Ужзы вань шуыса шумпото

Бадӟым Лӧзя 1 люкет гуртын интыяськем фермаын 300 йыр кысконо скал лыдъяське. Суткалы 5,5 тонна йӧл кыскиське, солэн 5,1 тоннаез государстволы вузаське.

Ми лыктыку, «Сурнай» обществоысь зоотехник Азат Габдулхаков но фермаен кивалтӥсь Раян Файзрахманов нуналмысь быдэстоно ужъёссы, вуоно нуналлы планъёссы сярысь верасько вал.

— Бадӟым Лӧзялэн 1 люкет гуртысьтыз фермаын котькуд ужась ас ужезлэн усточиез, — пумитаз милемыз Азат Габдулхаков. Азат ас дыраз Улын Ушма фермаын заведующий луэм. Али обществоын зоотехник. Ӧнер тодон-валан басьтыса, Раян Файзрахмановен одӥг дыре уже лыктӥллям. Туннэ нуналэ соос кыкназы но тыршыса ужало. Раян Файзрахмановлэн ужаны кутскемез дырысен ини 10 ар ортчем. Лилия кузпалыз но татын тырше, лаборант. Лыктыкумы со йӧллэсь чылкытлыксэ, вӧйлыксэ эскеронэн выре вал. Тунсыкъяськыса учкеммес адӟыса, серектыса валэктӥз:

— Йӧллэн чылкыт, вӧё луэмез меӵак доходэз возьматэ.

Озьыен, соин вань коллективлэн уждунэз герӟаське. Екатерина Агеева, Людмила Плотникова, Лилия Матвеева, Марат Муртазин, Мария Маврина, Надежда Шишкина скал кыскисьёслэн ӵошен тыршеменызы суткалы 5,5 тонна йӧл кыскиське, солэн 5,1 тоннаез государстволы вузаське вылэм. Ми лыктыку, скал кыскисьёслэн ӵукна сменазэс йылпумъяса доразы бертон дырзы тупаз. Озьы ке но вераськыны дыр шедьтӥзы нылкышноос.

— Ӵук сменае 3 часэн лыктӥськом. Ужез быдтыса бертытозь 10 час тырме. Кыкетӥ сменае ке ужаськом, нуназе 12 часэн лыктӥськом но 7-ен бертӥськом. Азьло скалъёсты думоно-лэзёно, сиёнзэс ӝутъяса сётъяно, йӧлэз ведраен нуллоно вал. Со дырен ӵошатыса, али ужъёс трослы капчигес. Но озьы ке но, ужатэк гинэ йӧл уг кыскиськы, — шуо скал кыскисьёс.

Веранэз ик ӧвӧл, туннэ киын ужан кулэсмиз ке но, фермаосын адямиен быдэстоно уж валтӥсез луыса кыле али.

Скал кыскисьёсты кулэ дыръя Лариса Назипова, Анна Муртазина вошто вылэм. Пудо вордонын тужгес кылкутымон луись кунян ваён гидын ужась Маргарита Сергеева но коллективын туж ушъямон, Гузель Мухамметзянова но кема аръёс ӵоже ужасьёс пӧлысь луэ.

— 2020 арын 310 йыр кунянмы вордскиз. Солэн 203-ез — скалъёслэсь, 107-ез — ветылъёслэсь, — шуэ зоотехник. Татын озьы ик осеменаторлэсь Сергей Макаровлэсь, пудо врачлэсь Владимир Филипповлэсь тыршемзэс но пусйыны кулэ. Кыксы но соос трос аръёс ӵоже ужам, бадӟым опытэн ужасьёс; гуртазы но, коллективын но гажамон адямиос.

— Кунянъёсты 6 толэзёзь татын возё но Вылын Ушма яке Куюк фермае келяло, — шуыса милемыз кунянъёслэн группаязы ужасьёс доры вайиз фермаен кивалтӥсь.

Пудо утисьёс Елена Байманова, Лариса Мойсеева но Наталья Антонова тупаса, ог-огзэс валаса ужало, ужамзы кивалтӥсьёсын но вылӥ дунъяське.

— Фермае лыктэмелы туэ ноябре 30 ар луэ. Егит дыръям гурт клубын ужай, берло фермае лаборант луыса лыктӥ. Собере кунянъёслэн группаязы ужаны кутски. Вячеслав кузпалэ но колхозын ужа, тракторист. Кык пи будэтӥмы, бадӟымез Казаньын ужа, кыкетӥез КФУ-ын куинетӥ курсын дышетске. Хозяйствоямы уно пудо вордӥськом. Сотэк уг луы, — шуэ Лариса Мойсеева.

Нош Елена Байманова нырысь гынсапег лэсьтон цехын ужам. 2001 арын фермае ужаны лыктэм. Пи но ныл будэтэм. Жаляса веранэ, кузпалыз туж вазь кулэм. «Туннэ нуналэ кыкез но нылпиосы Казаньын. Нылы быземын, пие ужа, кык внукъёсы будо. Сӧл-таза луыса ужаны мед кылдоз», — шуиз со. Газетэ коллектив сярысь гожтыны лыктэммес тодыса, «гажан возьматэмды понна тау» шуыса но ватсаз на.

Кунянъёсты утись нылкышноослэн одӥгеныз, Наталья Антоноваен, пумиськыны ӧм тупалэ. Но со сярысь но шуныт ушъян кылъёс гинэ кылӥмы. Ас ужзэ яратыса, рос-прос быдэстӥсь кышномурт, шуизы. Сварщик луыса ужась кузпалэз Владимир сярысь но ушъян кылъёс гинэ веразы.

Уно йӧл, пудолэсь шӧдскымон привес басьтэмед ке потӥз, нырысь ик, сое шонер сюдыны кулэ. Мукет фермаосын кадь ик, Бадӟым Лӧзялэн 1 люкетысьтыз фермаын но талы бадӟым саклык висъяло.

— Пудолы сиён миксерен пыртӥськомы. Сезьыез но пӧзьтыса сюдӥськом, — шуиз фермаен кивалтӥсь.

Асьмеос ӵемысь ферма ке быриз, гурт быроз шуыса вераны яратӥськом. Зэмзэ но, гуртлэн туннэез но, вуоноез но фермаын ужасьёсын, соослэн семьяосынызы герӟаське. Со понна скал кыскись но, пудо сиён пыртӥсь но, кунянъёсты утись но, ӧнерчиос но огмылкыдо луыса, рос-прос но сюлмысь тыршыса ужаны кулэ. Шумпотымон, Бадӟым Лӧзя 1 люкет гуртысь фермаын но ӵапак таӵе коллектив тырше.