Удмурт кылэз ӝыны арскын дышетскем

«Удмуртомемъёс» нимысьтыз рубрика кылдытыса статьяосты гожъяны кутскеммы дырысен, удмурт кылэз умой тодӥсь ӟуч, бигер калыкысь кӧня ке представительёсын тодматскыны шуд усиз ини (оскисько, азьланяз но сыӵе адямиосын матысенгес тодматскыса, статья дасяны луоз шуыса). Соос пӧлын вань пӧртэм адямиос: гурт удысын тыршисьёс но дышетӥсьёс, мӧйыос но егитъёс, нылкышноос но пиосмуртъёс. Но ваньзэсты соосты огазея калыкъёсты но кылъёсты гажан.

Ӟаны гуртын кема аръёс ӵоже улӥсь Галира Абдулловна Папаева — сыӵе адямиослэн одӥгез.

Галира Абдулловна Папаева (Байрамова) Марий Эл республикаысь Моркинской ёросысь Алексеевка гуртын вордскемын. Алексеевкаын улӥллям пӧртэм калыкысь адямиос — бигеръёс но, ӟучъёс но, поръёс но. Удмуртъёс гинэ луымтэзы. Но кин соку тодэм, Галира апай сыӵе гуртын будыса но, аръёс ортчыса, удмурт кылэз вордскем кылзэ кадь тодоз шуыса?

— Вордскем гуртэ бадӟым вал. Покчиёзо школамы но гуртамы вал, отын ик дышетскимы. Пӧртэм калыкысь адямиос гуртамы валче тупаса улӥзы, мон бигер семьяысь вал бере, тросгес бигер кылын вераськи. Но со шоры учкытэк, тани туннэ нуналэ удмурт кылын но вераськыны быгатӥсько, — маде Галира Абдулловна.

Галира апайлэн атаез агроном луэм, нош анаез — покчи классъёсты дышетӥсь. Анай-атаез пичи дырысенызы нылъёссэз (семьяязы соос ньыль кузя луиллям) тыршись, ужась луыны дышетӥллям.  Улон Байрамовъёсты Татарстанысь пӧртэм интыосы вуттэ — Галира покчи классъёсын дышетскыку, семья Дубьязые улыны выже, берлогес — Лаиш районэ.

— Школаын дышетскыкум ик, тодӥ: мынам медицинской училищее пыреме потэ. Соин, 8-тӥ классэз йылпумъяме бере, 1969-тӥ арын, Казаньысь медициная училищее дышетскыны пыри. Школаын умой дышетски бере, дышетскыны пырон ласянь нокыӵе шуг-секытъёс ӧз кылдэ: экзаменъёсты но сётытэк, дышетскыны пырыны быгатӥ, — тодаз вае Галира Абдулловна.

Нялтас вераса, Галираен ӵош солэн кыктос сузэрез Венера но дышетскем. 1973-тӥ арын мур тодон-валан, ӧнер басьтэм егит фельдшер распределениея Балтась ёросэ шеде, нош Венера — Волжск городэ. Тани кызьы тодаз вайиз Галира Абдулловна со дыръёсыз сярысь:

— Монэ, егит нылэз, Балтась ёросысь Карек-Серма гуртэ лэзизы. Та палъёс мон понна воксё тодмотэм вал ук. Соин мон татчы нырысетӥзэ анаеным ӵош лыктӥ. Туж кема утчамы со гуртэз — Карек-Сермаез. Адямиослэсь юалляськыса, отӥ-татӥ ветлыса, нырысь воксё Ярак-Чурмае вуимы. Собере ини мырдэм шедьтӥмы Карек-Серма гуртэз. Туж тунсыко вал со.

Карек-Серма гуртын егит фельдшерез туж ӟеч пумитало. Гурт калык Галира апаез соку ик «асьсэлэсь» кадь пумита. Та Галира апай бордын но луэ: кышномурт котькинэ каньылэн гинэ кылзэ, кулэ луиз ке, буйгатыны но быгатэ, визь-кенеш но сётэ, ноку уг но тышкаськы. Сыӵе каньыл, йӧно, вылаз ик ужзэ рос-прос быдэстӥсь адямиез кызьы уд яраты? Тани Карек-Серма гуртысь Василий Петрович Никитин но шуэ:  «Галира Байрамова ми дорын трос аръёс ӵоже медпунктын ужаз, ми сое удмурт каримы. Галиралы удмурт кыл кулэ вал, малы ке шуоно пичиос бигерен но, ӟучен но уг тодо. Соослэсь юалляськоно, мусояно ук. Солы амалтэк дышетсконо вал. Али со бордын гинэ но ӧвӧл — та ваньмыз удмурт калыкез гажамез бордысен потэ. Ӟаные бызьыса Папаева луэмез бере но Починкаын ужаз на. Со починкаослэн гажано муртсы. Галя, медсестра Галя, синутись Галя шуиськомы ми сое. Куинь кылэз туж умой тодэ».

Витьымтэ шорысь «Галя» луэмез сярысь Галира апай ачиз но серекъяса шуэ: «Галира луыса вордски но будӥ, нош ужаны кутскеме бере Галя луи. Озьы ваземзы понна ноку но вожме ӧй потты, кызьы верамзы потэ, озьы мед вералозы шуи».

1973-1977-тӥ аръёсы «Галя» Карек-Сермаын ужа. Улэ со гуртысь ик одӥг юртын. Собере кӧня ке дыр ӵоже Тюнтер гуртысь медпунктын ужа. Ӟаны гуртысь Михаил агаен тодматскытозяз Галира апайлэн куддыръя мукет интые улыны выжыны малпанъёсыз луиллям, нош улон ваньзэ ас интыяз пуктэм. 1975-тӥ арын егит фельдшер Ӟаны гуртэ Михаил Папаев нимо пиосмуртлы картлы кошке. Кузпалыз но, солэн семьяяз но сое «Галя» гинэ шуо. 1979-тӥ арын нош ик Карек-Сермаысь медпунктэ ужаны выже.

— Мон дырозь но Карек-Сермаын удмурт ӧвӧл, ӟуч нылмурт ужам. Собере тӥни мон, бигер нылмурт, лыктӥ. Нош Карек-Серма ведь со чылкак удмурт гурт. Соин мыным удмурт кылэз дышетскыны тупаз — калыкен кызьы ке но вераськоно вал ук. Ярам ай, егитъёс валало вал мар ке но, нош пересьёсын но нылпиосын вераськон ласянь нырысь секытгес вал, — тодаз вае кышномурт.

Соин Галира апай удмурт кылэз дышетскыны кутске. Утёд ке, солы удмурт кылэз дышетскон капчиен сётскем вылэм, малы ке шуоно трос кылъёсыз пор кыллы кельшиллям. Нош Галира апай пор кылэз умой тодэм. Тӥни озьы, аслыз кулэ луись, тунсыко яке тужгес секыт кылъёсты тетрадяз гожъяса, со удмурт кылэз ӝыны арскын дышетскем.

— Зэмзэ верано ке, котькыӵе гуртын ужад ке но, котькыӵе кылын вераськид ке но, ачид адямиез яратӥд ке, соос борды кыстӥськид ке, тонэ но яратозы, тон борды но кыстӥськозы. Нош куке тонэ валало, тыныд ужаны но капчи, умой, мылкыд луэ, — пусъе Галира апай.

1989-тӥ арын Галира Абдулловна Ӟаны гуртэ фельдшер луыса ужаны интыяське. Со дыре ини Папаевъёслэн куинь пиоссы луо — Эдуард (1977), Владимир (1980), Радий (1986). Ӟаны гуртын но Галира Абдулловнаез туж ярато, ачиз со гуртэ картлы кошкыса улэ вал бере, сое ӟаныос умой тодо вал ини. Котькуд минутэ юрттыны дась луись, ӟеч кылын буйгатыны быгатӥсь, туж йӧно анай, кузпал но кышномурт — сыӵеен тодо сое котькытын но. 2012-тӥ арын дано шутэтсконэ потӥз ке но, собере но, али но гуртоосызлы, солы вазиськем котькуд муртлы юрттыны дась со. Ачиз Галира апай ушъяськыны уг яраты, ачиз сярысь но трос ӧз вераськы. Туннэ нуналэ со кузпалэзлы, нылпиосызлы но внукъёсызлы шумпотыса улэ:

— Пиосме будэтонын мон чурыт сямо ӧй луы. Соос ваньзы удмурт кылэн вераськыса будӥзы, али но верасько. Бигер кылэз но валало, уг верасько ке но. Ужасесь куиньназы ик. Эдуард «Дуслык» обществоын кунян сюдӥсь луыса ужа, Владимир Казаньысь строительной фирмаын крановщик луыса тырше, нош Радий ветеринарной академиын дышетэ. Со милям тужгес бадӟым данъяськонмы. Биологической наукаосъя кандидатлэсь званизэ басьтӥз. Туннэ нуналэ сизьым внукмы но вань ини.

Галира апай Ӟаны гуртын Михаил кузпалэныз, Эдуард пиеныз, Оксана кенэныз но кык внукъёсыныз ӵош улонлы шумпотыса улэ. Семьяяз сое ярато, гуртаз гажало — шудо улон понна нош мар кулэ на?