Удмурт луэменызы данъясько

Истори бамъёсысь

Карек-Серма гурт кылдэ 18-тӥ даурлэн шораз. Вуж Турьяысь улӥсьёслэн одӥг люкетэз та интые лыктыса интыяське. Со дыре гуртлы Нюлэс Починка ним сёто, но документъёсъя со Выль Турья шуыса нимаське. 1892 арын туж кужмо тылпу потэ, быдэс гурт ӝуаса быре, татын улӥсьёс юртъёсты выльысен ӝуто. Но табере ини Карык-Серма нюк валлин интыясько но, аръёс ортчыса, гурт но та нимез басьтэ. Чуваш кылысь берыктыса, со «сьӧд шур» шуэмез валэктэ.

Гуртысен ёрос центрозь кусып 24 иськем луэ, нош гурт поселенилэн но хозяйстволэн конторазы дорозь 7 иськем сюресэз ортчоно. Гуртлэсь одӥг иськемын Дьӧльмен нимо нюк кылемын, озьы ик азьвыл сылэм гурт дорын туж чебересь Вараш, Акаркуд, Вӧсяськон тэльёс но луиллям. Карек-сермаослэн эшшо одӥгез яратоно возьзы вылэм – Сергей возь. Со нюлэс пушкын интыяськемын, гуртысьтызы Сергей нимо воргорон, интызэ сузяса, лӥялъёслэсь сайкыса, музъемзэ дасяса, сое кизем. Сое данъяса ик возь но Сергей шуэм нимез нуллэ. Табере отын «Борнак» обществолэн муш умортоосыз интыяськемын. 1999 арын гуртэ газ пырто, нош 2000 арын общественной юртъёсты но газифицировать каро. Гурт ас азинсконзэ азьланьтэ, выль юртъёс пуктӥсько, ву кыско, бергес интернет вотэсъёслы итӥськон но быдэстӥське. Нош тужгес шумпотымонэз – 2014 арын нимысьтыз программая гуртысь сюрес радъяське.

Муртъёсты уг лэзё

Карек-Сермалэн туннэ нуналэ улэм-вылэмаз выжомы. Татын одӥг гинэ урамзы вань – Мир урам. Гуртэн тодматскыку синме нырысь ик туала, чебер, йӧн-йӧн юртъёс йӧтӥзы. Озьыен, мылысь-кыдысь тыршыса улӥсьёс татын вань али. Зэм, пӧлазы юртъер котыртэк сылӥсь коркаос но вань, соосты мукет городъёсысь, мукет калыкысь адямиослэн юамзы но вань вылэм ини, но гурт калык муртъёсты лэзьымтэ, ас осконзэс, кылзэс, калыксэс утён понна огазеяськиллям.

Калык понна кулэ луись объектъёс пӧлысь гуртын клуб, библиотека, медпункт, магазин ужа. Но соос гуртэн ӵош вужгес но вужгес луо. Кылсярысь, клуб 1977 арын пуктэмын. Ёросамы сыӵе юртъёс чиньыен лыдъямон гинэ кылемын, дыр, ини. Но та ньыльдон арлэсь бадӟым историез луэм клубын но гурт калыкез тунсыкъяськытӥсь ужрадъёс ортчытӥсько, кружокъёс нуисько. Татын, арлыдоос люкаськыса, киужъёсын выро, ыжгон носки кертто, кут кутало — ог-огенызы тодон-валанзэс люко.

Карек-Серма — пӧртэм ӧнеръёсын ужась усточиосыныз данъяськымон гурт. Тодос, дышетон, гурт возёс, лулчеберет, огъя вераса, кудзэ гинэ удысэз эн учкы, котькудаз та гуртын вордскем но будэм, улонзэ та интыен герӟам адӟем карымон адямиос вань. Озьы ке но, уж луымтэен, уно коньдон басьтыса ужаны мылкыдэн егитъёс палэнэ кошконо каро. Соин тросэз гуртын улӥсьёс — ини арлыдоесь апайёс но агайёс. Но гурт понна сюлмаськисьёс, котькытын асьсэды мыло-кыдо возьматӥсьёс но вань татын, соосын карек-сермаос зэмзэ но туж данъясько.

Удмуртлыксэс утисьёс

Вуж, но борддоръёсаз ческыт пу зынэз пыӵатэм клубен дас арлэсь кема ини Зоя Никитина кивалтэ. Нырысь учкыса, туж каньыл, востэм гинэ вераськись кышномурт туж уно талантъёсын усточи вылэм. Та гуртын со вордскем но будэм, семья кылдытэм, Владислав кузпалэныз кык пизэс — Артёмез но Максимез — будэтӥллям, туннэ нуналэ кыкез но соос Ижевскын вылӥ-тодон валан басьтыса дышетско. Семьяяз усто кузё кышно, гажамон кузпал но анай луэмез сяна, Зоя апай удмурт калыклэсь сям-йылолъёссэ утён понна сюлмысь тыршись муртъёс пӧлысь одӥгез луэ. «Ми дорын калык дӥсьёс юртлы быдэ шуымон утиськемын, нош, кылсярысь, со ик Кукмор палан та озьы ӧвӧл. Мынам аслам песянайлэсь анаелы, собере мыным выжем удмурт дӥсе вань. Камали анаелэн апаезлэсь кылиз. Клубын ужаны кутскеме бере концертъёс дыръя дӥсьёс уг тырмо шуыса адӟи, мон асьмелэсь историмес эскерыны, дӥсьлэсь кызьы шонер вуриськемзэ дышетскыны басьтӥськи. Удмурт дӥсьлы тупамон басма но утчаса шедьтӥ, али, солы заказ сётыса, дӥсьёсты солэсь гинэ вурисько. Калык дӥсьёсты бадӟымъёслы но, нылпиослы но вурисько, заказэн ужасько, удмурт калыкмы мед улоз, солэн выжыез медаз вуны шуыса тыршисько. Та аръёс ӵоже трос пӧртэм удмурт дӥсьёсты адӟыны тупаз. Балтась ёросысь удмуртъёслэн дӥсьсы мукет ёросъёсысь представительёслэсь маин висъяське шуыса но тодӥ», — сюлмыныз сётскем ужез сярысь вера Зоя Михайловна.

Дӥсь но вуре, клуб ужез но нуэ. Пичи гинэ гурт луыса но, «Ингур» («Небесная мелодия») нимо ансамбльзэс кылдытыса, соин пӧртэм конкурсъёсын вормонъёсы вутско, гурт калыкез гинэ ӧвӧл, районысь учкисьёсты но асьсэ задор эктон-кырӟанъёсынызы шумпотто.

— Гуртын нылпиос, егитъёс трос ӧвӧл ке но, соос туж мыло-кыдоесь, — шуэ Зоя апай. — Клубын ортчытоно праздникъёсы котьку шумпотыса пырисько. Спорт ужрадъёслэсь но палэнэ уг кылё, тужгес но хоккеез ярато.

Клубын ортчытоно ужрадъёсты ке верано, татын мон мукет интыысь адӟылымтэ выльдӥськонэз синйылтӥ. Выль арез куиньлы люкыса радъяло вылэм. 30 декабре нылпиос понна ортче, собере — бадӟымъёслы, нош берпуметӥез арлыдоослэн луэ. Сыӵе праздникъёсты гурт калык туж яратэ вылэм. «Спектакль, концерт пуктӥд ке но, залмы тыр луэ. 2019 арын гуртлэсь нуналзэ пусйимы вал, кылем арын сыӵе ужрадъёсты радъяны ӧз яра, туэзэ ортчытыны мед быгатысалмы шуыса витиськом. Малы ке шуоно со гурт калыкез огазея, ог-оген пумиськыса вераськон, шулдыр шутэтскон понна умой луонлык сётэ», — шуэ Зоя Никитина.

«Огкылысь луыса ужаськом»

Тӥни озьы, лулысь-сюлмысь, гурт понна тыршыса, ужаса уло Карек-Сермаын. Луэмезлы шумпото, шуг-секытъёс куке но радъяськозы шуыса зӥбытэн гинэ витё. Нош туннэ нуналэ гуртын валтӥсез сюлмаськон — со гуртэ вуттӥсь сюресъёслэн начар югдурзы но ньыльдон арлэсь кема услугаоссэ ӵектӥсь клуб но библиотека юртлэн вужмемез. Вуоноын борддоръёссэ шунытгес карыны, укнооссэ ке но воштыны уз луы меда шуыса оско татын. Но со дыре ик соослы котьку юрттыса улӥсь «Борнак» хозяйстволэн кивалтӥсезлы Рафкат Назиповлы тау каро. «Рафкат Накипович лулчеберетэз азинтонэ, праздникъёсты ортчытонэ но огъя калык шуг-секытъёсты сэрттон-пертчон уже мыло-кыдо пыриське. Сценалы костюмъёсты вурон понна коньдонэн юрттӥз, милемлы ужаны каньыл мед луоз шуыса, компьютер басьтӥз. Заборъёс туж вужесь вал, соосты тупатыны шуыса, лэсьтӥськон материалъёс вайиз. Озьы ик шайвыл сузянэз радъяз. Кык нюлэсъёс куспын кутьы возьман понна музъем висъяса сётӥз, гурт калыклэн тыршеменыз электропастух шуонэз басьтыса радъямы. Туж умой, кельшымон маке луиз со», — гурт калыклэн нимыныз бадӟым таукаронзэ вуттӥз Зоя Михайловна. Со дыре ик аслыз гурт калыклы но со тау шуэ. «Кыӵе гинэ уж борды ӧй басьтӥськы, гуртоосы котьку юртто, котькыӵе малпанъёсты умоен пумитало. Тужгес но котькуд ужрадлэн шорсюлмыз луись Игнатьевъёслы тау кареме потэ», — веранзэ йылпумъяз кышномурт.

Таин Карек-Серма гурт кузя путешествимы йылпумъяське. Ветлэм интые выльысен вуылыны, воштӥськонъёсын тодматскыны ми яратӥськом. Нош мукет дыръя лыктыкумы милемыз клубез, библиотекаез но медпунктэз огазеясь выль здание мед пумитасал вылэм.