Ӵуказе — «Гырон быдтон»!

Удмурт калык бадӟым саклык висъялляз музъем ужъёсын герӟаськем йылолъёслы: кылсярысь, «Гершыд», «Гырон быдтон», «Выль нянь сиён» праздникъёслы, кудъёсыз али но вунэмын ӧвӧл на.

Тулыс бусы ужъёс бырем бере, артэ улӥсь мукет калыкъёс сямен ик, удмуртъёс но вашкала дырысен «Гырон быдтон» йылолзэс ортчытъяллям. Та праздник трос аръёс ӵоже асьме дорын вуныса улӥз удмуртъёс бигеръёсын ӵош одӥг колхозын ужамен-улэмен, Сабантуе пыриськылӥзы. Выльысь «Гырон быдтон» асьме ёросын Ӟаны, Кутэш, Кисаль удмурт гуртъёсты огазеясь «Искра» колхозын, Ӟаны шоръёзо школаысь дышетӥсьёслэн тыршеменызы, 1990-тӥ арын улӟиз. Нырысетӥ «Гырон быдтон» ик — со районысь быдэс удмуртъёслэн праздниксылы пӧрмиз, со колхоз праздник гинэ ӧй вал. Ас анайзы доры куное музэн, котырысьтымы пачыл удмурт калыкмы люкаськиз. Тунсыкъяськизы та йылолэнымы ёрос администрациын кивалтӥсьёс но. Озьы пумен «Гырон быдтон», «Кенеш» огазеяськонысь азьветлӥсьёслэн тыршеменызы, ёросъя но республикая праздниклы пӧрмиз. Со табере пӧртэм выжыё калыкъёсты огазеясь, ог-огдэ гажаны дышетӥсь, калыкмылэсь асваланзэ ӝутӥсь, вашкала но туала улонъёслэн пумиськонзылэн Быдӟым праздниксы луиз.

Туэ Татарстанысь удмуртъёслэн «Гырон быдтонзы» Кукмор ёросысь Ныръя черкогуртын 17 инвожое ортчытӥськоз. Удмурт шаерын но «Гербер» праздник 17 инвожое луоз, туэ со Воткинск ёросысь Пихтовка гуртын радъяськоз. Нош асьмеос, Балтась ёросысь удмуртъёс, ӵуказе, 3-тӥ инвожое, Ципья черкогуртын та вашкала йылолмес ортчытомы. Тодады вайытон вылысь: кутсконэз 13.00 часэн.

Яратоно праздникмылэн одӥгез валтӥсь тодметэз — со ӝук, ӝук вӧсян, вуоноез ю-няньмы мед удалтоз шуыса.

Инмар Кылчинлы вазиськон:

1. «Иньмаре, козма, Быдӟым Иньмаре, Кылчин Иньмаре, ӟеч Иньмаре, му Кылчин, ю Кылчин, ӟеч шуддэ-бурдэ сёт, Иньмаре, Кылчин Иньмаре. Аминь!

Быдӟым Иньмаре, Кылчин Иньмаре, ӟеч Иньмаре, му Кылчин, ю Кылчин, пудо тӧрлыклы ӟеч сӧллык сёт, вужен буре ваиськом, вильзэ но сётысалыд ке, Иньмаре, Кылчин Иньмаре. Аминь!»

(Цыпья черкогурт, Малмыж уезд Вятка губерниысь, Б.Гаврилов «Произведение народной словесности, обряды и поверья вотяков Казанской и Вятской губерний», Казань, 1880 ар).

2. Вить чиньы пыр пазьгем ю-няне ӟеч мед потоз,

Выжыысеныз кутскыса йылозяз мед тысялоз!

Кизем юэд-нянед мед удалтоз!

Инмарлы тay кариськом, няньмы мед удалтоз!

Песянаелэн (1897 арын вордскемын, Ӟаны ныл) верамезъя, вазь яке чабей кеньырен ӝук пӧзьто, пе, вал. Вера вал на горд чукиндэрен пыжем няньлэсь шукыр-шукыр сур (квас) пӧзьтэмзэс но.

Шумпотымон, 90-тӥ аръёсы кизем тысьмы ӟечесь пушъетъёссэ сётӥз. Вашкала удмурт сяммес азинтэ «Кенеш». Бадӟым тау ёрос администрацилы, лулчеберетъя кивалтэтлы, кудъёсыз котькуд ласянь юрттэт сётыны дасесь.

Кудӥз-огез малпа, та праздник алигес гинэ малпамын. Озьы ӧвӧл со. Тани 11 июне 1938 арын потэм «Азьлане» (№38) ёрос газетмы ма гожтэ (текстэз газетын сямен ик кельтэмын):

«ГЫРОН БЫДТОН» ПРАЗДНИКЕЗ АЗИНСКЕМЪЁСЫН ПУМИТАЛОЗЫ

М.Лызи сельсоветысь ньыль колхоз огиньын народной «Гырон быдтон» праздникез ортчытозы. Колхозъёс производствоын стахановской амалэн ужанэз но социалистической соревнованиез паськыт вӧлмытыса, РСФСР-лэн но Татарской АССР-лэн Верховной Советъёсазы быръёнъёслы дасяськыса пумиталозы. Колхозъёс пар гыронэз, кыед поттонэз, юос пӧлысь жаг турынэз урыса быдтонэн таин ӵош ик турнаны но октон-калтонлы дасяськонэн кужмо пумиталозы. «Гырон быдтон» праздник нуналэ колхозъёс стахановецъёсты премировать карозы. Премировать каронъёс быдтэм бере, коллективной хор, шудонъёс, танцыос, валэн ӵошатскон но мукетъёс луозы. Татын ик вузкарон лавка усьтэмын луоз. (В.КИРИЛЛОВ)

Гажано но дуно эшъёсы! Ӟечкыласько «Гырон Быдтон» — «Гербер» праздникен, сӥзисько капчи мылкыд, тазалык! «Гырон быдтон» праздник — со нянез, нянь будэтӥсез данъян праздник.

Василий Никитин,

Карек-Серма гурт

Леонид Сапожников, «Кенеш» НКА-лэн Правлениезлэн азьвыл тӧроез:

…«Гербер», «Гершыд», «Гырон быдтон» – тазьы асьмеос, удмуртъёс, нимаськом тулыс бусы ужъёсты йылпумъянлы сӥзем вашкала праздникмес. Кема аръёс ортчыса, та праздник Балтась ёросысь удмуртъёс доры 2000-тӥ арын 16-тӥ инвожое берытскиз. Нимамы сое ваньзылы валамон карыса — «Гырон быдтон» шуимы.

Нырысетӥез «Гырон быдтон» элькун праздник луыса вуиз асьме доры эстафетая Агрыз ёросысен. Сое быдэс дуннеен дасямы шуыны луоз. Валтӥсь дирижёр, праздникез дасянъя комиссилэн председателез луиз со дырысь Балтась ёрослэн администрациезлэн тӧроезлэн кивоштӥсез Гарифзян Садыкович Мухаметшин. Праздникез дасянэ кыскемын вал интыысь ваньмыз аскивалтон советъёс, колхозъёс но огазеяськонъёс, кытын улӥзы но тыршизы удмуртъёс. Озьы ик нырысетӥзэ сыӵе бадӟым уже пыриськизы ёросысь вань удмурт гуртъёс но.

Кыкетӥзэ элькун масштабен «Гырон быдтон» асьме ёросамы ортчиз 23-тӥ пӧсьтолэзе 2006-тӥ арын. Ӵапак со арысен кутскыса ёросмылэн но Республикамылэн зарни традициосыз пӧлы юн выжы лэзем элькун праздникмы (2007-тӥ арын сяна, соку праздник ёрос масштабен гинэ радъямын вал) Ципья музъем вылын ортчылӥз.

2015-тӥ ар, 20 инвожо. Та нунал ёросмылэн историяз, тужгес но удмурт калык понна, вунонтэм нуналлы пӧрмиз. Дасэтӥ ползэ ортчиз «Гырон быдтон» праздник. Соку нырысьсэ та праздниклэсь «тэльбугозэ» асьмеос ас киямы басьтӥмы. Ог дас арлэсь кема малпамъёсмес-куронъёсмес уже пыӵатыны луонлык кылдӥз — праздникез черодэн ортчытон сямлы нэгыз понӥськиз. Озьы 2015-тӥ арын «Гырон быдтонлэсь» ӝуксэ Лӧзяос (ваньмыз 8 гурт) пӧзьтӥзы, вань калыкез соос куно каризы.