен, кино уськытон — секыт уж, кудӥзлы рос-прос дасяськоно, котькуд чыры-пырызэ малпано. Но «Узы-боры», «Пузкар» киноосты учкиды ке, малпасько, тӥляд но  удмурт артистъёслэн но удмурт кино бордын ужасьёслэн устолыксы ласянь шеканъёсты уз кыле. Та киноослэн продюсеръёсыз, режиссёръёсыз  но сценаристсылэсь бадӟым уж быдэстэмзэс адӟыны луэ. Киноосын, тужгес но берпуметӥез уськытэм удмурт киноын, «Пузкарын», трос удмурт детальёс пыртэмын гурт улон но гурт калыклэн вераськем сямъёсыз туж шонер, ӵапак возьматэмын. Актёръёслэн шудэмзы сярысь веранэз но ӧвӧл — котькудӥз аслэсьтыз рользэ усто, быгатыса быдэстэ, чылкак федеральной масштабен дышетскем актёръёс кадь. Соин но, удмуртлыклы мылкыдтэм кыльымтэ адямиос луыку, удмурт кинолэн но вуоноез вань шуыса оскем потэ.

Туспуктэмъёсын юрттэмез понна нимысьтыз тау верасько удмурт фильмъёслэн режиссёрезлы, Дарали Лелилы.

Фото: Дарья Яшина.