Улонысьтым тодэ ваёнъёс

Климлэн атаез, Александр, мынам атаелэн выныз, жугиськон потытозь служить карыны кошке но жугиськон бырем бере гинэ 1946 арын бертэ. Солэн кышноез 1942 арын кулэ, кыле 3 аресъем пизы Клим. Сое анаен песяйёс утё.

Атай жугиськон потытозь «Дэмен» колхозын бригадир луыса ужа. Жугиськонэ кошкыкуз, со, скамейка вылэ выдыса, тазьы кырӟаз:

Атай жугиськонын разведчик луыса служить карем. Огпол соосыз 11 ӵошен разведкае лэзиллям. Ӝытэз витьыса, посадка доры шутэтскыны дугдӥллям. Атае, кулэ луэмен, посадка пушкы пырем, соку дугдэм интызы пуштэм: снаряд вылэ пуксиллям, луоз. Со муртъёслэн номырзы но кыльымтэ, атай посадка пушкын раненой луэм, солэн паллян макесэз (ягодицаез) воксё ӧй вал: осколок басьтэм. Шедьтӥллям сое 2 сутка бере гинэ. Госпитальын кема кыллем бераз атаез доре лэзё. Со бертэ кык кунул бодыен. Дорын кема уг возё. Казане военной заводэ лэзё. («Биш балта» шуо вал сое соку). Ож бырытозь Казаньын служить кариз. Ож бырем бере колхозын ужаз. Солэн ранаез кулытозяз но ӧз бурмы. 1964 арын кулӥз.

1943 арын вордӥське Юра выны. Кема ар «Труд» колхозын шофёр луыса ужа. Собере «Сельхозтехникаын» тракторист луыса тырше, али пенсиын. 1947 арын Костя вордӥське, кулэмын ини. 1953 арын Виктор вордӥське. Со колхозын ужаз, али пенсиын. Анае но гумырыз ӵоже колхозын ужаз. 71 аресэн кулӥз.

Мон жугиськон дыръя шуг-секытэз уно адӟем маке. Соку мыным 6 арес вал. Монэ бускель бабай Демеев Семён (сюты Семён, яке «ведӥн бабай» шуо вал сое) вазь ӵукна ик 2 часэн сайкатэ вал. Ми, ведра йыгаса, колхозникъёсты сайкатылӥм. Мон кутгозыен чыртые ошем ведраез бодыен йыгаса ветлӥсько вал. Бабай чутэ вал, бодыен ветлӥз. Одӥг пол сое гурт пумын арлан (суслик) кышкатэм, вылаз тэтчыса. Соин монэ песяйлэсь курыса басьтӥз. Уйин соку туж кышкыт вал. Немец самолётъёс гурт йылтӥ котькуд нунал ургетыса лобазы. Мыным соку бабай вера вал, соос, пе, Иж городэз утчало. Кыӵе кышкыт вал со. Мон бабайлэн дукес пушказ но пегӟылӥ. Ми соин 1941-1944 арозь ветлӥмы гужем дыръя гинэ.

Ӵукна 3 час бере кутьы но потэ, анайёс но соку ини бусые кошко вал. Киын кизё, геры кыскыса гыро вал. Берто ӝыт 10 часэн.

Мар бен сиимы? Чуньыбыж куар, поттурын, пушнер, сисьмем картофка. Дорысь картофкаез лапша карыса вандылӥськом, куасьтӥськом вал жугиськонэ лэзьыны. Сое уйбыт паласа вандылоно вал ук.

Пуэз бен кытысь? Салазки кутыса, нюлэскы улвайлы мыноно вал, со понна но куто вал. Вот тыныд улон?! Гужем нуназезэ сельсовет председатель котькуд коркась пиналъёсыз бусые улля вал. Жагтурын урыны, кизем ю вылэ. Со лыктэм мурт вал, Арча палась, кема ӧз улы, пегӟиз. Со милемыз жугылӥз.

Жугиськон потытозь Ципья район кылдэм гинэ вал (1938-1941), соку ми мар но ӧм адӟе. Быдэс выль лыктэм муртъёс кузё луизы, тужгес но кышнооссы но нылпиоссы. Милемлы магазинысь нянь ӧз йӧты, шуид ке но луэ. Соослэн нылпиоссы кузё вал, милемыз жуго вал, нюлэскы пушмульылы но мыныны уг луы, талало вал. Ми магазинысь ческыт сиён басьтыны ӧм быгатэ. Сьӧдчабей кеньырез но. Ваньмыз соос понна вал. Клубе но мыныны уг луы вал, рогаткаен ыбылӥзы. Вот умой улон! Нимъёссэс ӧй гожты.

Мон 9 аресэн гинэ дышетскыны мынӥ. Книга, тетрадь ӧй вал, вуж книгаез линовать карыса гинэ гожъяськимы. Милям дышетӥсьмы Анфиса Филипповна Тарасова вал, со Иже кошкем бере, мукет дышетӥсьёс луизы. 4 класс дырозь 3 дышетӥсьлы вуимы.

Милемыз гужем каникул дыръя но тэк ӧз возе. Гужембыт колхозын ужамы. Ӵукна 5 часысен ӝыт 11 часозь - комбайнын. Шеморданэ ю тысь поттыто вал, амбарын ужамы.

1953 арын Куйбышевской ГЭС лэсьтон понна Кама шур дурысь писпуосты вандылӥзы. Соку милемыз («Труд» колхозысь 8 ӵошен) писпу улвайёс ӝуатыны нуизы. Со исполкомлэн ужез вал. Милемыз Соловьёв Василий Кузьмич нуыса мынӥз, открытой машинаен. Ми гинэ ӧй вал отын, Ципья зонаысь вань колхозысь колхозникъёс, уноез 16-18 аресъем пинал муртъёс. Ку бертэммес уг тодӥськы ини, Кама шур кузя пароходэн Малмыже васькеммес гинэ тодэ ваисько.

1955 арын школаез йылпумъяй. Экзамен бере ик Казане концертэн мынӥмы. Худрукмы Кубашев П.А. вал, культпросветын ужась Аскарова Амина.

Мынэм бере милемыз Нариман урамысь 127-тӥ школае интыязы, гостиницаын инты ӧй вал. Ми соку парадэ но пыриськимы. Со вал Вормон нуналлы 10 ар но Татарстанлы 45 ар тырмонэз пусъён. Милемыз киножурналэ но уськытӥзы, ми сое уно пол учкылӥмы асьме клубын.

1955-60-тӥ аръёсы агитбригадаын ветлӥ. 1957-тӥ арын, Муса Джалиль нимо операя театрез усьтыкузы, сводной хорын участвовать кари. Ми отын Корепановлэсь «Шудбуро выль улон усьтӥськиз» кырӟанзэ кырӟамы. Куинь пол калыкез лыдъян-чотан уже пыриськи. Ципья участковой больницаын 16 ар парторганизацилэн секретарез вал. Унозэ мон сельсоветлэсь общественной ужзэ быдэсъяй. Пересьмем бере табере кулэ но уг каро ини...