Улон книгаедлэн бамъёсыз мед унояськозы на

Трос пӧртэм праздникъёслэн самой чеберез, куке вань семья ӵошен ӝӧк сьӧрын. Азьло вакытысь йылолъёс туннэ нуналэ кӧня ке вунэмын ке но, бадӟым лыдпусъёсты валче люкаськыса ортчытон — одӥгез дунъянтэм вакыт луэ.

Час ортчоз но кык ортчоз,
Доре бертон дыр вуоз…

Туннэ статьялэн героиняез — мынам ӵужанае. Таӵе кырӟан гуръёсты солэсь ӵемысь кылыны луэ. Соос пӧртэмесь, тунсыкоесь, югдурлы тупасесь луо. Ваньзэ тодаз возе, кылбуръёсты но вера. Кырӟаны со туж яратэ, соин но, дыр, калык гуръёсты яратон пичи дырысен юн пыӵамын милемлы но. 

Ми понна солэн юбилеез самой шулдыр нунал луиз.

Ӵужанай — со котьку сюлмаськись адями, кудӥз нырысь ик матысьёссэ уте, собере гинэ ачиз сярысь малпа.

Дано аресаз вуыса но, со ассэ юн возьыны тырше: ужъёсты быдэстыны куриське, ужтэк пукыны уг быгаты, сюлэмыз ялан егит дырысьтыз «бызьылэмзэ» малпа. Но табере солэн валтӥсь ужез — дораз бертӥсь нылпиоссэ пумитан но Инмарен сётэм арлыдзэ каньылэн ортчытон. Со — татали (мотылёк) кадь, кудӥз доры ваньзы кыстӥсько, кудӥзлэн яркыт тылэз котырак пиштэ. 

— Али тынӥсь улонысь воксё кошкеме уг поты. Ваньмыз тырмыт али, тазалыке гинэ ӧвӧл, татчыозь вуо шуыса одӥг но ӧй малпа ук, — шуэ со ялан. — Укноын корка гыль кадь пукисько, ужаны но уг яраськы. 

Озьы ке но солэн диван вылын пукемез но ми понна туж бадӟым шумпотон ини, кык полэс бадӟым шумпотон. Малы ке шуоно со доры лыктыса, тон небыт валесысь принцессаен ӵошатымон: кезьыт ӧвӧл-а, тапочки кутча, чай ю, мае ке сиы. Аслаз пинал дырыз сиёнтэк ортчемын бере, али со вань лыктэмъёсты сюдыны тырше. Сыӵе со милям бадӟым сюлэмо ӵужанаймы.

Юбилей нуналаз ӵукнаысен ик со понна туж кылкутымон нунал луыса кутскиз. Нырысь ик сое ӟечкыланы вуизы Шор Кушкет гурт поселенилэн главаез Юрий Перфилов но «Дуслык» возёслэн кивалтӥсез Николай Колоколов. Соос Балтась ёрослэн главаезлэсь Таукарон гожтэтсэ, чильпам шаль но сяська керттэт кузьмазы, ас нимынызы но дуно кузьымъёс вайизы. Кунооссэ ӵужанаймы соку ик ӝӧк сьӧры интыяз, валче вераськыса шыд сиызы но чай юизы. 

— Колхозын ужамме но вунэтымтэзы. Сыӵе бадӟым кузьымъёсын лыктӥллям. Тазалык мед сётоз Инмар, асьтэлы но кузь гумыр мед сётоз, таӵе ик аресозь вуыны мед кылдоз, — шуиз со кошкись куноосызлы. 

Со котьку но котькинлы тау каре, аслаз пинал но егит дырыз секытэн ортчемын ке но, солэн сямыз лек ӧз кариськы, сюлмыз ӧз чурытомы, улонлэсь «чапкетъёссэ» дано ортчиз. Соин юбилей нуналаз но пӧртэм интыосысь ӟечкыланъёс вуизы. Быдэс нунал пӧртэм гуртъёсысь куноос лыктӥзы, но 90 аресъем юбилярша понна соослэн кузьымъёссы но кулэ ӧй вал, самой валтӥсез — дано карыса тодэ ваемзы. Но кызьы ортче та кузь сюрес? Котькуд адямилэн кадь ик ваньмыз потэ вордскем семьяысь...
Ӵужанаймы вордӥськиз 1934 арын Кисаль гуртысь Григорий но Аграфена Гавриловъёслэн семьяязы. Со кыкетӥ нылпи луиз, со азьын 1929 арын вордскиз Роман агаез, нош 1938 арын вордӥськиз покчиез — Павел. Жаляса верано, туннэ нуналлы агаез но, выныз но югыт дуннеен люкиськемын ини. Роман агаез арми службазэ ортчытыса, Термезэ ик кылиз, нош Павел армиысь бертыса кӧня ке улӥз но Киселёвске улыны выжиз, шахтёр луыса ужаз. Кышноез гуртысьтызы ик Партас Анна вал. Киселёвскын ик быриз. Роман агаез кӧня ке пол бертылӥз на. Али солэн пиез семьяеныз улэ Башкириын, гужем гинэ бертылӥзы, сыӵе пумиськонъёслы ӵужанаймы туж шумпотэ, соосын кузьмам кышетсэ но юбилей нуналаз керттӥз. Агайзэ ӵужанай котьку туж жаляса но синкылиосын тодаз вае. 

— Анаймы 1942-тӥ арын кулӥз. Мыным соку 8 арес вал. Атаймы жугиськонэ кошкиз, 1947-тӥ арын бертӥз. Агаймы будэтӥз ини милемыз. Ачиз но быдэ вуымтэ ке но, нокытчы сётымтэ милемыз. Одӥг кило нянез уй-нунал ужаса басьтылӥз, сое сиыса улӥськом вал. Али нянез сиён но уг шуо ини. Ми сярысь сюлмаськонъёс копак Роман агаймылэн пельпумаз усизы. Секыт дауре вордскем нылпиос ми. 

Ачиз но ӵужанай егит дырысен ик ужано луэ. Азьло ик колхозын ужам, отын мар гинэ быдэстымтэ со: кунян но сюдэм, сюдэм беразы асьсэос ик возь вылэ возьманы поттӥллям, скал но кыскем, пӧртэм ужъёсты быдэсъясь но луэм. Туала вакытэ кадь йӧл кыскон аппаратъёстэк, 13 скалэз киын кысконо луэм. Одӥг скаллэсь одӥг ведралэсь трос йӧл поттӥллям. Кӧня ки кужым кулэ ведь солы!

Егит вакытаз эшъёсыныз пумиськонъёсты но палэнэ кельтымтэ. Нимысьтыз клубзы вылымтэ ке но, со интые соос библиотекае ветлӥллям. Егитъёс трос вылӥллям ай соку Кисаль гуртын. Татысен ик соос ӵужатаен — Пётр Самсоновен — тодматскиллям. Бускель гуртэ со велосипедэн ужаны ветлэм, вылаз плащен. Юн мугоро, востэм егит пи ӵужанайлэн сюлэмаз шуныт мылкыдъёс пыӵатыны быгатэм. 

— Библиотекаын пукем бере, калгиськом но, келяськиськом но вал. Бер ӝытозь ветлыса, вазь ӵукна ик ужаны султоно луэ вал. Озьы ке но, шулдыр вакытъёс луизы.
1960 аре Пётр но Гликерия кузпалъясько но Пор-Кутеш гуртын улыны кутско. Озьы егит кенлэн ас семьяез кылдэ. Со семьялэсь шунытсэ но радлыксэ возён понна ӵужанаймы ассэ жалятэк тырше. 1961 арын нырысетӥ нылзы вордӥське, солы ӵужатай Елена ним сётэ. 1963 арын доразы ик ӵужанай вае кыкетӥ нылзэ. Вордӥськыкуз, вордскем нунылэсь нырысетӥ куаразэ кылыса, пичи Лена паймыса юаз, пе: «Песяй, со кин черекъя?», песяйзы кема малпаськытэк верам: «Ма, пичи Маня лыктэм, лэся». Озьыен со Мария нимен ик гожтӥськиз. 1967 арын тулыспал толэзе куинетӥез нылзы но вордӥськиз. Пересьёс сое Рита нимын вӧсяллям ке, ӵужатайлы та ним туж чурыт потэм, соин Светлана шуыса гожтыса ваем. Но... шудо, трос нылпиё семьялы огазе шумпотыса улыны кема кылдымтэ. Та арын ик гудрикошкон толэзе шудтэм учырын ӵужатаймы быре... Но ӵужанай уг сётскы, нылъёсыз солы бадӟым пыкет луо, котькуд ужын юртто, котькуд уж борды басьтӥсько.

— Нылпиосызлэсь будэмзэс но адӟытэк кылиз, эмеспиосызлы кыӵе шумпотысал ини. Ӵошен улытэк но кылим, — шуыса куддыр синкылиен ик вера ӵужанай. Востэм, каньыл мылкыдо но ӟеч сямо кузпалзэ ыштон секытэн шӧдӥське солэн сюлэмаз али но. 

Яратоно кузпалэз кулэм бере, 1968 арысен, ӵужанаймы Ӟаны шоръёзо школаын техничка луыса ужаны кутске.

«Нылпиос бордын куректондэ ӧжыт ке но вунэтод», — шуэм солы соку школалэн директорез Иван Дмитриевич Гришкин. 

Туннэ нуналозь но апай-сузэръёс котьку ӵошен вань ужъёсты быдэсто, нуналлы быдэ ог-огзылы жингырто но ужъёсынызы тунсыкъясько. Соослэн огазе луэмзылы ӵужанай но шумпотэ. Арнялы одӥг пол ке но люкаськон — аспӧртэмлыко йылол луиз ини. «Анаймы вань дыръя котьку бертыны кулэ», — шуо соос. 

Туннэ нуналэ ӵужанаймы тынӥсь улонэн улэ. Бускель гуртъёсын гинэ улӥськом бере, ӵемысь куное вуиськом. Ачиз но милемыз котьку возьма. Кема лыктытэк улӥмы ке, сюлмаське, соку ик малпаськонъёсы усе. 

— Ми понна со анай но, атай но. Солэн ноку чурыт кыл но верамез ӧвӧл, ужаны но уг косы вал, ваньзэ ачиз лэсьтыны тыршылӥз. Ми асьмеос солы юрттыны тыршимы, нош со пумитамы ушъя гинэ вал, соин юрттон мылкыд эшшо но бурдъяськылӥз, — шуо нылъёсыз.

Ӵужанаймылы удалтӥз: нылъёсыз ӧз пазяське, матын уло. Бадӟымез нылэз — Елена — пенсие потыса вордскем гуртаз ик бертӥз, соос кыкназы валче уло. Тэк пукыны уг быгато: пудо-живот но тылобурдо вордо. Шоретӥез — Мария нылэз — Ӟаны гуртын ас семьяеныз улэ. Ужан вакытэз Шор Кушкет шоръёзо школаын удмурт кылъя но литературая дышетӥсь луыса ортчиз. Покчиез — Светлана — улэ Вуж Кушет гуртын. Гуртысь ик гурт клубын тырше. 

Гликерия Григорьевна ассэ шудо анаен но яратоно ӵужанаен лыдъяны быгатэ. Пичиос но со доры кыстӥсько. Солэн туннэ нуналэ вить внукъёсыз но куать правнукъёсыз. Узырлыкез солэн коньдонэн уг лыдъяськы, дораз матысьёсыз луизы ке, солы та самой бадӟым кузьым луэ ини. 

Яратоно ӵужанаймы! Тон — милям героинямы. Тынад шуныт киосыд но каньыл сюлэмед котьку милемлы кужым сёто, тынад секытъёс азьын юн сылэмед ми понна адӟымон пример луэ. Азьпалан но ми понна шунды кадь яркыт пишты, жильыртӥсь ошмес кадь крезьгуръёстэ кема-кема аръёс ӵоже мед кылзомы на. Тон вӧзын ми али но пичи нылпиос, кудъёссэ тон котьку вешаса но кырӟаса изьытӥськод вал.