Улыса улэм потымон!

Россилэн Президентэзлэсь Владимир Путинлэсь Ӟечкылан открытказэ, Балтась муниципальной районлэн главаезлэсь но гурт поселенилэсь кузьымъёссэс вуттӥзы.

Зоя Семёновна Колесникова Кургем гуртын вордскемын. «1955 арын та гуртэ куное лыктӥськем вал. Со арын Кускем гурт пиен Иосифен тодматскыса, соин семья кылдытӥм. Кык ныл но кык пи будэтӥм. Но кузпалэ 12 ар талэсь азьло та улонысь кошкиз. Туннэ нуналэ Вячеслав пиелэн семьяеныз улӥсько. Роза кенэ но мынам вордскем гуртысьтым. Тани 27 ар ӵошен улӥськом ини. Тунсыко — та семьяе вуэм кенъёссы ваньзы но Кургемысь вылӥллям. Мынам анайзые серекъяса вера вал: «Сьӧрысь ӧсэз ворсай ке но, Кургем нылъёс котьма ке но пыро».

Юртамы ми али 4 поколение улӥськом. Андрей внуке но кузпалъяськемез бере палэнэ ӧз кошкы, одӥг бадӟым семья луыса улӥськом. Ваньмыз 15 внуке, 5 правнуке вань. Мынэсьтым узыр адями ӧвӧл.

Али улон туж умой, ракат ук. Улыса улэм потымон!!! Нош ми пичи дыръямы туж секыт будӥм. Сютэм, куанер улӥмы. Ож аръёсы колхозын ужамы. Мон колхоз контораын утялскыса но улӥ али. Бускель Кургем гуртын клубен кивалтӥсь луыса ужа        валаса улыны кулэ!» — шуэ одӥг даурлы матэ улон сюрес ортчем юбилярмы Зоя Семёновна.

Бен, улонлэсь курытсэ трос веръям, шуг-секытъёсты каньыл гинэ вормыса улэм Зоя апайлэн кылъёсыз санэ басьтымон гинэ ӧвӧл, тодэ кыльымон! Со бигер кылын но умой вераське, ас вордскем удмурт кылзэ, осконзэ, сям-йылолъёссэ но уг вунэты. Семьяяз выжыысь выжые сётӥськись, пересь анайзыезлэсь кылем азвесь коньдонлэсь лэсьтэм камализэ но синпелез кадь утё. «Мон бере внукъёсы но мед утьысалзы, выжыысь выжые выжыса, бадӟым синпель луыса мед кыльысал», — шуиз со.

Зоя апай зэмзэ но, ас калыксэ гажась сюлэмо вылэм, клубен кивалтон аръёссэ тодаз вайыса, кияз асэныз ӵош пересьмись балалайказэ кутыса, Кускем гуртлэсь такмакъёссэ но кырӟаз. Нош нырысь «чиньыосы шудыны уг быгато ни, уг выро, пересьми ини» шуэм вал... Тӥни ук, районамы 90 аресъем юбилейзэ пусйыкуз ачиз шудӥсь, кырӟась мурт но вань! Туж усто!

Тӥни сыӵе со Зоя Семёновна! Котьмае тодыса улэ. «Кутьку район газетэз басьтӥмы. «Азьланеез» витьыса улӥсько. Редакциысь нылъёс туж быгатыса, умой гожъяло. Ми кадь пересьёс сярысь но ялан гожто. Куд-ог гожъямъёсты нош но нош лыдӟисько. Дуннеысь выль иворъёсын тунсыкъяськисько, таиз почтаын ужам адями луэмысь, дыр, ини...» — шуэ юбиляр.

Ђутскем мылкыдо, егит сюлэмо, улонэз яратӥсь арлыдоосмылэсь асьмеос — егитъёс адӟем карыны гинэ кулэ!