«Ужлэсь палэнскиськод ке, кинлы тон кулэ луод?» (Азьланьтонэз)

– Сыӵе усточи луиськоды бере, асьтэос но кыӵе ке крезьгуро инструментэн шудыны быгатӥськоды, дыр?

– Жаляса верано, номаин но шудыны уг быгатӥськы. Пичи дыръям Гилязь бабай вань вал, со Смаильысь лыктэ вал, гурт кузя шудыса ветлылӥз. Солэсь шудэмзэ учкыса, мынам но кыӵе ке инструментэн шудыны мылкыд ӝутӥськиз. Атай тальян но басьтэм вал. Милям Татьяна песяймы тани мызганэн шудэ вал, а мон выри-выри, ӧй быгаты. Али тани туж шумпотӥсько, кин ке кыӵе ке крезьгуро инструментэн шудэ ке. Сыӵе адямиосты туж гажасько. А вот ачим быдэс сюлэмез поныса дышетскыны ӧй быгаты. Монэ котьку тросгес суредаськон бордаз кыске вал. Ма, мукет паласен учконо ке, али но бер ӧвӧл на. Тани мынам дорам крезь вань, кубыз, скрипка, собере эшшо гибридной кубыз-балалайка лэсьтӥ, пичи гырлыосын валче со, маракасыос но, ваньмыз дорын кылле. Внучкаосылы но лэсьтыса сётъяй ини. Но матысьёсы пӧлын нокин крезьгуро инструментэн уг шуды. Туж потэ вал, кин ке но мед кутскоз, кин ке мед тунсыкъяськоз шуыса. Тани матысь дыре, 8 коньывуонэ, внучкаелы 5 арес тырмоз, солы нимаса скрипка, ватсаса чехол, мукет кулэ арбериосты но басьтӥ. Мед шудысалзы асьсэ понна гинэ ке но. Со ведь туж умой. Кыӵе ке крезьгуро инструментэн шудыны быгатӥсь адями доры котьку адямиос люкасько, со вӧзын котьку шулдыр. Тани армиын служить карыкум но, кин ке гитараен шудыны кутске ке, ваньзы дораз люкасько ини, данъямон адями луэ вал со мурт.

– Тӥ асьтэос но тодӥськоды, дыр, туэ «Гырон быдтон» удмурт праздникмы Балтась ёросысь Ципья гуртын ортчиз. Татын аслэсьтыз сӥё-дано интызэ кубыз басьтӥз. Но, жаляса верано, кубызэн шудӥсьёсты сокем трос ум но тодӥське ни. Та ужез выльысь ӝутыны луоз меда?

– Та уж борды кин ке кутскысал ке, туж но туж умой луысал. Пичи дырысен ик дышетыны кулэ пиналъёсты. Мызганэн шудӥсьёс али яра тырмо, нош кубыз воксё вашкалае кылемын. Таӵе гожтэмъёс, чебер крезьгуро инструментъёслы синмаськыса, одӥг ке но адямилэн шудыны мылкыдэз ӝутӥськысал ке, ваньмыз юнме но ӧй луысал. Асьме гуртамы (Вуж Кушкет – ред.) гинэ но Харитон, Солей Васьлей, Павлов Иван Константинович шудо вал кубызэн. Адӟеме но вань али шудэмзэс.

P.S. Вылӥын гожтэм муртъёслэн ӵыжы-выжыоссы та статьяез лыдӟизы ке, редакцие ивортыны куриськом веранлэсь шонерлыксэ. Кин тодэ, оло, тӥ эшшо но трос ивортодэт сётыны быгатоды кубызэн шудӥсь гуртоос сярысь.

– Шонер вераськоды, туннэ нуналлы мызганэн шудӥсьёс вань на, нош кубызэн шудӥсьёс воксё ӧжыт. Кубызэн шудэм гуръёс аспӧртэмлыко мылкыдъёсты бугырто кадь, озьы уг-а поты?

– Ой, кыӵе сюлэмез позырто соос… Тани улонысьтым одӥг учырез вераме потэ. Огдыре ужинтыям кыкетӥ сменаын дежурить карыны косӥзы. Пукисько, кыӵе ке ужрад мынэ вал ӵапак со дыре. Вуизы музыкантъёс – крезьёсын, кубызъёсын шудӥсьёс. Холлын пукись пиосмуртэз синйылтӥ, мурегес пырыса, кубызэн шудэ вал. Кӧня ке кылзӥськи но, асьме Кушкет гуртын вӧлмем гуръёсты шудэ вылэм. Мынам сюлэмы ик золгес йыгаськыны кутскиз. «Кин со сыӵе, кытысен тодэ асьме палась гуръёсты?» шуыса пайми. Собере адями сопала-тапала пазьгиськем бере дораз лыктӥ но юасько: «Тӥ Балтась районысь ӧвӧл-а?» Пумитам вера: «Мынам атае Балтась районысь вал, соос Можгае кошкиллям, со весь кубызэн шудэ вал. Азьло мыным туж ик тунсыко ӧй вал. Атай кулэм бере, 90-лэсь трос вал ини солы, крезьгуро инструментъёс арлэсь трос кыллизы, мон малпай «мон наукаосъя доктор, неужели уг быгаты таин шудыны?» Озьы тӥни кубызэн шудыны кутски, али дырозь но шудӥсько». Сыӵе тӥни тунсыко учыр.

Николай Ивановичлэн лэсьтэм кубызэз Вуж Кушкет гурт клубын котьку трос адямиез люка. Дуно пуштросэн крезьгуро инструментэз чакласа гинэ учко егитъёс но, пиналъёс но, лыктэм куноос но. Туж жаль, та чебер инструмент шоры учкыны гинэ луэ шуыса. Ведь солэн аспӧртэмлыко чузъяськемез сюлэм пыр поттэ но мур малпанъёсы выйытэ. Дыр ортчыса, кубыз музей экспонат луыса медаз кыльы шуыса, туннэ, та минутэ, та секундэ пиналъёсты крезьгуро инструментэн шудыны дышетыны кутсконо ини. Ведь кӧня ке арскын, та крезьгуро инструмент вуноз но, весяклы ышоз.