Удмуртъёс нош ик Казаньын люкаськизы

Ужрадэ, НКА-ослэн тӧрооссы сяна, ёросъёсысь удмурт активистъёс но ӧтемын вал. Заседанилэн рамкаосаз пӧртэм юанъёсъя выступлениос лэсьтӥзы кызьы тӧроос, озьы ик лыктэм кивалтӥсьёс но. Эскероно ужпумъёс пӧлын: 2020-тӥ арын Агрыз ёросын ортчоно республиканской Гырон быдтонлы дасяськон; «Чакара» фестиваль сярысь; удмурт кылэз дышетӥсь садикъёсысь визьнодасьёс пӧлын ӧнер устолыкъя конкурсэз ортчытон; Татарстанысь удмуртъёслэн НКА-зылэн шуг-секытъёсыз но азинскон понна луонлыкъёсыз но мукетъёсыз.

Дышем сямъя, арлы быдэ Калыкъёслэн эшъяськон юртазы ортчем арлы йылпумъян лэсьтон, вуонояз быдэстоно ужъёсты тодмостон вылысь люкаськон радъяське. Туэез но заседание, азьвыл аръёсы кадь ик, кык люкетэн луиз (но пусйыны кулэ, ужрадлэн кыкетӥ люкетэз азьвылъёсызлэсь форматэныз висъяськыса, туж тунсыко но пайдаё ортчиз, таиз сярысь улӥынгес).

Ужрадлэн нырысетӥ люкетаз вераськизы пумиськонэ вуэм бадӟым куноос — И. И. Шарипов, Татарстанысь Калыкъёслэн Эшъяськон юртсылэн директорез; Н. М. Владимиров, Татарстанысь калыкъёслэн ассамблеязылэн исполкомезлэн кивалтӥсез; Е. П. Ефимов, ТР-ысь пуш политика юанъёсъя Департаментысь йӧскалык политикаез азинтонъя Управленилэн кивалтӥсезлэн воштӥсез; Ф. А. Чибышева, Камсьӧр удмуртъёслэн йӧскалык центрзылэн кивалтӥсез; А. С. Герасимов, Татарстанысь удмуртъёслэн НКА-зылэн тӧроез; М. А. Иванова, Татарстанысь удмуртъёслэн НКА-зылэн исполнительной директорез.

— Туннэ нуналэ тӥ татын ӧжыт кузя люкаськиллямды ке но, зэмзэ тӥ, удмуртъёс, асьтэ лулчебереттэс, сям-йылолъёстэс утён понна туж но туж трос уж лэсьтӥськоды. Веранэз ӧвӧл, та ужрадъёсты ортчытыны юрттэ кызьы президентмы, республикамы, озьы ик тӥ, ёросъёсысь национально-культурной организациослэн кивалтӥсьёссы. Тӥляд ваньдылэн огъя тыршемдылэн бервылыз шуыны кулэ Иванова Мариналэсь йӧскалык организациослэн лидеръёссылэн Россия масштабен ортчись конкурсазы кылем арын вормемзэ но. Оскиськомы, туэ но, вуоно аръёсы но тӥ уждэс умой азьланьтоды но бадӟым вормонъёсы вутскыны быгатоды шуыса, — вераз Евгений Ефимов.

Марс Гатауллин, Агрыз муниципал ёрослэн культура отделэзлэн кивалтӥсез, туэ Варклед-Бодья черкогуртын ортчоно Гырон быдтонлы дасяськон мыло-кыдо мынэ ини, гуртын улӥсьёс но юрттыны тыршо шуыса вераз. Пайдаё луиз Кукмор ёросысь удмуртъёслэн НКА-зылэн кивалтӥсезлэн, Ошторма-Юмья шоръёзо школалэн директорезлэн  Виталий Семеновлэн удмурт кылэз дышетӥсь садикъёсысь визьнодасьёс пӧлын ӧнер устолыкъя конкурсэз ортчытон сярысь докладэз. Андрей Сергеевич Герасимов шонер пусйиз, нылпи садикъёсын ужась визьнодасьёсты коньдон ласянь тунсыкъяськытон кулэ шуыса. Со учыре визьнодасьёслэн нылпиосты дышетыны стимулзы луысал. Нош ваньзылэсь висъяськиз Татарстанысь удмуртъёслэн НКА-зылэн Казаньысь ёзэтэзлэн кивалтӥсезлэн Павел Александровлэн выступлениез. Егит кырӟась, удмурт азьветлӥсь аслаз визьмо вераськеменыз мӧйыосты но, егитъёсты но шумпоттӥз. Со вераз удмуртъёслэн НКА-зылэн азинскон луонлыкъёсыз но шуг-секытъёс, азьпаллы ужпумъёс сярысь. Павеллэн выступлениысьтыз одӥг люкетсэ тӥледлы но ӵектӥсько: «Мон малпасько, тужгес актуальной туннэ нуналлы ужбергатонэн герӟаськем юан луэ шуыса. Арлы быдэ Гырон Быдтон праздникъёсы ветлыса, сыӵе проблемаен пумиськи: асьмелэн ӧвӧл декоративно-прикладной искусствоосъя центрмы, кудӥз быгатысал йӧскалык шӧмо продукциез ӵектыны. Асьмелэн удмурт калык кухняя но бадӟым проблемамы вань, соин ик ми праздникъёс, возьматонъёс луизы ке, кыӵе ке организациосты медъяса, адямиосты шедьтыса соосты асьмелэсь ужмес ик ужатӥськомы. Та, мон сямен, туж бадӟым проблема, кудзэ кызьы ке но сэрттыны-пертчыны кулэ. Мон синйылтӥ, асьмелэн бадӟым потенциалмы вань шуыса. Но асьмеос со луонлыкъёсынымы малы ке но пайдаяськыны ум дыртӥське, оло, кулэ ум кариське но, дыр. Одӥг гинэ пример верало. Гуртлэн нуналаз, Бавлы ёросысь Николашкино гуртын (ачим со гуртын вордски) акция ортчытӥмы. Гуртысь культура юртын ужасьёсын валче ветлӥмы коркаос кузя, калыкен вераськимы, гуртоосмылы пӧртэм юанъёсты сётӥмы. Юанъёс пӧлын вань вал таӵеосыз но: кызьы тӥ ужбергатон шоры учкиськоды, дась-а тӥ табань пыжыса сое вузаны, шуом, одӥгзэ дас манетэн. Тодӥськоды-а, калык кыӵе ответ сётӥз? «Озьы яра вал-а мар-а?». Калык та сярысь малпаськыса ветлэм, но дӥсьтымтэ та уж борды басьтӥськыны. Татын аслэсьтыз рользэ шудэ, дыр, удмурт калыклэн возьдаськись луэмез но — менталитетмы сыӵе, асьмеос туж кышкасесь. Асьмелы ведь нокин синъёсмес, киосмес уг думы, ужбергатонэн вырыны кутскон понна но макем бадӟым эрикмы вань. Востэм сяммы асьмелы ик люкетэ. Асьме нуналэ ваньмыз вузаське — удмурт культура но, чебер бинялтыса ӵектэмын ке луиз. Кылсярысь, Удмуртиын гурт туризм азинтӥське, отын ӵем пӧртэм финн-угор фестивальёс ортчо. Кылсярысь, Шаркан ёросысь Быги гуртын «Быг-быг» фестиваль. Отын но асьме кадь ик адямиос уло, соос но таӵе ужрадэз ортчытыны дась луымтэзы, дыр. Но калыкез коньдон ласянь тунсыкъяськытыны быгатӥллям... Та сярысь асьмелы но пыр-поч малпаськыны кулэ».

Заседанилэн кыкетӥ люкетаз докладъёсын вераськыны кулэ вал интыысь автономиосысь представительёс. Но НКА-ослэн кивалтӥсьёссы таӵе форматэз котырес ӝӧклы воштӥзы но куспазы вераськизы, кинлэн кыӵе проблемаосыз вань, ӵектонъёсыз, азинсконъёсыз. Таӵе форматэз тунсыкоен шедьтӥзы Андрей Герасимов но, Марина Иванова но. Соос интыын ик кылдэм юанъёслы ответ сётыны тыршизы. Пусйизы, интыысь автономиос арлы быдэ ортчоно ужрадъёс сяна, тыршо пӧртэм выльзэ малпаыны шуыса но. Йылпумъяськиз пумиськонлэн кыкетӥ люкетэз делегатъёслэн куинь группаослы люкиськыса (егитъёс, культура удыс, дышетон удыс) ужаменызы. Котькуд группа пыр-поч вераз но гожтӥз, кызьы соос адӟо Татарстанысь удмуртъёслэсь но Удмуртиысь удмуртъёслэсь кусыпъёссэс; кыӵе ужрадъёсты ортчытыны луысал, со кусыпъёсты юнматон понна. Марина Иванова оскытӥз, та малпанъёс-ӵектонъёс Удмурт Республикаысь йӧскалык политикая министрлы Лариса Бурановалы вуттэмын луозы шуыса (жаляса верано, ачиз Лариса Николаевна та пумиськонэ лыктыны ӧз быгаты).  

Ваньзы шуымон люкаськемъёс Татарстанысь удмуртъёслэн НКА-зылэн тӧроезлы, Андрей Герасимовлы, озьы ик солэн самой матысь юрттӥсезлы — Марина Ивановалы — таукарон кылъёссэс веразы. Соослэн ужаны кутскеменызы удмуртъёслэн трос выльдӥськонъёссы, азинсконъёссы вань шуыса шӧдӥськыны кутскиз. Азьпалан но со озьы ик луоз шуыса оскеммы потэ.