«Удмурт шыкысысь ваньбуръёс» — Россиысь калыкъёслэн кылъёсынызы устоез издание

27-тӥ куартолэзе «На родине П. И. Чайковского» VII-тӥ Литературной фестиваль улсын Удмурт Элькунысь Йӧскалык лыдӟетъюртлэн бадӟым лыдӟиськон залаз «Книга года — 2026» Улоскуспо фестиваль-конкурсын вормисьёсты сӥё-дано пусъён ужрад ортчиз вал.

Удмурт Элькунысь Йӧскалык лыдӟетъюртлэн официальной сайтаз пусъемын, Россиысь калыкъёслэн огъя луэмзылэн араз конкурсэ 14 кылын книгаос пыртэмын вал шуыса. Конкурсэ туэ Россиысь 21 улосвылъёсысь но Беларусь Элькунысь изданиос пыриськиллям, огъя 203 издание вуэм. Вожвылъяськисьёс пӧлын — книгаослэн авторъёссы, издательствоос но книга поттӥсь огазеяськонъёс, дышетсконниос, лыдӟиськонниос но мукет. 

Сӥё-дано ужрад дыръя конкурсын укмыс номинациосъя вормисьёсты но призёръёсты шараязы. Шумпотымон, «Россиысь калыкъёслэн кылъёсынызы устоез издание» («Лучшее издание на языках народов России») номинациын вормись луиз Сапожников Леонид Дмитриевичлэн «Удмурт шыкысысь ваньбуръёс» (2025) бичетэз, книга пусъемын I-тӥ степенё лауреатлэн Дипломеныз. Сюлмысь ӟечкыласьком Леонид Дмитриевичез но книга поттонэ люкет пыртэм котькинэ та бадӟым вормонэн.

Нялтас вераса, та конкурсэз 2020-тӥ арын кылдытӥзы Удмурт Элькунысь Лулчеберетъя министерство, Йӧскалык политикая министерство но Печатья но калыке ивортодэт вӧлмытонъя агентство.